بجزق-نىڭ حابارلاۋىنشا كەلىپ تۇسكەن وتىنىمدەر 5 جۇمىس كۇنى ىشىندە «وتباسى بانكى» اق-داعى سالىمشىلاردىڭ ارنايى شوتتارىنا اۋدارىلادى. اۋدارىمنىڭ ورتاشا سوماسى 5,5 ملن تەڭگە. بجزق زاڭناما تالاپتارىنا سايكەس كەلمەيتىن 2 578 ءوتىنىمدى (27 پايىز) قابىلداماي تاستاعان. بۇل ورايدا قور وتىنىمدەردى قابىلداماۋدىڭ نەگىزگى سەبەپتەرىن اتايدى.
ءوتىنىش بەرۋشىنىڭ الۋعا قولجەتىمدى زەينەتاقى جيناعى جوق (قابىلدانباعان وتىنىمدەردىڭ 42 پايىزى), سۇرالىپ وتىرعان سوما زەينەتاقى جيناقتارىنىڭ الۋعا بولاتىن سوماسىنان اسىپ تۇسەدى (38,2 پايىز), بۇرىن بەرىلگەن ءوتىنىم بويىنشا قايتا بەرىلگەن سۇرانىستار (19,4 پايىز), ءوتىنىش بەرۋشىنىڭ بجزق-دا زەينەتاقى جيناعى مۇلدە جوق (0,4 پايىز).
«زەينەتاقى جيناقتارى تۋرالى اقپارات «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» قر زاڭىنىڭ تالاپتارىنا سايكەس زەينەتاقى جيناقتارىنىڭ قۇپياسىن قامتاماسىز ەتۋ ماقساتىندا سالىمشىنىڭ وزىنە عانا بەرىلەدى.
قولجەتىمدى سوما تۋرالى اقپاراتتى enpf.kz سايتىنداعى جەكە كابينەتتەن نەمەسە بىرىڭعاي جيناقتاۋشى زەينەتاقى قورىنىڭ موبيلدىك قوسىمشاسى ارقىلى ۋاكىلەتى وپەراتورعا بىرجولعى زەينەتاقى تولەمدەرىن الۋعا تىكەلەي ءوتىنىم بەرەر الدىندا مۇقيات تەكسەرۋگە كەڭەس بەرەمىز. سالىمشىنىڭ بجزق-دا جەتكىلىكتىلىك شەگىنەن اساتىن سوماسى بولعان جاعدايدا, ونى پايدالانۋعا ءوتىنىم شەكسىز رەت بەرىلۋى مۇمكىن. ەگەر قانداي دا ءبىر سەبەپپەن (تولتىرۋ كەزىندەگى قاتەلەر, دۇرىس كورسەتىلمەگەن سومالار, تولەۋگە قولجەتىمدى سومانىڭ وزگەرۋى جانە ت. ب.) سالىمشىعا بىرجولعى زەينەتاقى تولەمىن الۋعا ارنالعان ءوتىنىمدى قاناعاتتاندىرۋدان باس تارتىلسا, وندا باس تارتۋ سەبەبىن جويىپ, ۋاكىلەتتى وپەراتورعا قايتادان ءوتىنىم بەرۋگە بولادى. ەگەر سالىمشى ءوز جيناقتارىن ءارتۇرلى ماقساتتارعا پايدالانعىسى كەلسە, وندا الۋعا بولاتىن سوما شەگىندە وسى ماقساتتارعا جەكە وتىنىمدەر بەرۋگە بولادى» دەلىنگەن قوردىڭ رەسمي سايتىنداعى حابارلامادا.
