اتالعان شاراعا ەاەو ۇكىمەتتەرىنىڭ باسشىلارى, ەۋرازيالىق كوميسسيا جانە تمد اتقارۋ كوميتەتىنىڭ جەتەكشىلەرى, سونىمەن قاتار, تسيفرلاندىرۋ سالاسىنىڭ ساراپشىلارى مەن ماماندارى قاتىسىپ جاتىر.
قازاقستان پرەزيدەنتى پاندەميادان كەيىنگى كەزەڭدەگى تسيفرلاندىرۋ ماسەلەسى جايىنداعى ويىمەن ءبولىستى.
«بولاشاق – تەحنولوگيالار مەن يننوۆاتسيالاردىڭ ەنشىسىندە ەكەنىن جاقسى تۇسىنەمىز», دەدى قاسىم-جومارت توقاەۆ.
مەملەكەت باسشىسى قازاقستاندا جاساندى ينتەللەكت تەحنولوگيالارىن جانە اۋقىمدى دەرەكتەردى تالداۋدى دامىتۋ تۋرالى ايتتى. بۇدان بولەك پرەزيدەنت ەاەو ەلدەرىنىڭ تسيفرلى ىنتىماقتاستىعى بويىنشا بىرقاتار وزەكتى باعىتتى اتاپ ءوتتى.
«سىزدەردى ءبىزدىڭ ەلىمىز ءۇشىن اسا ماڭىزدى شارادا كورگەنىمە قۋانىشتىمىن. مارتەبەلى قوناقتاردىڭ اراسىندا جەتى ەلدىڭ ۇكىمەت باسشىلارى, تمد ەۋرازيالىق ەكونوميكالىق كوميسسياسى اتقارۋ كوميتەتىنىڭ جەتەكشىلەرى بار. بۇل فورۋمنىڭ ماڭىزدىلىعىن ارتتىرا تۇسەدى. بىزدە مەملەكەتتىك قىزمەتتىڭ 90 پايىزى ەلەكتروندى فورماتتا كورسەتىلەدى. داعدارىس كەزىندە 6,5 ملن ادام مەملەكەتتىڭ قولداۋىنا يە بولدى. ءبىلىم بەرەتىن مەكەمەلەردىڭ بارلىعى قاشىقتان وقۋ ۇردىسىنە كوشتى. ەلىمىزدە 15 ملن-نان استام ادام ينتەرنەتتى قولدانادى. بولاشاق – تەحنولوگيالار مەن يننوۆاتسيالاردىڭ ەنشىسىندە ەكەنىن جاقسى تۇسىنەمىز. بۇل سالادا باسەكەلەستىك وتە جوعارى. ساراپشىلاردىڭ پىكىرىنشە 2021 جىلى تەحنيكالىق جانە تەحنولوگيالىق نارىق جانە باعدارلامالىق شەشىمدەر جاساندى ينتەللەكتىگە باعاتتالادى. سىمسىز عالامتور مەن ساندىق جۇيەلەردىڭ ۇلەسى 35 پايىزعا ارتىپ, 12 ملرد اقش دوللارىنا جەتەدى. 2025 جىلعا قاراي 5G تەحنولوگياسى كاسىپورىندارعا وزدەرىنىڭ مالىمەتتەرىن 70 پايىزعا دەيىن وندەۋگە مۇمكىندىك بەرەدى. قازاقستان جاساندى ينتەلەكتىنى دامىتۋدىڭ جولىن بەلگىلەپ الدى», دەدى قازاقستان پرەزيدەنتى ۇندەۋىندە.
فورۋمدا وڭىرلىك جانە جانە جاھاندىق دەڭگەيدەگى تسيفرلاندىرۋ سالاسى, تسيفرلىق ترانسفورماتسيانىڭ جاڭا ستراتەگيالارى مەن جاڭا تەحنولوگيالار سالاسىنداعى ترەندتەردى قالىپتاستىرۋ, سونداي-اق حالىقارالىق ىنتىماقتاستىقتىڭ الداعى قادامدارى مەن پەرسپەكتيۆالارىن تالقىلايدى.
قازاقستاندىق IT-جوبالاردى قولداۋ جانە جاڭا نارىققا شىعۋ مۇمكىندىگى, وڭىرلىك ارىپتەستەرمەن ىسكەرلىك قاتىناستاردى ىلگەرىلەتۋ جانە تسيفرلاندىرۋ جوبالارىن تانىمال ەتۋ – فورۋمنىڭ نەگىزگى تاقىرىبى. وسى فورۋمدا COVID-19 پاندەمياسىنا بايلانىستى تۋىنداعان جاھاندىق ماسەلەلەر دە نازاردان تىس قالمايدى.
فورۋم بارىسىندا تسيفرلىق جوبالاردىڭ ونلاين كورمەسى ۇيىمداستىرىلدى. سونىمەن قاتار, ەاەو پرەمەر-مينيسترلەرى مەن جەتەكشى حالىقارالىق ساراپشىلاردىڭ قاتىسۋىمەن پلەنارلىق سەسسيا بولادى. فورۋم وففلاين جانە ونلاين فورماتتا وتۋدە. ايتا كەتەيىك, «Digital Almaty» فورۋمى وسىمەن ءتورتىنشى جىل قاتارىنان ۇيىمداستىرىلىپ وتىر.
