قازىرگى ۋاقىتتا جەرگىلىكتى اسكەري باسقارۋ ورگاندارى ازاماتتاردى اسكەرگە شاقىرۋ ۋچاسكەلەرىنە تىركەۋدى جۇرگىزەدى, ولاردىڭ سانىن, اسكەري قىزمەتكە جارامدىلىعىن انىقتايدى, ءبىلىم دەڭگەيىن, دەنە دايارلىعىن بەلگىلەيدى.
- جەرگىلىكتى اتقارۋشى ورگانداردىڭ شەشىمىمەن مەديتسينالىق كوميسسيالار قۇرىلدى. جاستارمان لاۋازىمدى تۇلعالار اڭگىمە جۇرگىزىپ, ءتيىستى قۇجاتتاردىڭ بار-جوعىن تەكسەرەدى, سودان كەيىن مەديتسينالىق كۋالاندىرۋدان وتەدى, - دەدى قر قك باس شتابى ۇيىمداستىرۋ-جۇمىلدىرۋ جۇمىستارى دەپارتامەنتىنىڭ وكىلى پودپولكوۆنيك ازامات دوسىموۆ.
بارلىق تەكسەرۋلەردەن كەيىن جاسوسپىرىمدەرگە شاقىرۋ ۋچاسكەسىنە تىركەۋ تۋرالى كۋالىك جازىلىپ, قولىنا ءبىرىنشى اسكەري قۇجات بەرىلەدى.
تىركەۋ ناۋقانى بارىسىندا جاسوسپىرىمدەرگە اسكەري قىزمەتتىڭ ارتىقشىلىقتارى مەن كەلەشەگىن, سونداي-اق قر قورعانىس مينيسترلىگىنىڭ وقۋ ورىندارىنا ءتۇسۋ ەرەجەلەرى جونىندە دە ايتىلادى.
ەستەرىڭىزگە سالا كەتەيىك, ازاماتتاردى شاقىرۋ ۋچاسكەلەرىنە تىركەۋ قازاقستاندا جىل سايىن, قاڭتاردان باستاپ ناۋرىزعا دەيىن ءۇش اي بويى جۇرگىزىلەدى.
وسىعان بايلانىستى قورعانىس مينيسترلىگى اسكەرگە شاقىرۋ جاسىنا دەيىنگى ازاماتتاردىڭ اتا-انالارىن تىركەۋ ناۋقانىنا تۇسىنىستىكپەن قاراۋدى سۇرايدى, - دەپ پودپولكوۆنيك ا. دوسىموۆ اتاپ ءوتتى.
تىركەۋ ناۋقانى سانيتارلىق-ەپيدەميولوگيالىق تالاپتاردى ساقتاۋمەن وتكىزىلەدى.
