باسقوسۋعا مادەنيەت جانە سپورت ۆيتسە-ءمينيسترى نۇرعيسا داۋەشوۆ, مادەنيەت جانە سپورت مينيسترلىگىنىڭ مادەنيەت جانە ونەر ىستەرى دەپارتامەنتىنىڭ ديرەكتورى كۇمىس سەيىتوۆا, قازاقستان جازۋشىلار وداعىنىڭ توراعاسى ۇلىقبەك ەسداۋلەت, جازۋشىلار وداعى باسقارما توراعاسىنىڭ ءبىرىنشى ورىنباسارى اقبەرەن ەلگەزەك, قازاقستان تەاترلارى اسسوتسياتسياسىنىڭ اتىنان ليۋبوۆ ني, تەاتر قايراتكەرلەرى وداعىنىڭ توراعاسى تۇڭعىشباي جامانقۇلوۆ, سۋرەتشىلەر وداعىنىڭ توراعاسى ومىربەك جۇبانيازوۆ, كومپوزيتورلار قاۋىمداستىعىنىڭ توراعاسى ارتىق توقسانباەۆ, ديزاينەرلەر وداعىنىڭ توراعاسى قامباربەك كوشەنوۆ, كۇيشىلەر وداعىنىڭ توراعاسى اسقار كەنجەعاليەۆ, ايتىس اقىندارى مەن جىر, تەرمەشىلەردىڭ حالىقارالىق وداعىنىڭ توراعاسى ءجۇرسىن ەرمان, قولونەرشىلەر وداعىنىڭ وكىلى ايجان بەكقۇلوۆا, «گيلديا كريتيكوۆ» قوعامدىق بىرلەستىگىنىڭ توراعاسى ەرفات مامبەكوۆ, حورەوگرافتار وداعىنىڭ توراعاسى دۇيسەنبەك ناقىپوۆ, حور ديريجەرلارى وداعىنىڭ وكىلى جىبەك مولداكارىموۆا جانە وزگە دە وداق وكىلدەرى قاتىستى.
جيىندا اقتوتى رايىمقۇلوۆا وداق وكىلدەرىمەن مينيسترلىك جانە شىعارماشىلىق وكىلدەرى اراسىنداعى جۇمىس, مەملەكەتتىك الەۋمەتتىك تاپسىرىس اياسىندا جۇزەگە اسىرىلاتىن كونكۋرستارعا قاتىسۋ جايىن تالقىلادى.
مينيستر ءوز سوزىندە بۇگىنگى كەزدەسۋدىڭ ماقساتى شىعارماشىلىق وداق وكىلدەرىنە مەملەكەت تاراپىنان كورسەتىلەتىن قولداۋ ماسەلەسىن ءتۇسىندىرىپ ءوتۋ ەكەنىن ايتتى.
«قازىر ەلىمىزدە مادەنيەت جانە ونەر سالاسىنىڭ 8 مىڭنان استام وكىلىن (جازۋشى, ديزاينەر, كومپوزيتور, مۋزىكا جانە تەاتر قايراتكەرى, حورەوگراف, كينەماتوگرافيست, ساۋلەتشى, قولونەر شەبەرى, سۋرەتشى جانە ت.ب.) بىرىكتىرەتىن 16 رەسپۋبليكالىق جانە بىرقاتار وڭىرلىك شىعارماشىلىق وداق جۇمىس ىستەيدى. وسى ۋاقىتقا دەيىن وزدەرىڭىزبەن مادەني باعدارلامالاردى, ءتۇرلى ءىس-شارالاردى بىرلەسە اتقارىپ كەلەمىز.
وسى رەتتە مينيسترلىك ايتىسكەرلەر وداعىمەن رەسپۋبليكالىق ايتىستى, كينەماتوگرافيستەر وداعىمەن ەۋرازيا حالىقارالىق كينوفەستيۆالىن, تەاتر وداعىمەن «ساحناگەر» ۇلتتىق تەاترىنىڭ فورۋم فەستيۆالىن, سۋرەتشىلەر وداعىمەن سۋرەت كورمەلەرىن,ساۋلەتشىلەر وداعىمەن حالىقارالىق ساۋلەتشىلەر سەزىن وتكىزۋگە قولداۋ كورسەتكەنىن ايتۋعا بولادى.
مەملەكەت باسشىسى قاسىم-جومارت توقاەۆتىڭ شىعارماشىلىق وداقتاردى قولداۋدىڭ جۇيەلى شارالارىن قابىلداۋعا قاتىستى تاپسىرماسىنا سايكەس, مەملەكەتتىك الەۋمەتتىك تاپسىرىس اياسىندا مادەنيەت سالاسىنداعى شىعارماشىلىق وداقتاردى قولداۋ قاراستىرىلدى.
شىعارماشىلىق وداقتار قولدانىستاعى زاڭناما سايكەس ۇكىمەتتىك ەمەس ۇيىمعا ارنالعان مەملەكەتتىك الەۋمەتتىك تاپسىرىس, گرانتتار مەن سىيلىقتار ورنالاستىرۋ جونىندەگى كونكۋرستارعا قاتىسا الادى.
وسى رەتتە مينيسترلىك مەملەكەتتىك تاپسىرىس اياسىندا شىعارماشىلىق وداقتاردىڭ جوبالالارىن قولداۋ ماقساتىندا قارجى ءبولىپ, قولدانىستاعى زاڭناماعا سايكەس كونكۋرس جاريالادى. الايدا, كوروناۆيرۋس پاندەمياسىنا بايلانىستى ءبىراز ءىس-شارا وتپەدى, كەيبىرى ونلاين فورماتقا اۋىستى.
سونىمەن قاتار وزدەرىڭىزگە بەلگىلى بولعانداي ەشبىر شىعارماشىلىق ۇيىم ۇسىنعان قۇجاتتار تالاپقا ساي كەلمەگەندىكتەن كونكۋرس وتپەدى دەپ تانىلدى. دەگەنمەن مينيسترىك تاراپىنان الداعى ۋاقىتتا دا سىزدەردى قولداۋعا باعىتتالعان شارالار جالعاسىن تابادى»,-دەدى اقتوتى رايىمقۇلوۆا.
وسىدان كەيىن ءسوز العان نۇرعيسا داۋەشوۆ مينيسترلىك ءاردايىم وداقتارعا قولداۋ كورسەتۋگە دايىن ەكەنىن, بۇگىن قول قويىلعان ەكى جاقتى مەموراندۋم اياسىندا بىرلەسە جۇمىس ىستەيتىنىن جەتكىزدى. ال كۇمىس سەيىتوۆا مەملەكەتتىك الەۋمەتتىك تاپسىرىس اياسىندا جوبالاردى ىسكە اسىرۋ بويىنشا ءتۇسىندىرىپ ءوتتى.
