2020 جىلدىڭ باسىندا بانك سالىمشىلار قاراجاتتارىنىڭ ايتارلىقتاي جىلىستاۋىن باستان كەشىردى, ال ناۋرىز ايىندا قارجى ينستيتۋتى وتىمدىلىكتىڭ ءتيىستى دەڭگەيىن قامتاماسىز ەتۋمەن بايلانىستى پروبلەمالارعا تاپ بولدى.
2020 جىلدىڭ 1 ناۋرىزىنان باستاپ Tengri Bank بانك كليەنتتەرىنە رەتتەۋشىنىڭ پرۋدەنتسيالدىق نورماتيۆتەرىن بۇزىپ قىزمەت ەتە باستاعان. ناتيجەسىندە اگەنتتىك بانكتىڭ اكتسيونەرىنە (PNB) بانكتى 2020 جىلدىڭ ءساۋىر ايىنىڭ اياعىنا دەيىن كاپيتالداندىرۋ تۋرالى قاداعالاۋ تالابىن جىبەرەدى. تالاپ ورىندالمادى.
2020 جىلعى ناۋرىزدان قىركۇيەككە دەيىنگى كەزەڭدە اگەنتتىك بانك باسشىلىعى مەن اكتسيونەرلەرگە قاتىستى 11 بۇيرىق جانە ءبىر ماجبۇرلەپ قاداعالاۋ شاراسىن قابىلدادى.
«رەتتەۋشىنىڭ قاداعالاۋىمەن بانك نەسيەلەردى قايتا قارجىلاندىرۋ جانە پروبلەمالىق نەسيەلەردى جيناۋ بويىنشا ءىس-شارالار جۇرگىزدى, ناتيجەسىندە بانكتىڭ مىندەتتەمەلەرى 26,4 ملرد. تەڭگەگە ازايدى, ونىڭ ىشىندە مەملەكەتتىك كومپانيالار الدىنداعى قايتارىلعان مىندەتتەمەلەر 5 ملرد تەڭگە», دەيدى ولجاس قيزاتوۆ.
دەگەنمەن بۇل شارالار بانكتىڭ قارجىلىق جاعدايىن دۇرىستاۋعا جەتكىلىكسىز بولدى. ونىڭ ايتۋىنشا, 2020 جىلدىڭ قىركۇيەگىندە بانكتىڭ قولدا بار وتىمدىلىگى 100 ميلليون تەڭگەگە جەتپەگەن, ال كليەنتتىڭ ورىندالماعان تولەمدەر كولەمى شامامەن 8 ملرد. تەڭگە بولعان.
سونىمەن بىرگە بانكتىڭ ءوز كليەنتتەرى الدىنداعى مىندەتتەمەلەرىنىڭ جالپى كولەمى 74 ملرد تەڭگەدەن استام قاراجاتتى قۇرادى. ول بانكتىڭ تولەم قابىلەتسىزدىگىن, ال ونىڭ ءتيىمسىز بيزنەس مودەلى جاعدايدى تۇراقتاندىرۋ ءۇشىن جەتكىلىكتى كىرىس الۋعا مۇمكىندىك بەرمەيتىنىن اتاپ ءوتتى. Tengri bank-ءتىڭ تولەم قابىلەتسىزدىگى ەڭ الدىمەن نەسيە پورتفەلىنىڭ ساپاسىنىڭ تومەندىگىمەن بايلانىستى. ليتسەنزيا قايتارىپ الىنعان كەزدە نەسيەلىك پورتفەلدىڭ 84% -ى مەرزىمى وتكەن, 90 كۇننەن اسقان مەرزىمى وتكەن نەسيەلەر بارلىق نەسيەلەردىڭ 62%-ىن قۇراعان. اگەنتتىكتىڭ باعالاۋى بويىنشا, Tengri Bank نەسيەلەرىنىڭ 58% بانك اكتسيونەرلەرىمەن جانە باسشىلىعىمەن جاناما بايلانىستى ادامدارعا بەرىلدى جانە ءىس جۇزىندە قايتارىمسىز بولدى.
قارجى ينستيتۋتىنىڭ كۇردەلى قارجىلىق جاعدايىن قازاقستاندىق اكتسيونەرلەر اراسىنداعى كورپوراتيۆتى داۋلار قيىنداتىپ, كەيىننەن ولاردىڭ اراسىنداعى سوت ىسىنە ۇلاستى. بانكتە قاراجات بولماعان كەزدە جانە اكتسيونەر اگەنتتىكتىڭ بانكتى كاپيتالداندىرۋ جونىندەگى تالابىن ۇزاق ۋاقىت بويى ورىنداماعان جاعدايدا, بانك پرۋدەنتسيالدىق نورماتيۆتەردى بۇزىپ, بانك كليەنتتەرىنىڭ تولەمدەرى مەن اقشا اۋدارىمدارىن ورىنداماعان.
بانك باسشىلىعى مەن اكتسيونەرلەرى تاراپىنان تۋىندايتىن كۇردەلى جاعدايدى تۇزەتۋ مۇمكىندىگىنىڭ جوقتىعىنان بانكتى ليتسەنزياسىنان ايىرۋ تۋرالى شەشىم قابىلداندى. كەپىلدەندىرىلگەن وتەماقىنى تولەۋ ماسەلەسىن جەدەل شەشۋ ءۇشىن اگەنتتىك ۇلتتىق بانكپەن جانە قازاقستاندىق دەپوزيتتەرگە كەپىلدىك بەرۋ قورىمەن بىرگە جەكە تۇلعالاردىڭ دەپوزيتتەرىنىڭ كوپ بولىگىن ەكى اپتا ىشىندە تولەدى.
ايدا ورالبەك
