كۇرشىم اۋدانىندا 2020 جىلى «جۇمىسپەن قامتۋ جول كارتاسى», «اۋىل - ەل بەسىگى», «نۇرلى جەر», «تازا اۋىز سۋ» مەملەكەتتىك باعدارلامالارى اياسىندا اۋىز تولتىرىپ ايتارلىق جۇمىستار اتقارىلعان. باستى نازار شەكارالىق ايماقتاعى شالعاي اۋىلدى مەكەندەردىڭ الەۋمەتتىك-ەكونوميكالىق الەۋەتىن ارتتىرۋعا باعىتتالدى. ناتيجەسىندە اۋدان بويىنشا وتكەن جىلى جوسپارلانعان 130 جوباعا 7,2 ملرد تەڭگە ءبولىنىپ, سونىڭ ىشىندە مارقاكول ايماعى بويىنشا 2,7 ملرد تەڭگەگە 65 جوبا جۇزەگە استى.
- 2020 جىلى اۋدان ەكونوميكاسىنا 6,8 ملرد. تەڭگە ينۆەستيتسيا تارتىلدى, ءوسىم 56,2% - دى قۇرادى. "بيزنەستىڭ جول كارتاسى-2020" باعدارلاماسى اياسىندا التى كاسىپكەر جىلقى شارۋاشىلىعىن دامىتۋ, ءسۇت ونىمدەرىن ءوندىرۋ تسەحىن اشۋ ءۇشىن 29,0 ملن.تەڭگە سوماسىنا مەملەكەتتىك گرانتتار الدى. قالجىر جانە بوران اۋىلدارىندا سۋ قۇبىرى جەلىلەرىنىڭ قۇرىلىسى اياقتالدى. التى اۋىلدا سۋ تازارتۋ ءۇشىن بلوكتى-ءمودۋلدى ستانتسيالار ورناتىلدى, مارقاكول اۋىلىندا سۋ قۇبىرى جەلىلەرىنە اعىمداعى جوندەۋ جۇرگىزىلدى. 39 شاقىرىم اۋىلارالىق اۆتوموبيل جولدارى جوندەلدى. 7219 ادام ۇيالى بايلانىسپەن قامتاماسىز ەتىلدى, – دەدى كۇرشىم اۋدانىنىڭ اكىمى دۋلات قاجانوۆ.
كەزدەسۋ بارىسىندا اۋدان تۇرعىندارى كوكەيكەستى ساۋالدارىن اۋدان اكىمىنە عانا ەمەس, تىكەلەي ايماق باسشىسىنا قويدى.
- كوپ جىلدار بويى بالىقشى اۋىلدىق وكرۋگىنە كوڭىل بولىنبەي كەلگەن ەدى. ەندى اۋىلىمىز كوركەيىپ كەلەدى. بالىقشىلارعا دا جاعداي جاسالىنعان. ولار رۇقساتتاما قاعازدى ۋاقىتىلى الادى. دەسە دە, وبلىس اكىمى دانيال كەنجەتاي ۇلىنان سۇرايتىنىمىز, اۋىلىمىزعا جاڭا مەكتەپ سالىنسا. سەبەبى, مەكتەپ عيماراتى ەسكى, سوناۋ 1969 جىلى سالىنعان, - دەدى جولنۇسقاۋ اۋىلىنىڭ تۇرعىنى چايسولتان سارسەكوۆ.
سونىمەن قاتار, تۇرعىندار ۇيالى بايلانىس پەن ينتەرنەت ساپاسى, قالجىر اۋىلىنا گاز قۇبىرىن تارتۋ, مارقاكول اۋرۋحاناسىن جابدىقتاۋ سياقتى وزەكتى تاقىرىپتاردى تىلگە تيەك ەتتى. كۇرشىمدىكتەر كوپىر ماسەلەسىن دە نازاردان تىس قالدىرمادى.
- كۇرشىم اۋدانى وبلىستىڭ الەۋمەتتىك ماڭىزى بار اۋداندارىنىڭ ءبىرى. وتكەن جىلى اۋدان كولەمىندە اۋقىمدى جۇمىستار اتقارىلدى. شقو-نىڭ شالعايدا جاتقان اۋداندارىن وبلىس ورتالىعىمەن بايلانىستىراتىن بۇقتىرما سۋ قويماسى ارقىلى وتەتىن كوپىردىڭ قۇرىلىسىنا وبلىستىق بيۋدجەتتەن 1 ملرد تەڭگە ءبولىندى. مەردىگەر كومپانيا وتكەن جىلى بەلگىلى بولعان. بيىل كوپىر قۇرىلىسىن باستايمىز. سونىمەن قاتار, اۋدانداننىڭ شالعاي اۋىلدىق مەكەندەرىندە مەكتەپ تاپشىلىعى بايقالادى. سول سەبەپتى مەكتەپ قۇرىلىسى قولعا الىندى. ماسەلەن, ۇرىنقاي اۋىلىنىڭ مەكتەبىنىڭ جوبالىق-سمەتالىق قۇجاتتاماسى وسى ايدا تالداۋدان شىعادى, قۇرىلىسىن جۋىق ارادا باستايمىز. ال, بالىقشىداعى مەكتەپ جاعدايىن جاقىن ارادا قاراستىرامىز, - دەدى دانيال احمەتوۆ.
وتكەن جىلى كۇرشىم جانە قالجىر اۋىلدارىندا ەكى پاتەرلى 15 تۇرعىن ءۇي بوي كوتەردى. مادەني وشاقتار مەن اۋرۋحانالار كۇردەلى جوندەۋدەن ءوتتى. كۇرشىم اۋىلىنداعى ورتالىق الاڭ اباتتاندىرىلىپ, اباي ەسكەرتكىشى, ءان شىرقايتىن سۋبۇرقاق, ءتورت بالالار ويىن الاڭى ورناتىلدى. مارقاكول اۋىلىندا سۋبۇرقاق پەن اباي ەسكەرتكىشى, شاعىن فۋتبول الاڭى, سونداي-اق ويىن جانە سپورت الاڭى بوي كوتەردى. كۇرشىم اۋىلىنداعى جابىق باسسەيننىڭ قۇرىلىسى اياقتالىپ, قالجىر اۋىلىنداعى سپورت مودۋلىندە قۇرىلىس جۇمىستارى باستالدى.
ايتا كەتۋ كەرەك, كۇرشىم اۋدانى بويىنشا كوروناۆيرۋس ىندەتىمەن كۇرەس باعىتىندا ايتارلىقتاي جۇمىس اتقارىلۋدا. اۋدانعا وتتەگى ستانتسياسى جانە 50 وتتەگى نۇكتەسى بار ماگيسترال ورناتىلدى. 23 بىرلىك وتتەگى كونتسەنتراتورى مەن 4 ءوجج اپپاراتى ساتىپ الىندى. بيىل كۇرشىم اۋداندىق اۋرۋحاناسىن II, ال مارقاكول اۋىلدىق اۋرۋحاناسىن I-دەڭگەيگە كوتەرۋ جوسپارلانىپ وتىر. ول ءۇشىن قاجەتتى قۇرال-جابدىقتار الۋعا 250 ملن تەڭگە جوسپارلانعان.
