كوكشەتاۋ قالاسىنداعى قاردى تازالاۋ مىندەتى «كوكشە تازالىق» پەن «زەرەن-2006» كوممۋنالدىق مەكەمەلەرىنە جۇكتەلگەن. الايدا, قوس مەكەمە بار كۇش-مۇمكىندىكتەرىن جۇمىلدىرعانىمەن, مول جاۋعان قارعا شامالارى كەلەر ەمەس. بۇرناعى جىلدارى نەبىر قارلى بوراندا ءۇش-ءتورت كۇننىڭ ىشىندە وبلىس ورتالىعىن تازالاپ ۇلگەرەتىن. بيىلعى بەرەكەسىزدىكتىڭ جولىن كەسۋ ءۇشىن وبلىس اكىمى ەرمەك مارجىقپاەۆ قار تازالاۋ جۇمىسىن ءۇش اۋىسىممەن ۇيىمداستىرۋدى تالاپ ەتىپ وتىر. قالالىق تۇرعىن ءۇي-كوممۋنالدىق شارۋاشىلىق ءبولىمىنىڭ باسشىسى يۋري شيدلوۆسكيگە مەردىگەرلەردىڭ ءوز مىندەتتەرىن تاپ-تۇيناقتاي ەتىپ اتقارماعانى ءۇشىن ەسكەرتۋ جاسالدى. قالا ىرگەسىندەگى «قۇلاگەر» شاعىن اۋدانىنداعى قاسات قار تاۋ-تەڭىز. قار قۇرساۋىندا قالعان شاعىن اۋداننىڭ تۇرعىندارى ءۇشىن قارعا ادىم جەر مۇڭ بولىپ, ۇيلەرىنەن شىعا الماي قالدى دەسە دە بولادى.
– تىرشىلىك بولعان سوڭ قامالىپ ۇيدە وتىرا المايسىڭ عوي. بىرەۋ – جۇمىسقا, بىرەۋ اۋرۋحاناعا بارعىسى كەلەدى. مەنىڭ دە جۇبايىم سىرقاتتانىپ جاتىر, بىراق, ءبىزدىڭ شاعىن اۋدانعا جەدەل جاردەم كولىكتەرى جەتە الماي, جىگەرىمىزدى قۇم قىلىپ وتىر, دەيدى شاعىن اۋدان تۇرعىنى جەڭىس ناۋرىزوۆ, – بىلتىر تازالاپ تۇراتىن, بيىلدىققا قار تازالايتىن تەحنيكانىڭ قاراسىن كورە الماي وتىرمىز.
وڭىردەگى كۇرە جولداردىڭ دا جاعدايى وڭىپ تۇرعان جوق. ماسەلەن, كوكشەتاۋ-ششۋچينسك باعىتىنداعى رەسپۋبليكالىق ماڭىزعا يە جولدىڭ جاي-كۇيىنە «كازاقاۆتوجول» كومپانياسىنىڭ №6 ۋچاسكەسى جاۋاپتى. كولىك اعىنى مەن جولدىڭ ماڭىزىنا وراي بەس دەڭگەيگە بولىنگەن. تيىسىنشە, تاس جول ەكى ساعات ىشىندە تازارتىلۋعا ءتيىستى. ايتسە دە, بۇل تۇستا دا جولاۋشىلاردىڭ وكپەسىن قارا قازانداي ەتەتىن جاي بار. قاپىدا قالعان جۇرگىزۋشى قانشاما.
– جەدەل ارەكەت ەتۋ ماقساتىندا دەپارتامەنتتىڭ جەكە قۇرامى تولىق كۇشەيتىلگەن جۇمىس ىرعاعىنا كوشتى, دەيدى وبلىستىق توتەنشە جاعدايلار جونىندەگى دەپارتامەنتتىڭ باستىعى نۇرلان اتىعاەۆ, – جول تالعامايتىن 96 كولىك دايىن تۇر. قار قۇرساۋىندا قالۋى مۇمكىن, جالپى كولەمى مىڭ شاقىرىمدى قۇرايتىن 390 ۋچاسكە انىقتالىپ, جىلىتۋ بەكەتتەرى ورناتىلدى. قازىر وبلىستىق جانە رەسپۋبليكالىق ماڭىزداعى جولداردا 890 تەحنيكا ساقاداي ساي.
قىس تۇسكەننەن بەرى قۇتقارۋشىلار جولدا قالعان 48 جولاۋشىعا قول ۇشىن بەرگەن. نەگىزىنەن, وبلىستا قاردىڭ قاسىرەتىن تارتىپ وتىرعاندار – ەرەيمەنتاۋ جانە تسەلينوگراد اۋداندارى.
وبلىس ورتالىعىنىڭ ءوزى ومبى قارعا وڭباي باتىپ جاتقاندا, شالعايداعى شاعىن اۋىلداردىڭ شارۋاسى شاتقاياقتاعان-اق شىعار.
اقمولا وبلىسى
