ايماقتار • 01 اقپان، 2021

شىعىس قازاقستانعا ۆاكتسينانىڭ 1300 دوزاسى جەتكىزىلدى

25 رەت كورسەتىلدى

مەملەكەت باسشىسى قاسىم-جومارت توقاەۆتىڭ تاپسىرماسى بويىنشا 1 اقپاننان باستاپ قازاقستاندا «سپۋتنيك V» كوروناۆيرۋسىنا قارسى رەسەيلىك پرەپاراتپەن ەرىكتى تۇردە ۆاكتسينالاۋ باستالدى، دەپ حابارلايدى Egemen.kz

وسكەمەندە العاشقى ەكپەنى شقو سسك وكىلى قانات تۇرديەۆ پەن «انا مەن بالا ورتالىعى» شجق كمك باس دارىگەرى ەرمەك وماربەكوۆ، سەمەيدە شقو دەنساۋلىق ساقتاۋ باسقارماسى باسشىسىنىڭ ورىنباسارى دۋمان بەرىك ۇلى جانە «وبلىستىق پەريناتالدىق ورتالىعى» شجق كمك باس دارىگەرى ارقات دايىربەكوۆ الدى.

«پاندەميا ءبىزدىڭ ءومىر سالتىمىزدى ايتارلىقتاي وزگەرتتى. ول ءبارىمىزدى وزگەرتتى. بىراق ەگەر ءبىز ۇيرەنشىكتى ءومىر سالتىمىزعا ورالىپ، كينوتەاترلار مەن تەاترلارعا بارعىمىز كەلسە، ەڭ باستى 2 شارتتى، اتاپ ايتقاندا، ۆاكتسينا الۋىمىز جانە قر باس مەملەكەتتىك سانيتاريالىق دارىگەرىنىڭ بارلىق نۇسقاۋلارىن ورىنداۋىمىز قاجەت. سوندا ءبىز قالىپتى ومىرگە ورالا الامىز. ءبىز بىرگەمىز! ءبىز بۇل پاندەميانى بىرگە جەڭەمىز دەپ ەسەپتەيمىن»، دەدى ەرمەك وماربەكوۆ.

بۇگىندە شقو-عا 1300 دوزا ۆاكتسينا جەتكىزىلدى (650 وسكەمەن قالاسىندا، 650 سەمەي قالاسىندا). العاشقى ۆاكتسينانى وسكەمەن جانە سەمەي قالالارىنىڭ ەمحانالارى الادى.

وبلىستىڭ دەنساۋلىق ساقتاۋ باسقارماسىنىڭ مالىمەتى بويىنشا اقپان ايىنىڭ باسىندا ۆاكتسينالاردى تاسىمالداۋ جانە ساقتاۋ ءۇشىن مەديتسينالىق ۇيىمدارعا 16 بيومەديتسينالىق مۇزداتقىش پەن كوپ رەت قولدانىلاتىن تەرموتىركەگىشتەرى بار 60 تەرموكونتەينەر قوسىمشا ساتىپ الىنادى.

ۆاكتسينا سالۋعا پروفيلاكتيكالىق ەگۋگە قارسى كورسەتىلىمدەرى جوق ادامدار جىبەرىلەدى. ولار الار الدىندا دارىگەردىڭ مىندەتتى تەكسەرىسىنەن وتەدى. مونيتورينگ جانە ادىستەمەلىك كومەك كورسەتۋدى ۇيىمداستىرۋ ءۇشىن جۇمىس كوميسسياسى قۇرىلدى.

سوڭعى جاڭالىقتار

جىل ءسوزى

الەم • كەشە

ۇقساس جاڭالىقتار