راس, بۇل 1960 جىلداردان, ياعني بۇقتىرما سۋ قويماسى سالىنعان ۋاقىتتان بەرى شەشىلمەي كەلە جاتقان كۇرمەۋى قيىن ماسەلە ەدى. اسىرەسە كۇرشىمدىكتەر جاز شىقسا, ەسكى پارومنىڭ توقتاماۋىن تىلەيتىن. جەل تۇرىپ, كول بەتى تولقىسا, كەمەلەر دە قاڭتارىلىپ قالادى. وندايدا جولاۋشىلار جاعادا تۇنەيدى نەمەسە كاتونقاراعاي, التاي اۋداندارى ارقىلى جۇزدەگەن شاقىرىمدى اينالىپ وتۋگە ءماجبۇر بولادى. ال قىستىڭ كۇنى مۇز ويىلىپ, سۋ تۇبىنە كەتكەن كولىكتەر قانشاما؟! كولىكتەن بۇرىن وسى وتكەلدە كوپتەگەن ادامنىڭ ءومىرى دە قيىلعان. ەندى ءساتىن سالسا, بۇل قيىنشىلىقتاردىڭ ءبارى ارتتا قالادى.
كۇنى كەشە كۇرشىمنىڭ كۇرە تامىرى ىسپەتتى كوپىردىڭ قۇرىلىسى رەسمي تۇردە باستالدى. جاعالاۋدا ەرسىلى-قارسىلى اۋىر تەحنيكانىڭ گۇرىلى ەستىلگەندە, جەرگىلىكتى تۇرعىندار بورىكتەرىن اسپانعا اتتى. كوپىر قۇرىلىسىنا سەنەر-سەنبەسىن بىلمەي جۇرگەن ەلدىڭ قۋانىشى قوينىنا سىيمادى. قۇرىلىس باسىندا ء«بىسمىللا» دەپ قۇربان شالىپ, قۇرىلىسشىلارعا ساتتىلىك تىلەستى ءبارى. كوپتىڭ كولدەي تىلەگى قابىل بولسا, ءۇش جىلدان كەيىن حالىق كۇرشىمگە كوپىر ارقىلى قاتىنايدى. شەكارا شەبىندەگى اۋىلداردىڭ دا الەۋەتى ارتادى.
كوپىر قۇرىلىسىنا كىرىسكەن «وبلشىعىسجول» جشس ديرەكتورىنىڭ ورىنباسارى ايدار ماميەۆتىڭ ايتۋىنشا, قازىرگى ۋاقىتتا گەودەزيالىق, ەلەكتر جەلىسىن تارتۋ جۇمىستارى ءجۇرىپ جاتىر. سونىمەن قاتار اۋىر تەحنيكالاردىڭ ءجۇرۋى ءۇشىن ارنايى جول سالىنادى. ازىرشە, العاشقى جۇمىستارعا 5 جۇك كولىگى, 2 بۋلدوزەر, 2 گرەيدەر تارتىلعان. ودان بولەك, كوپىر قۇرىلىسىن جۇرگىزەتىن جۇمىسشىلار ءۇشىن 250 ورىندىق جاتاقحانا مەن قۇرىلىس قالاشىعى بوي كوتەرەدى. جالپى جوبانىڭ قۇنى 32 ملرد تەڭگەنى قۇراپ وتىر. ال قۇيعان اۋىلىنىڭ تۇسىنان شىعاتىن كوپىردىڭ ۇزىندىعى – 1300 مەتر.
