قازىرگى مەتاللۋرگيا كومبيناتىنىڭ العاشقى ىرگەتاسى سوعىس جىلدارىندا قالانعانىمەن الىپقا لايىق تىنىس بىردەن بىتە قويماعان ەدى. 1957 جىلدىڭ اياعىندا قۇرىلىسى شىنداپ قولعا الىنعان اتالعان دومنا پەشىنىڭ ءۇش جىلدان سوڭ جۇمىسقا كىرىسۋگە دايىن بولىپ, شويىن قورىتۋعا ابدەن جارامدىلىعى دالەلدەنگەن ساتىنەن قازاقستان ماگنيتكاسى اتانا باستادى. سودان اتاق-داڭقى الىسقا جاڭعىرىپ, شىعىستاعى مەتاللۋرگيالىق الىپقا اينالدى. ەلباسى ەڭبەك جولى وسىندا باستالدى.
بۇگىندە كوپكە تانىمال ءبىراز ازاماتتارعا شىڭدالۋ مەكتەبى بولدى. وسىناۋ ەلەۋلى وقيعا تەمىرتاۋعا قالا مارتەبەسى بەرىلگەنىنە 65 جىل تولۋىمەن ورايلاس كەلۋى دە مەرەكە ءمانىن ارتتىرا ءتۇسىپ وتىر. سوندىقتان ونى لايىقتى قارسى الىپ, ۇمىتىلماستاي اتاپ وتۋگە بايلانىستى ءىس-شارالار شاھار تۇرعىندارىنىڭ بۇگىندەگى مەرەيلى قارەكەتى. البەتتە, اۋەلى بەينەسىنىڭ ودان سايىن ادەمىلەنۋىنە كوڭىل بولىنگەن. بىزگە قالا اكىمدىگىنەن حابارلانعانداي, دايىندىق جۇمىستارى ساۋلەتتىك ماڭىزى بار عيماراتتاردى ساندەندىرۋ, كوشەلەر مەن اۋلالاردى اجارلاندىرۋ, جولداردى جاڭارتۋ قىزۋ جۇرگىزىلىپ جاتىر. مەتاللۋرگتەردىڭ مادەنيەت سارايى, “جاستار” ءجۇزۋ باسسەينى جوندەلۋ ۇستىندە.
شويىن قورىتۋشىلارعا, بولات بالقىتۋشىلارعا قويىلعان ەسكەرتكىش قايتادان جارقىراپ تۇراتىن بولادى. مەرەكەگە تارتۋ رەتىندە ۇسىنىلار جاڭا نىساندار دا بارشىلىق. جەرگىلىكتى مۇسىلمان قاۋىم سول كۇنى جاڭا مەشىت ەسىگىن اشادى. جاس جۇبايلاردى نەكە سارايى قارسى الادى. 200 ءبۇلدىرشىن بالاباقشادا باس قوسادى. حالىقارالىق ينۆەستيتسيالىق فورۋمعا قاتىسۋشىلاردى بيىل تەمىرتاۋمەن ارنايى تانىستىرۋ وبلىستا وسىمەن ءۇشىنشى رەت وتپەك بۇل القالى كەڭەستىڭ نەگىزگى باعدارلاماسى. مەتاللۋرگيا مەن قۇرىلىس يندۋسترياسىنىڭ جەتەكشى بۋىندارى شوعىرلانعان وندىرىستىك ورتالىقتا شەتەلدىك ينۆەستورلاردى قىزىقتىرارلىق جاعدايلار از ەمەس. سونداي-اق “كەن-مەتاللۋرگيا جانە كومىر ءوندىرۋ سالاسىن دامىتۋ” كورمەسى تانىسۋشىلارعا تارتىمدى بولارى تالاسسىز. سونىمەن كەزىندە نۇرا دالاسىن دۇبىرگە بولەگەن بولاشاق ءوندىرىس الىبى جارتى عاسىرلىق بەلەستە. العاش شويىن قورىتىلعان №1 دومنا پەشى 50 جىلدان كەيىن وسىنداي ءىستىڭ مەرەكەلىك راسىمىنە قاتىساتىنداردى كۇتۋدە.
ايقىن نەسىپباي.
تەمىرتاۋ.
