قازاقستان • 28 قاڭتار، 2021

الەۋمەتتىك ۇتقىرلىقتان ۇتىپ تۇرمىز با؟

5 رەت كورسەتىلدى

دۇنيەجۇزىلىك ەكونوميكالىق فورۋم-2020 شەڭبەرىندە ۇسىنىلعان جاھاندىق الەۋمەتتىك ۇتقىرلىق يندەكسىندە قازاقستان 38-ورىندى يەلەنگەن. بۇل ورايدا ءبىزدىڭ ەل رەسەي مەن قىتايدىڭ ءوزىن ارتتا قالدىرىپ وتىر، دەپ حابارلايدى Egemen.kz

اتالعان رەيتينگتىڭ تۇپنۇسقا اتاۋى – Global Social Mobility Index. الەۋمەتتىك موبيلدىلىك دەپ تە، الەۋمەتتىك ۇتقىرلىق دەپ تە تاپسىرلەۋگە بولاتىن سەكىلدى. مۇنداي يندەكستى ويلاپ تابۋشىلار الەۋمەتتىك ۇتقىرلىقتى – قازىرگى ازاماتتاردىڭ بۇرىنعى اعا بۋىنعا قاراعاندا جاقسى ءومىر ءسۇرۋ قابىلەتى دەپ تۇسىندىرەدى. ياعني، ۇيىمداستىرۋشىلار ءار ەلدىڭ الەۋمەتتىك-ەكونوميكالىق وڭ احۋالىن ەسەپكە الادى. سونىڭ ىشىندە دەنساۋلىق ساقتاۋ ساپاسى دا، ءبىلىم الۋعا قولجەتىمدىلىك تە، ءبىلىم الۋعا ارنالعان مۇمكىندىكتەر دە، جالاقى تولەۋ ادىلدىگى دە، الەۋمەتتىك قورعاۋ دا، قوعامدىق ينستيتۋتتاردىڭ تيىمدىلىگى مەن اشىقتىعى دا بار.

رەيتينگتەگى 82 ەلدىڭ ىشىندە قازاقستان 64،8 بالل جيناپ، 38-ورىنعا ورنالاسقان. ۇزدىك ناتيجە دانياعا، ەكىنشى ورىن فينلياندياعا، ال ءۇشىنشى ورىن نورۆەگيا مەن شۆەتسياعا تيەسىلى ەكەن. دەگەنمەن قازاقستان جەكەلەگەن كورسەتكىشتەر بويىنشا دامىعان ەلدەرمەن يىق تىرەستىرەدى. ماسەلەن، «ەڭبەك جاعدايلارى» كورسەتكىشىندە ءبىزدىڭ ەل ۇزدىك 20 ەلدىڭ قاتارىنا (16-ورىن) كىرسە، «جالاقى ادىلدىگى» بويىنشا 25-ورىن الىپ، گەرمانيا مەن ۇلىبريتانيانى ارتقا تاستاپتى. «جۇمىسقا ورنالاسۋ» بويىنشا العان 30-ورنىمىزدىڭ ءوزى شۆەتسيا مەن كانادادان بيىك تۇر.  

«قىزمەتكەرلەردى ۇجىمدىق شارتتارمەن قامتۋ كوەففيتسيەنتىمەن 75 پايىز دەڭگەيىندە قازاقستان 12-ورىندى يەلەندى. ءبىلىم الۋعا قولجەتىمدىلىك بويىنشا رەيتينگتە قازاقستان پورتۋگاليا (36-ورىن) مەن يتاليادان (37-ورىن) وزىپ، 32-ورىندا تۇر. ءبىلىم بەرۋ سالاسىنداعى ساپا مەن تەڭدىك بويىنشا ءبىزدىڭ رەسپۋبليكا جوعارىدا اتالعان ەلدەردەن كەيىن 33-ورىندا. ەكونوميكالىق بەلسەندى ايەلدەر سانى بويىنشا قازاقستان ايتارلىقتاي جوعارى ورىنعا يە بولدى – 22-ورىن. جوعارى ءبىلىمدى ادامدار اراسىنداعى جۇمىسسىزدىق دەڭگەيى بويىنشا قازاقستان 33-ورىندا، ودان كەيىن يرلانديا، جاڭا زەلانديا جانە دانيا تۇر» دەلىنگەن ەڭبەك رەسۋرستارىن دامىتۋ ورتالىعىنىڭ حابارلاماسىندا.

دۇنيەجۇزىلىك ەكونوميكالىق فورۋم بايانداماسىندا الەۋمەتتىك موبيلدىلىك يندەكسىنىڭ ارتۋى ەلدەردىڭ جالپى ىشكى ءونىمىنىڭ وسۋىنە ىقپال ەتەتىنى ايتىلعان. 

سوڭعى جاڭالىقتار

ورازانىڭ ءار ءساتى ساۋاپ

رۋحانيات • كەشە

ءسوزدىڭ جەتى بوياۋى

تانىم • كەشە

ۇقساس جاڭالىقتار