- بۇگىن قازاق ءباسپاسوزى, جالپى, ۇلتتىق جۋرناليستيكا ءۇشىن ايرىقشا كۇن دەسەك, ارتىق بولا قويماس. سەبەبى, ءدال بۇگىن ەل گازەتى «ەگەمەننىڭ» وتىز مىڭىنشى ءنومىرى جارىق كورىپ وتىر. وسى ءبىر مەرەيلى مەجەمەن ەگەمەنقازاقستاندىقتاردى شىن جۇرەكتەن قۇتتىقتايمىن, - دەدى ماۋلەن اشىمباەۆ.
سەنات توراعاسى عاسىرلىق شەجىرەسى بار باس باسىلىمنىڭ ءار ءنومىرى ۇلت تاريحىنىڭ ءبىر پاراعى دەۋگە بولاتىنىن ايتتى.
- وتانىمىزدىڭ بارلىق جەتىستىگى مەن جەڭىسى, قوعامداعى وزەكتى ماسەلەلەر, ەلدىڭ كۇندەلىكتى تىنىس-تىرشىلىگى گازەت بەتتەرىنەن ءبىر ساتكە دە قالىس قالعان ەمەس. الاش ارىستارىنىڭ جانە عابيت مۇسىرەپوۆ, شەرحان مۇرتازا, ءابىش كەكىلباي ۇلى سياقتى قازاقتىڭ ءبىرتۋار قايراتكەرلەرىنىڭ قولتاڭباسى قالعان باسىلىم, شىن مانىندە, «حالىقتىڭ كوزى, قۇلاعى ءھام ءتىلى» رەتىندە ءوز مىندەتىن ۇلكەن ابىرويمەن اتقارىپ كەلەدى. ادەبيەتىمىز بەن مادەنيەتىمىزدى, ۇلتتىق رۋحانياتىمىز بەن اسىل قۇندىلىقتارىمىزدى جانە ءبىلىم مەن عىلىمدى دارىپتەۋ جولىندا دا «ەگەمەننىڭ» ورنى بولەك, - دەدى ول.
بۇگىنگى ساندا مىڭىنشى, بەس مىڭىنشى, ون مىڭىنشى جانە جيىرما مىڭىنشى ءنومىردىڭ قالاي شىققانى تۋرالى دەرەكتى ماتەريالدار بەرىلگەن ەكەن. شەراعاڭنىڭ باسشىلىعىمەن جارىق كورگەن جيىرما مىڭىنشى ءنومىر تاۋەلسىزدىككە ءۇش اي قالعاندا, ياعني 1991 جىلعى قىركۇيەكتە باسىلسا, وتىز مىڭىنشى ءنومىر ازاتتىقتىڭ 30 جىلدىعىمەن تۇسپا-تۇس كەلىپ وتىر. مۇنىڭ ءوزى ەرەكشە اتاپ وتەرلىك جايت, دەگەن سەنات سپيكەرى قازىرگى تاڭدا دارحان قىدىرالى باستاعان باس باسىلىم «قازاق ءباسپاسوزىنىڭ قارا شاڭىراعى» دەيتىن برەندتى ابىرويمەن ساقتاپ كەلە جاتقانىن دا تىلگە تيەك ەتتى.
- «ەگەمەننىڭ» وسى بيىكتەن تومەندەمەي, بەدەلى ودان ءارى ارتا بەرۋىنە تىلەكتەسپىز. گازەت اتىنا زاتى ساي بولىپ, ەگەمەندىگىمىزدىڭ ەڭسەلى بولۋىنا ءوز ۇلەسىن قوسا بەرسىن, - دەدى ماۋلەن اشىمباەۆ.
