بىلتىر پوليتسەيلەر 4 رەت «دارمەك» جەدەل پروفيلاكتيكالىق ءىس-شاراسىن, 1 ماۋسىم – 30 قازان ارالىعىندا «قاراسورا-2020» كەڭ اۋقىمدى شاراسىن وتكىزگەن.
ەسىرتكىنى ازىرلەۋ مەن ساقتاۋ ورىندارىن انىقتاۋ, سونداي-اق تاسىمالداۋدىڭ جولىن كەسۋ ماقساتىندا شالعايداعى ۋچاسكەلەرگە جانە اينالمالى جولدارعا قالالىق پوليتسيا باسقارماسى مەن اۋداندىق پوليتسيا ءبولىمى قىزمەتكەرلەرىنەن قۇرالعان توپتار تەكسەرىس جۇمىستارىن جۇرگىزۋدە. وسى باعىتتا ۇلتتىق ۇلانى اسكەري تىكۇشاعىنىڭ كومەگىمەن اۋەدەن شولۋ جاسالدى.
- تەكسەرۋلەر بارىسىندا ەسىرتكى ءوسىرۋدىڭ 27 دەرەگى دالالىق ايماقتان, 48 دەرەگى ءۇي, ساياجاي اۋلاسىنان جانە 1 دەرەگى مەكەمە اۋماعىنان تابىلدى. ەسىرتكى وسىرگەنى ءۇشىن بارلىعى 63 ادام ۇستالىپ, ونىڭ 27-ءى قاماققا الىندى. وقيعا ورنىنان 31 مىڭ 437 ءتۇپ سورا وسىمدىگى جويىلدى. زاڭسىز اينالىمنان بارلىعى 349 كەلى 322 گرامم ەسىرتكى, ماريحۋانا جانە 6 دانا اتىس قارۋى تاركىلەندى, دەيدى وبلىستىق پد ەسىرتكى قىلمىسىنا قارسى ءىس-قيمىل باسقارماسى باستىعىنىڭ ورىنباسارى, پوليتسيا پودپولكوۆنيگى ماقسات بەركىمباەۆ.
قۇقىق قورعاۋشىلار بىلتىر تۇرعىنداردىڭ ناشاقورلىققا قارسى يممۋنيتەتىن قالىپتاستىرۋ ماقساتىندا ونلاين فورماتتا 320-عا جۋىق ءىس-شارا ۇيىمداستىرىپ, ولارعا 41 757 تۇرعىن قاتىسقان. اكتسيا, دوڭگەلەك ۇستەل, سەمينار, لەكتسيا, سپورتتىق سايىستار فورماتىندا وتكەن بۇل شارالاردىڭ وتۋىنە جوو ستۋدەنتتەرى مەن مەكتەپ وقۋشىلارى, مەملەكەتتىك ورگاندار وكىلدەرى, ۇەۇ مۇشەلەرى ۇلكەن ۇلەس قوستى.
