بۇل ماسەلە رەسەي فەدەراتسياسىنىڭ 5 وبلىسىمەن شەكتەسىپ جاتقان باتىس قازاقستان وبلىسىندا وتە وزەكتى. اۋىلى ارالاس, قويى قورالاس جاتقان قوس ەلدىڭ ازاماتتارى اراسىندا الىس-بەرىس, تۋىسقاندىق قارىم-قاتىناستىڭ تالاي عاسىرعا كەتەتىن تاريحى بار.
سوڭعى كۇندەرى بۇقارالىق اقپارات قۇرالدارىندا باتىسقازاقستاندىق مەملەكەتتىك قىزمەتشىلەر اراسىندا شەتەل ازاماتتىعىن العان تۇلعالار بار ەكەندىگى جايلى حابار تاراعان كەزدە, ەل ىشىندە نارازىلار كوبەيدى.
«بۇل قاتە اقپارات. جالپى, قازاقستان بويىنشا وسىنداي وقيعا بولعانى راس. سوندىقتان ءبىز ءتيىستى مەكەمەلەرگە تاپسىرما بەرىپ, وڭىردەگى مەملەكەتتىك قىزمەتكەرلەردىڭ ازاماتتىعىن تاعى ءبىر مارتە تەكسەرۋدى باستادىق. ادەتتە كەز كەلگەن ادام مەملەكەتتىك قىزمەتكە كىرەردە ارنايى تەكسەرىستەن وتەدى, شەتەل ازاماتى بۇل قىزمەتكە جىبەرىلمەيدى. ال مەملەكەتتىك قىزمەتتە ءجۇرىپ, شەتەل ازاماتتىعىن الاتىن تۇلعالار بولسا, وندا ول ادام قىزمەتتەن شەتتەتىلەدى», دەدى قازاقستان رەسپۋبليكاسى مەملەكەتتىك قىزمەت ىستەرى اگەنتتىگى باتىس قازاقستان وبلىسى بويىنشا دەپارتامەنتى باسشىسىنىڭ ورىنباسارى امانقوس جۇبانىش.
باتىس قازاقستان وبلىستىق پوليتسيا دەپارتامەنتى كوشى-قون پوليتسياسى باستىعىنىڭ مىندەتىن اتقارۋشى الماس نۇردىڭ مالىمدەۋىنشە, 2020 جىلدىڭ باسىنان بەرى وبلىستا 865 تۇرعىننىڭ قوس ازاماتتىق جاعدايدا جۇرگەنى انىقتالعان. بۇل تۇرعىنداردىڭ 99-ى اكىمشىلىك جاۋاپكەرشىلىككە تارتىلعان. ۇلتتىق قاۋىپسىزدىك كوميتەتىنىڭ دەرەگىنشە, 23 ادامعا 100 جانە 200 ايلىق ەسەپتىك كورسەتكىش كولەمىندە 252 جانە 505 مىڭ تەڭگە ايىپپۇل سالىنعان.
ساراپشىلار قازاقستاندىقتاردىڭ وزگە ەل ازاماتتىعىن الۋىنا بىرنەشە سەبەپ بار ەكەنىن ايتادى. ياعني كارانتين ۋاقىتىندا, توتەنشە جاعدايلار كەزىندە جانە قىلمىستىق قۋدالاۋعا ۇشىراعاندا شەكارادان كەدەرگىسىز ءوتىپ كەتۋ ءۇشىن قوس ازاماتتىق قولايلى. سونداي-اق كورشى ەلدەگى زەينەت جاسى مەن مولشەرى, بالا تۋ كەزىندەگى تولەماقى كولەمى, جوعارى وقۋ ورنىنا ءتۇسۋ كەزىندەگى جەڭىلدىكتەر قىزىقتىرادى ەكەن.
ارينە, تاڭداۋعا تالاس جوق. بىراق بۇل ەلدەگى جايلى قونىسىنان, بالكىم مايلى قىزمەتىنەن دە قول ۇزگىسى كەلمەگەندىكتەن جاسىرىنىپ, «قوس مەكەندى» تىرلىكپەن جۇرە تۇرعىسى كەلەتىندەرگە نە ايتۋعا بولادى؟!
باتىس قازاقستان وبلىسى
