بۇل تۋرالى ءباسپاسوز ءماسليحاتى بارىسىندا شقو دەنساۋلىق ساقتاۋ باسقارماسى باسشىسىنىڭ ورىنباسارى ۆلاديمير لي ءمالىم ەتتى.
«ەلىمىزدە سوڭعى ەكى ايدا ەپيدەميولوگيالىق جاعداي ناشارلاپ كەتتى. قازاقستان كوروناۆيرۋس جۇقتىرۋ كورسەتكىشى بويىنشا «قىزىل» ايماققا كىردى. بىراق شىعىس ءوڭىرى ازىرشە «جاسىل» ايماقتا تۇر. قاۋىپتى دەرتتىڭ تارالۋىن ازايتۋ ءۇشىن كوپتەگەن شارالار قابىلدانۋدا. ونىڭ ىشىندە 1 اقپاننان باستالاتىن ۆاكتسيناتسيا كوروناۆيرۋس ينفەكتسياسىن جۇقتىرعانداردى تومەندەتۋگە جانە شەكتەۋ شارالارىن جەڭىلدەتۋگە مۇمكىندىك بەرەدى», دەدى ول.
«قر حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىنىڭ 77-بابىنا سايكەس كەز كەلگەن مەديتسينالىق پروتسەدۋرا, ونىڭ ىشىندە ۆاكتسيناتسيا ەكپە سالىناتىن ازاماتتاردىڭ كەلىسىمىمەن عانا جۇرگىزىلەدى.
«قازىرگى ۋاقىتتا دايىندىق ءجۇرىپ جاتىر. اقپان ايىنىڭ باسىندا ۆاكتسينالاردى تاسىمالداۋ جانە ساقتاۋ ءۇشىن وبلىستىڭ بارلىق مەديتسينالىق مەكەمەلەرىنە 16 بيومەديتسينالىق مۇزداتقىش پەن كوپ رەت قولدانىلاتىن تەرموتىركەگىشى بار 60 تەرموكونتەينەر ساتىپ الىنادى. COVID-19-عا قارسى ۆاكتسيناتسيانى ۇيىمداستىرۋ جانە ەگۋ بويىنشا 358 مەديتسينا قىزمەتكەرى وقۋدان ءوتتى», دەپ اتاپ ءوتتى ۆلاديمير لي.
سونىمەن قاتار, ۆاكتسيناتسيا كەزەڭىندە مونيتورينگ جۇرگىزۋ جانە ادىسنامالىق كومەك كورسەتۋ ءۇشىن ارنايى كوميسسيا قۇرىلىپ, العاشقى مەديتسينالىق-سانيتارلىق كومەك ۇيىمدارىنىڭ باسشىلارى قاتارىنان جاۋاپتى تۇلعالار بەلگىلەندى.
