شقو اقپارات ورتالىعىنىڭ مالىمەتىنە سۇيەنسەك, ۇلان اۋدانىندا اۋىل شارۋاشىلىعى سالاسىنىڭ دامۋىنا سەرپىن بەرەتىن بىرقاتار جوبا جۇزەگە اسىرىلۋدا. ايىرتاۋ اۋىلدىق وكرۋگىندەگى «رەجەباليەۆ» شارۋا قوجالىعىنداعى ءسۇت-تاۋار فەرماسىندا ساۋىن تابىنىن ۇلعايتۋ بويىنشا قارقىندى جۇمىس جۇرگىزىلۋدە. شارۋاشىلىق ونىمدىلىگى جوعارى, اسىل تۇقىمدى مال ساتىپ الۋدى جوسپارلاپ وتىر.
«اۋداندا قازىردىڭ وزىندە وسكەمەن قۇس فابريكاسىنىڭ ءۇش وبەكتىسى سالىنۋدا. ەت جانە ەت ونىمدەرىن ءوندىرۋ بويىنشا ۇلكەن كلاستەر قۇرۋ جوسپارلانعان. گەراسيموۆكا اۋىل شارۋاشىلىعى بازاسىندا 5 مىڭ باسقا ارنالعان بورداقىلاۋ الاڭىنىڭ, سونداي-اق ەت كونسەرۆىلەرىن ءوندىرۋ زاۋىتىنىڭ قۇرىلىسى باستالدى. جوبانىڭ جالپى قۇنى 700 ملن تەڭگەنى قۇرايدى. بۇگىندە قۇرىلىس-مونتاجداۋ جۇمىستارى اياقتالىپ, رەسەي فەدەراتسياسىنان جابدىقتاردى جەتكىزۋشىلەرمەن شارت جاسالدى», دەلىنگەن حابارلامادا.
وسى جىلدىڭ ءساۋىر-مامىر ايلارىندا ىشكى قۇرىلىس جۇمىستارى اياقتالماق. جالپى كاسىپورىن كۇنىنە 25 تونناعا دەيىن ەت, 8 مىڭ داناعا دەيىن كونسەرۆى شىعارۋدى جوسپارلاپ وتىر. ولار ونىمدەردى رەسەي مەن قىتاي ەلدەرىنە ەكسپورتتايدى.
