سونداعى ساناعا ساق ەتىپ كەلگەن وي – ادام ومىرىنە اراشا تۇسەتىن مەديتسينا سالاسى شەكارا شەبىندە جاتقان اۋداندا قاۋقارسىز با؟ ناۋقاستاردى سالدىرلاتىپ, سوناۋ 600 شاقىرىم شالعايداعى ءۇرجاردان وبلىس ورتالىعىنا نەمەسە سەمەيگە جەتكىزۋ قيىنعا سوقپاي ما؟ كۇن رايى قولايسىز بولدى دەگەننىڭ وزىندە جولدىڭ جاي-كۇيى قالاي؟
الدىمەن ورىن العان قايعىلى وقيعاعا توقتالايىق. اقپاننىڭ 3-ءى كۇنى كەشكى ساعات 19:30 شاماسىندا, تىركەمەسى بار «DAF» جۇك كولىگىنىڭ 29 جاستاعى جۇرگىزۋشىسى قولايسىز اۋا رايىنا بايلانىستى تىزگىنگە يە بولا الماي, قارسى كەلە جاتقان جەدەل جاردەم اۆتوموبيلىمەن سوقتىعىسقان. 44 جاستاعى جەدەل جاردەمنىڭ جۇرگىزۋشىسى اۋىر حالدە اۋرۋحاناعا جەتكىزىلسە, انەستەزيولوگ دارىگەر بولات ءادىلحانوۆ پەن جوعارى ساناتتى حيرۋرگ بەيبىت عابدۋلين وقيعا ورنىندا قايتىس بولدى. ەكەۋىنىڭ دە سوڭىندا شىرىلداپ بالا-شاعاسى قالدى. اۋىر قازاعا بايلانىستى دەنساۋلىق ساقتاۋ ءمينيسترى الەكسەي تسوي دارىگەرلەردىڭ وتباسىلارىنا, تۋعان-تۋىستارىنا قايعىرىپ كوڭىل ايتتى.
«دەنساۋلىق ساقتاۋ مينيسترلىگى ۇجىمىنىڭ اتىنان جانە ءوز اتىمنان شىعىس قازاقستان وبلىسىندا جول-كولىك وقيعاسىندا قازا تاپقان جەدەل جاردەم قىزمەتىنىڭ دارىگەرى مەن فەلدشەرىنىڭ وتباسىلارىنا قايعىرىپ كوڭىل ايتامىن. بۇل تراگەديا دارىگەر بولۋدىڭ قانشالىقتى قاۋىپتى ەكەنىن كورسەتتى. اۋا رايىنىڭ قولايسىزدىعىنا, جۇمىستىڭ اۋىرلىعىنا, شارشاعانىنا قاراماستان, دارىگەرلەر ءوز كاسىبىن قاشاندا ادال اتقارادى. قايعىلى وقيعا مەديتسينا قىزمەتكەرلەرىنىڭ قاۋىپسىزدىگى جايلى تاعى ءبىر ويلانۋعا تۇرتكى بولىپ وتىر» دەپ جازدى ۆەدومستۆو باسشىسى ءوزىنىڭ الەۋمەتتىك پاراقشاسىندا.
اتالعان فاكتى بويىنشا قىلمىستىق كودەكستىڭ 345-بابى, 4-بولىگىنە سايكەس سوتقا دەيىنگى تەرگەۋ امالدارى باستالدى. بىرقاتار سوت ساراپتامالارى دا تاعايىندالدى. بەلگىلى بولعانداي, جەدەل مەديتسينالىق جاردەم كولىگى «قان كەتىپ» جاتقان ايەلدى ءۇرجار اۋدانىنان سەمەي قالاسىنا جەتكىزىپ, قايتىپ بارا جاتقان جولدا اپاتقا ۇشىراعان. «اتتەگەن-اي» دەپ اۋداننىڭ اۋرۋحاناسىنا حابارلاسقانىمىزدا, ناۋقاستى امان الىپ قالۋ ءۇشىن ءار مينۋت ماڭىزدى بولعانىن ايتتى.
– ءبىز قالالىق دارىگەرلەرمەن ۇنەمى كەڭەسىپ وتىرامىز. وسى جولى دا كونسيليۋم بولىپ, وپەراتسيادان كەيىن اسقازان-ىشەك جولدارىنان قان كەتكەن ناۋقاستى سەمەيگە اپاراتىن بولىپ شەشتىك. ويتكەنى دياگنوزى تۇسىنىكسىز ەدى. دارىگەرلەرىمىز ناۋقاس ايەلدى قالالىق اۋرۋحاناعا امان-ەسەن جەتكىزىپ, قايتار جولدا قايعىلى جاعدايعا ۇشىرادى, – دەدى ءۇرجار اۋداندىق اۋرۋحاناسى ەمدەۋ ءىسى بويىنشا دارىگەردىڭ ورىنباسارى اسەل قابدولوۆا.
«جازمىشتان وزمىش جوق» دەپ باسۋ ايتادى مۇندايدا. ءيا, اۋدان باسشىلىعى كوز جۇمعان دارىگەرلەردىڭ وتباسىلارىنا جان-جاقتى كومەك كورسەتەتىلتىنىن دە حاباردار ەتتى. الايدا بالا-شاعالارىنا اسقار تاۋداي اكەلەرىن قايتارا المايدى. وزەكتى وكىنىش ورتەمەۋى ءۇشىن اۋدانداردىڭ مەديتسينا ساپاسىن قالالىق جەرمەن تەڭەستىرۋ كەرەك. دەمەك, ادام ءومىرىن ساقتاپ قالۋعا ەڭ قاجەتتى مەديتسينالىق قۇرىلعىلار مەن بىلىكتى ماماندار اۋدانعا دا تارتىلۋ كەرەك ەكەنى اركىمگە تۇسىنىكتى. «قايعىلى وقيعا مەديتسينا قىزمەتكەرلەرىنىڭ قاۋىپسىزدىگى جايلى تاعى ءبىر ويلانۋعا تۇرتكى بولىپ وتىر» دەگەن ا.تسوي دا سونى مەڭزەسە كەرەك. ەگەر بۇگىن-ەرتەڭ دەنساۋلىق ساقتاۋ سالاسىنا شىنايى كوڭىل بولىنبەيتىندەي بولسا, شۇرىق-تەسىگىنەن اياق سىندىراتىن جولدى مەرزىمىندە اياقتاۋ كەرەك ەدى. ەستەرىڭىزدە بولسا, پرەمەر-مينيستر اسقار مامين شىعىسقا كەلگەن ساپارىندا, 415 شاقىرىمعا سوزىلىپ جاتقان قالباتاۋ – مايقاپشاعاي تاس جولىنداعى كۇردەلى جوندەۋ جۇمىستارى 2020 جىلى اياقتالۋى كەرەكتىگىن ايتقان. جىلجىپ جىل ءوتتى. شۇڭقىرلارى قازانداي جول ءالى جاتىر. ارينە, جول ۇستىندە تەحنيكالار جوندەۋ جۇمىستارىن جۇرگىزىپ ءجۇر. بىراق پرەمەر-مينيستر ايتقان ۋاقىتتان كەشىكتى.
ال ءۇرجار اۋدانى اكىمىنىڭ ورىنباسارى ءبىرجان قادىر ۇلىنىڭ ايتۋىنشا, اۋداندا مەديتسينالىق قۇرىلعىلار, دارىگەرلەر تولىعىمەن جەتكىلىكتى. بيىل كومپيۋتەرلىك توموگرافيا قويىلدى, اۋرۋحانالار 5 جەدەل جاردەم كولىگىمەن قامتىلدى, ماقانشىداعى تۋبديسپانسەر 30 ادامعا لايىقتالىپ, ينفەكتسيالىق اۋرۋحانا ەتىپ قايتا جابدىقتالدى. ءۇرجار مەن ماقانشىعا كيسلورود بەرەتىن ۇلكەن اپپاراتتار ورناتىلىپ, تراسسالارى تارتىلدى.
دەي تۇرعانمەن, اۋداننىڭ دەنساۋلىق ساقتاۋ سالاسىندا كۇرمەۋى قيىن ماسەلەلەر كوپ سياقتى. وتكەنگە ورالساق, 2018 جىلى شولپان اۋىلىندا قىرىقتان استام بالا «ا» گەپاتيتىنە شالدىعىپ, 6-سىنىپ وقۋشىسى كوز جۇمعان بولاتىن. سول ۋاقىتتا دارىگەرلەر امبۋلاتوريالىق قىزمەتتى اقىلى كورسەتكەنى دە انىقتالىپ, جۇرتتىڭ جاعاسىن ۇستاتقان. قايعىلى وقيعانىڭ سوڭى – باس دارىگەردىڭ جۇمىستان بوساتىلۋىمەن اياقتالدى. قوش دەلىك. ءۇرجار اۋداندىق ورتالىق اۋرۋحاناسىنىڭ ۇجىمى قازىرگى باسشى باۋبەك ابىلقاسىموۆپەن دە جۇمىس ىستەسە المايتىنىن ايتىپ ءجۇر. ەستەرىڭىزدە بولسا, وننان استام اق حالاتتىلار باس دارىگەردىڭ جۇمىستان بوساتىلۋىن سۇراپ, الەۋمەتتىك جەلى ارقىلى بەينەۇندەۋ تاراتقان. ولاردىڭ ىشىندە كەشەگى اپاتتا كوز جۇمعان بەيبىت عابدۋلين دە بار ەدى.
اشىق اقپارات كوزدەرىنە سۇيەنسەك, باس دارىگەر قول استىنداعى قىزمەتكەرلەردىڭ ەسەپشوتىنا اقشا اۋدارىپ, الدەبىر كوميسسيانى كۇتۋگە جۇمساعان كورىنەدى. اۋىلدارداعى ۋچاسكەلىك دارىگەرلەردىڭ ماسەلەسى شاش ەتەكتەن سياقتى. ءبىلىمدى جاس مامانداردىڭ جۇمىس ىستەۋىنە دە كەسە-كولدەنەڭ تۇرىپ, كەدەرگى كەلتىرەدى ەكەن. ءسوزىمىز دالەلدى بولسىن دەپ, اۋداندىق اۋرۋحانا دارىگەرلەرىمەن سويلەسىپ تە كوردىك. ولار جوعارىدا اتالعان ماسەلەنىڭ بارىن جوققا شىعارمادى. بىراق اقىلداسىپ بارىپ ءۇن قاتايىق دەستى. ءسوز سوڭىندا, كوتەرىلگەن ماسەلەنى اياقسىز قالدىرماي, ۇكىمەتكە جەتسە ەكەن دەگەن تىلەكتەرىن ايتتى. ەندەشە, بۇل تاقىرىپقا قايتا ورالاتىن بولامىز.
شىعىس قازاقستان وبلىسى,
ءۇرجار اۋدانى
