دەنساۋلىق ساقتاۋ باسقارماسىنىڭ باسشىسى ءسابيت پازىلوۆتىڭ ايتۋىنشا, 5 قاڭتاردان باستاپ مەكتەپ وقۋشىسىنىڭ ىستىعى كوتەرىلىپ, ءوزىن جايسىز سەزىنە باستاعان ەكەن. 10 قاڭتار كۇنى №5 ەمحاناعا قارالىپ, وبلىستىق جۇقپالى اۋرۋلار اۋرۋحاناسىنا جاتقىزىلادى. وسى ەمدەۋ مەكەمەسىندە الىنعان پتر-تەست تەرىس ناتيجە بەرگەن سوڭ, 19 قاڭتار كۇنى بالالار اۋرۋحاناسىنا اۋىستىرىلىپتى. بۇل جەردە الىنعان سىناما دا بالا بويىندا كوروناۆيرۋس ينفەكتسياسىنىڭ جوقتىعىن كورسەتكەن. رەسپۋبليكاداعى باسقا دا تاجىريبەلى ماماندارمەن اقىلداسا وتىرىپ, قويىلعان باسقا دياگنوز دا انىقتالماپتى. نەشە كۇنگى ەمنەن كەيىن دە وڭالماعان 10 جاستاعى بالا 24 قاڭتار كۇنى كوز جۇمدى. وعان دارىگەرلەر «وكپە, جۇرەك جەتكىلىكسىزدىگى» دەگەن دياگنوز قويىپ وتىر.
وبلىستىق ءبىلىم باسقارماسىنىڭ باسشىسى اقزيرا قاسىموۆا قايتىس بولعان مەكتەپ وقۋشىسىنىڭ قىزىلوردا قالاسىنداعى №8 پ.وسيپەنكو اتىنداعى مەكتەپتىڭ 4-سىنىبىندا وقىعانىن ايتىپ ءوتتى.
– بالا ءى توقساننان باستاپ ونلاين فورماتتا, قاشىقتان وقىپ كەلگەن. وقۋ ۇلگەرىمىنە قاتىستى پروبلەما تۋىنداعان ەمەس. قاشىقتان وقىتۋعا بايلانىستى ەلەكتروندى تەحنيكامەن قامتىلعان. بالا اۋىرعاننان باستاپ, سىنىپ جەتەكشىسى وتباسىمەن ۇنەمى حابارلاسىپ, جاعدايىن ءبىلىپ وتىرعان, – دەيدى باسقارما باسشىسى.
بريفينگتە باسقارما باسشىسى مەكتەپتەردەگى وقۋ پروتسەسىن ۇيىمداستىرۋ باس مەملەكەتتىك سانيتارلىق دارىگەردىڭ قاۋلىسى نەگىزىندە جۇرگىزىلەتىنىن جەتكىزدى. ءبىلىم بەرۋ ۇيىمدارىندا سانيتارلىق تالاپتار تولىق ساقتالعان. ءداستۇرلى تۇردە وقيتىن بالالار 5 ساتىلىق دەزينفەكتسيالىق تەكسەرۋدەن وتەدى. مەكتەپكە اتا-انالاردىڭ كىرۋىنە تىيىم سالىنعان. وقۋشىلاردىڭ دا شوعىرلانباۋى ۇدايى قاداعالانىپ وتىرادى. وبلىس بويىنشا قازىر 89 258 وقۋشى قاشىقتان, 80 636 شاكىرت ءداستۇرلى فورماتتا ءبىلىم الۋدا.
جالپى, وقۋ جىلى باستالعالى بەرى 22 وقۋشى كوۆيدكە شالدىعىپتى. ونىڭ 6-ۋى ءداستۇرلى تۇردە كەزەكشى سىنىپتاردا ءبىلىم الاتىندار قاتارىنان انىقتالسا, 16-سى قاشىقتان وقيتىندار اراسىنان شىعىپ وتىر.
جۋرناليستەرمەن كەزدەسۋدە وبلىستىق دەنسۋلىق ساقتاۋ باسقارماسىنىڭ باسشىسى ءسابيت پازىلوۆ پەن باس مەملەكەتتىك سانيتارلىق دارىگەر ءاليا ابدىقايىموۆا وڭىردەگى ەپيدەميالىق احۋال جايلى دا بايان ەتتى. وسى كۇنگە دەيىن وبلىستا 3 544 ناۋقاس تىركەلگەن, اپتانىڭ العاشقى كۇنى تاعى 9 جاعداي انىقتالىپ وتىر. ىندەتكە شالدىققانداردىڭ 96,6 پايىزى ەمدەلىپ شىعىپتى. قازىر ينفەكتسيالىق ستاتسيوناردا 38 ناۋقاس ەم الۋدا, ونىڭ 4-ءۋى جانساقتاۋ بولىمىنە جاتقىزىلعان.
اقپان ايىندا وبلىس تۇرعىندارىن ەرىكتى ۆاكتسينالاۋ باستالادى. ۆاكتسينانى ساقتاۋدىڭ تەمپەراتۋرالىق رەجىمىن ەسكەرىپ, باستاپقى مەديتسينالىق كومەك كورسەتۋ مەديتسينالىق ۇيىمدارى مەن №6 قالالىق ەمحانانىڭ بازاسىندا ورنالاسقان ۆاكتسينا ساقتاۋ قويماسىن قاجەتتى مۇزداتقىشتارمەن جابدىقتاۋ ءۇشىن جەرگىلىكتى بيۋدجەت ەسەبىنەن قوسىمشا قاراجات ءبولىندى. ەكپە سالۋدىڭ ءبىرىنشى كەزەڭىندە وبلىسقا 80 000 دوزا ۆاكتسينا جەتكىزۋ جوسپارلانىپ وتىر.
قىزىلوردا
