شتابتىق جاتتىعۋلار بارىسىندا شەشىم قابىلداۋ, وپەراتسيالاردى جوسپارلاۋ, اسكەري باسقارۋ ورگاندارىن ۇيلەستىرۋ, ءوزارا ءىس-قيمىلدى ۇيىمداستىرۋ جانە ءىس-شارالاردى جان-جاقتى قامتاماسىز ەتۋ مىندەتتەرى ورىندالدى.
«باتىس», «استانا» وڭىرلىك قولباسشىلىقتارىنىڭ باسقارماسىندا جانە دەسانتتىق-شابۋىلداۋ اسكەرلەرىندە ارنايى اسكەري وپەراتسيانى ازىرلەۋ ماسەلەلەرى پىسىقتالدى. ء«بىز شتابتىق جاتتىعۋ بارىسىندا قازىرگى زامانعى قارۋلى قاقتىعىستاردىڭ تاجىريبەلەرىن قاراستىردىق, جاۋىنگەرلىك ءىس-قيمىل بارىسىن جانە ۇشقىشسىز ۇشۋ قۇرىلعىلارىنىڭ ەرەكشەلىگىن تالدادىق. باسقا اسكەري قۇرىلىمدارمەن ءوزارا ءىس-قيمىل ماسەلەلەرىن پىسىقتادىق. وتكەن جاتتىعۋدا نەگىزگى ماقساتقا قول جەتكىزىلىپ, تاپسىرمالار ورىندالدى دەپ ويلايمىن», دەدى دەسانتتىق-شابۋىلداۋ اسكەرلەرىنىڭ قولباسشىسى, گەنەرال-مايور قانىش ابۋباكىروۆ.
بۇدان وزگە, ۇقك شەكارا قىزمەتىنىڭ باسقارۋ ورگاندارىمەن, ءىىم ۇلتتىق ۇلانمەن ءوزارا ءىس-قيمىل ماسەلەلەرى پىسىقتالدى. «كەز كەلگەن وقيعاعا ارقاشان دايىن بولۋ كەرەك. وسىنداي جاتتىعۋلاردى وتكىزۋ كەزىندە قارۋلى كۇشتەردىڭ, باسقا دا اسكەرلەر مەن اسكەري قۇرالىمداردىڭ بىرلەسكەن ءىس-قيمىلىنىڭ ۇيلەسىمدىلىگى تەكسەرىلەدى», دەدى «شىعىس» وڭىرلىك قولباسشىلىعى اسكەرلەرى قولباسشىسىنىڭ شتاب باستىعى, پولكوۆنيك قۋانىشبەك ۇشتاەۆ.
اتالعان ءىس-شارالار جەدەل قۇجاتتاردى ازىرلەۋ جانە جەدەل-تاكتيكالىق ەسەپتەردى جۇرگىزۋ جونىندە پراكتيكالىق داعدىلاردى دامىتۋعا ىقپال ەتتى. ولار بىرىڭعاي كەشەندى ستراتەگيالىق مىندەتتەر اياسىندا شۇعىل ءوتتى.
