"دەنە شىنىقتىرۋ جانە سپورت" ماماندىعى بويىنشا وقىپ جاتقان 2 كۋرس ستۋدەنتى ارتەم بوروۆيكوۆ ەرتىس وزەنىنە باتىپ بارا جاتقان 61 جاستاعى ايەلدى قۇتقارىپ قالعانىن وسكەمەندىكتەر جاقسى بىلەدى. ارتەم يۋرەۆيچ كۇننىڭ سۋىعىنا, وزەننىڭ اعىسىنا قاراماستان كەيۋانانى قۇتقارۋ ءۇشىن ەرتىسكە قويىپ كەتكەن. ايتۋىنشا, قارت انانى جاعاعا الىپ شىعۋ وڭايعا سوقپاعان. اعىندى سۋداعى ارپالىستا انا جۇرەك: «بالام, جىبەرە سال, ءوزىڭ دە سۋعا باتاسىڭ عوي» دەپ داۋىستاپتى. دەسە دە, ارتەم امان الىپ قالعان.
بۇل دا باتىرلىق. وسىنى ەسكەرگەن وقۋ ورنىنىڭ باسشىلىعى ارتەم بوروۆيكوۆتى سارسەن امانجولوۆ اتىنداعى ۋنيۆەرسيتەت مەدالىمەن ماراپاتتاپ, اباي اتىنداعى ستيپەنديا ۇسىندى.
– ۋنيۆەرسيتەتتىڭ عىلىمي كەڭەسى ارتەمنىڭ بارلىق وقۋ كەزەڭىنە گرانت بەكىتتى. سونىمەن قاتار, باكالاۆرياتتا وقۋدى اياقتاعاننان كەيىن ماگيستراتۋرادا وقۋىن جالعاستىرۋعا جول اشىلدى. 70-جىلدىق تاريحى بار ۋنيۆەرسيتەتىمىز ستۋدەنتتىڭ ەرلىگىن ماقتان تۇتادى, دەدى س.امانجولوۆ اتىنداعى ۋنيۆەرسيتەتتىڭ رەكتورى مۇحتار تولەگەن.
جۋىقتا وسكەمەن قالاسى پوليتسيا باسقارماسىنىڭ باستىعى اندرەي مۋلا دا ارتەمعا باعالى سىيلىق پەن ماقتاۋ قاعازىن تابىس ەتكەن. ول ستۋدەنتتىڭ ەرلىگى جاستارعا ۇلگى ەكەنىن ەرەكشە اتاپ ءوتتى.
