كارانتين ءتارتىبىن بىرنەشە رەت بۇزعان 12 مەكەمەنىڭ قىزمەتى توقتاتىلدى

ايماقتار • 28 قاڭتار، 2021

كارانتين ءتارتىبىن بىرنەشە رەت بۇزعان 12 مەكەمەنىڭ قىزمەتى توقتاتىلدى

5 رەت كورسەتىلدى

ەلوردانىڭ بىرقاتار كاسىپكەرى قولدانىستاعى قاۋلىعا قاراماستان شەكتەۋ شارالارى كورسەتىلگەن تالاپتاردى ءالى دە ساقتاماي كەلەدى. قازىر ويىن-ساۋىق مەكەمەلەرىندە كوروناۆيرۋس ىندەتىن جۇقتىرۋ ىقتيمالدىعى ارتىپ وتىر. وسىلايشا باس قالادا كاسىپكەرلەر شەكتەۋ جانە كارانتيندىك شارالاردى قاتاڭداتۋعا ءماجبۇر ەتىپ وتىر، دەپ حابارلايدى قالا اكىمدىگىنىڭ رەسمي سايتى.

اقمارال اعزامقىزى

زاڭ بۇزۋشىلىقتار تىزىمىندە بۇقارالىق ءىس-شارالار وتكىزۋ، جۇمىس رەجيمىن جانە كەلۋشىلەردىڭ بەلگىلەنگەن سانىن ساقتاماۋ، جۇمىس ىستەۋىنە تىيىم سالۋدى ەلەمەۋ، سونداي-اق قوعامدىق مەكەمەلەر قىزمەتكەرلەرىنىڭ ماسكا رەجيمىن بۇزۋى ءجيى كەزدەسەدى.

وسىلايشا، بۇگىنگى كۇنى سوت 12 قوعامدىق مەكەمەنىڭ قىزمەتىن توقتاتتى جانە اكىمشىلىك ايىپپۇلدار سالدى. ولارى: “جانىم سول" كاراوكە-بارى، "الانيا" تۇنگى كلۋبى (ماناس كوشەسى، 9/1)، "Tequila" كاراوكە - بارى، "التىن" مەيرامحاناسى، "Echo" لاۋندج بارى، "ستوريس" لاۋندج بارى، "Raspawn" كومپيۋتەرلىك كلۋبى، "Kango" باتۋت پاركى، "Abba" لاۋندج بارى، "Ginza" كاراوكە-مەيرامحاناسى، “تابىس” دۇكەنى.

ەلوردالىق كاسىپكەرلەر دە ءتۇرلى قۋلىقتارعا باراتىن بولدى. “ZOLOTO” مەيرامحاناسىنىڭ قىزمەتىن جۇزەگە اسىراتىن "زولوتو-استانا "جشس كاسىپكەرلىك سۋبەكتىسى شەكتەۋ جانە كارانتين شارالارىن بۇزعانى ءۇشىن بىرنەشە رەت اكىمشىلىك جاۋاپكەرشىلىككە تارتىلعان بولاتىن. ارى قاراي ۇلكەن اكىمشىلىك ايىپپۇلداردى بولدىرماۋ ماقساتىندا "زولوتو-استانا" جشس جەكە تۇلعا د.م. تەمىربولاتوۆامەن (كەيىن مەيرامحانا قىزمەتكەرى ەكەنى انىقتالدى) جالداۋ شارتىن جاساپتى. ءتيىستى تالاپتاردى ورىنداماعانى ءۇشىن ءىس ماتەريالدارى سوتقا جىبەرىلدى. سوت "ZOLOTO" مەيرامحاناسىنىڭ قىزمەتىن توقتاتۋ تۋرالى شەشىم شىعاردى جانە 100 اەك-تەن استام اكىمشىلىك ايىپپۇل سالدى.

قولدانىستاعى تىيىم جۇزەگە اسقانمەن 27 قاڭتاردا ساعات 23.05-تە ءموبيلدى توپ زاڭسىز جۇمىس ىستەگەن "پاناەحالي" اتموسفەرالىق بارىن انىقتادى. مەكەمە اكىمشىلىگى دە قۋلىققا بارىپتى. ياعني مەكەمەنىڭ كىرەبەرىسى سىرتتان قاراعاندا جابىق تۇرعانداي بولعان. الايدا انىقتاي كەلە بارعا كىرۋ ءۇشىن جۇرت مەكەمەنىڭ اسحاناسى، سودان كەيىن زال ارقىلى كىرگەنى بەلگىلى بولدى، - دەپ حابارلادى نۇر-سۇلتان پد ءباسپاسوز قىزمەتى.

سونداي-اق، رەيد بارىسىندا مونيتورينگتىك توپ ساعات 00.44-تە "بانزاي" كافەسى تاراپىنان سانيتارلىق نورمالاردى بۇزىپ، كەلۋشىلەردىڭ كوڭىل كوتەرىپ جۇرگەنىن انىقتادى.

پوليتسەيلەردىڭ ايتۋىنشا، كارانتين رەجيمىن تەك ويىن-ساۋىق مەكەمەلەرىنىڭ يەلەرى عانا بۇزبايدى. تۇنگى رەيدتەر بارىسىندا ءموبيلدى توپ تىيىم سالىنعان ۋاقىتتا جۇمىس ىستەيتىن لوتو-كلۋبتاردى، كومپيۋتەرلىك كلۋبتار مەن دۇكەندەردى انىقتادى.

ەلوردانىڭ باس سانيتارلىق دارىگەرى كەشكى ساعات 20.00-دەن كەيىن بارلار مەن مەيرامحانالاردا كوڭىل كوتەرۋگە قاتاڭ تىيىم سالدى. ءتارتىپ بۇزۋشىلارعا ايىپپۇل سالىنادى. بيزنەسمەندەرگە 600 مىڭ تەڭگەدەن استام، ال قوناقتارعا 87 مىڭ تەڭگە ايىپپۇل بەلگىلەنگەن.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز