ەكيپاج قۇرامىندا رەانيماتولوگ-انەستەزيولوگ ەرمەك بەكەتاەۆ پەن شىعىس قازاقستان وبلىستىق سانيتارلىق اۆياتسيا ءبولىمىنىڭ فەلدشەرى انتون ۆولكوۆ بولعان. ايتۋلارىنشا, مەديتسينالىق بريگادا زايسان قالاسىندا ينسۋلت العان ايەلگە كومەك كورسەتۋ ءۇشىن ۇشىپ بارا جاتقان.
يندۋستريا جانە ينفراقۇرىلىمدىق دامۋ مينيسترلىگى وقيعانى راستاپ وتىر. ابىروي بولعاندا, ەكيپاج مۇشەلەرىنىڭ ەشقايسىسى زارداپ شەكپەگەن. ال ۇشاق «ناۆيگاتور» جشس-نە تيەسىلى.
– زارداپ شەككەندەر جوق. ۇشاققا دا زاقىم كەلمەدى. بورتتا ءۇش ەكيپاج مۇشەسى مەن ەكى مەديتسينا قىزمەتكەرى بولعان, – دەپ حابارلادى مينيسترلىكتەن.
كۇنى كەشە «جەدەل جاردەم» كولىگى جول كولىك اپاتىنا ۇشىراپ, شىعىس ءوڭىر تۇرعىندارى قوس بىردەي مەديتسينا قىزمەتكەرلەرىنەن ايىرىلعان. ەندى مىنە, ۇشاقتان اقاۋ شىعىپ, تاعى دا اق حالاتتىلار جازىم بولا جازدادى. الايدا «قۇداي ساقتانعاندى ساقتايدى» دەگەن ءتامسىل بار ەمەس پە؟! وسىنداي وقىس جاعدايدى بولدىرماۋ ءۇشىن قانداي شارالار قابىلدانادى دەپ شىعىس قازاقستان وبلىستىق دەنساۋلىق ساقتاۋ باسقارماسىنا حابارلاسقانبىز.
– قازىر سانيتارلىق ۇشاقتاردىڭ تەحنيكالىق ماسەلەسىن ايتىپ, دەنساۋلىق ساقتاۋ مينيسترلىگىنە حات دايىنداپ جاتىرمىز. ويتكەنى قاداعالاۋدى رەسپۋبليكالىق «سانيتارلىق اۆياتسيا» مەكەمەسى جۇرگىزەدى, – دەدى دەنساۋلىق ساقتاۋ باسقارماسىنىڭ باسشىسى جايىق جۇماحانوۆ.
ەسكە سالساق, بۇل – شىعىس قازاقستان وبلىسىندا ان-2 سانيتارلىق اۆياتسياسىنىڭ قاتىسۋىمەن بولعان ءتورتىنشى توتەنشە جاعداي.
تۋرا ءبىر جىل بۇرىن, 26 اقپاندا وسكەمەننەن شىققان ۇشاقتىڭ قوزعالتقىشى ىستەن شىعىپ, قالىڭ قارعا قۇلاعان. ول كەزدە سانيتارلىق ۇشاق تارباعاتاي اۋدانى, اقسۋات اۋىلىنداعى 4 ايلىق نارەستەنى وبلىس ورتالىعىنا جەتكىزۋ ماقساتىندا ۇشىپ شىققان ەدى. ايتەۋىر, ول كەزدە دە مەديتسينا قىزمەتكەرلەرى مەن ەكيپاج مۇشەلەرى امان قالعان.
قاشانعى اق حالاتتىلاردىڭ ءومىرىن قاتەرگە تىگەمىز؟! ناۋقاس تاسىمالداۋعا ارنالعان ەسكى ۇشاقتار تىزىمنەن شىعارىلىپ, جاڭارتىلاتىن ۋاقىتى جەتكەن شىعار.
شىعىس قازاقستان وبلىسى
