تۇرعىن ءۇي ماسەلەسىنە قاتىستى جالپى 389 پىكىر قالدىرىلعان. قالا اكىمى تۇرعىندار تاراپىنان كوتەرىلگەن سۇراقتارعا جاۋاپ بەرىپ, سالادا اتقارىلعان جۇمىستار جانە الداعى جوسپارلاردان حاباردار ەتتى.
شىمكەنت قالاسىندا بۇگىندە تۇرعىن ءۇي كەزەگىندە 42 269 ادام تىركەلگەن. سوڭعى ءۇش جىلدا كەزەكتە تۇرعان ادام سانى 10 389-عا ارتتى. تۇرعىن ءۇي كەزەگىنە تۇرۋدىڭ ءوز تالاپتارى مەن شارتتارى بار. كەزەككە تۇرۋعا نيەتتى ازاماتتار بەلگىلەنگەن ساناتتاردىڭ بىرىنە ەنۋ قاجەت. سوڭعى 3 جىل كولەمىندە شىمكەنت قالاسىندا تىركەلگەن بولۋى, سوڭعى 5 جىل كولەمىندە اتىندا تۇرعىن ءۇي تىركەلمەۋى شارت.
2020 جىلدىڭ قورىتىندىسى بويىنشا قالادا ارەندالىق نەگىزدە 1596 پاتەر بەرىلدى. بيىل جوسپار بويىنشا ارەندالىق نەگىزدە 976 پاتەر تاپسىرىلادى (كوپبالالى وتباسىلارعا – 378, حالىقتىڭ الەۋمەتتىك ءالسىز توبىنا – 238, جۇمىس ىستەيتىن جاستارعا – 300, جەتىم جانە اتا-اناسىنىڭ قامقورلىعىنسىز قالعان بالالارعا - 60). 2021 جىلى «جاستار» باعدارلاماسى بويىنشا 3648 ءوتىنىم كەلىپ تۇسكەن. 300 پاتەردى «جاڭا تۇرلان», «تۇران», «اسار 2» شاعىناۋداندارىنان بەرۋ جوسپارلانعان.
«نۇرلى جەر»باعدارلاماسىنىڭ كرەديتتىك باعىتى بويىنشا وتكەن جىلى 2614 پاتەر بەرىلدى. سوڭعى ءۇش جىلدا 3764 وتباسى پاتەر كىلتىن يەلەنگەن. وسى جىل جوسپار بويىنشا كرەديتتىك نەگىزدە 2186 پاتەر بەرۋ جوسپاردا: 350 پاتەر – «2-10-20» («باقىتتى وتباسى»), 1728 پاتەر – «5-10-20» («شاڭىراق» پيلوتتىق باعدارلاماسى) جانە 108 پاتەر – «7-20-25» باعدارلاماسى.
– حالىققا قولجەتىمدىلىكتى ارتتىرۋ جانە تۇرعىن ءۇي بەرۋ سالاسىندا سىبايلاس جەمقورلىققا جول بەرمەۋ ماقساتىندا اكىمدىك تاراپىنان قىزمەتتەردى اۆتوماتتاندىرۋ جۇمىستارى باستى نازارعا الىنىپ وتىر. تۇرعىن ءۇي بەرۋ جولدارىن حالىق اراسىندا كەڭىنەن ناسيحاتتاۋ ءۇشىن مەديا جوسپار بەكىتىلەدى. بۇگىندە تۇرعىن ءۇي كەزەگىن E-gov پورتالىنان جانە تۇرعىن ءۇي باسقارماسىندا اشىلعان وزىنە ءوزى قىزمەت كورسەتۋ بۇرىشىنان بىلۋگە بولادى. سونداي-اق, جۇمىسپەن قامتۋ ورتالىقتارىندا وسىنداي قىزمەت بۇرىشتارىن اشۋدى تاپسىردىم, – دەدى قالا اكىمى.
ەفير سوڭىندا قالا اكىمى تۇرعىنداردى ساقتىق شارالارىنا ءمان بەرۋگە شاقىرا كەلە, كەلەسى اپتاداعى ەفير تاقىرىبىن تۇرعىنداردىڭ تاڭداعانىن قالادى. ياعني قوعامداعى كوپ قوردالانعان تاقىرىپتى حالىق ءوزى تاڭداماق.
