اقتاۋ قالاسىنىڭ تەرگەۋ يزولياتورىندا سوتتالعاندارعا ءوز ونەرىن شىڭداپ, عىلىمي جۇمىسپەن اينالىسىپ, وزىنە دە, قوعامعا دا پايداسى زور ەڭبەكپەن شۇعىلدانۋ جولعا قويىلعان. جۋىردا سوتتالعاندار اراسىندا ۇيىمداستىرىلعان قولونەر بۇيىمدارىنىڭ كورمەسى – وسىنىڭ دالەلى.
ءىس-شارانىڭ نەگىزگى ماقساتى – جازاسىن وتەۋشىلەردىڭ بوس ۋاقىتتارىن ءتيىمدى پايدالانۋ, شىعارماشىلىق شەبەرلىگىن شىڭداپ, ءومىر جايلى وي-تولعامدارىن, قورشاعان ورتاعا دەگەن كوزقاراستارىن بىلدىرەتىن شىعارمالارمەن ءبولىسۋ. كورمەگە قويىلعان قولونەر بۇيىمدارىنا مەكەمە قىزمەتكەرلەرىنەن جاساقتالعان قازىلار القاسى باعا بەردى.
سوتتالعاندار دايىنداعان تۋىندىلاردا وقشاۋلاۋ جاعدايىنداعى ءومىر عانا ەمەس, سونداي-اق قازىرگى ساتتە ولاردان الىس قالعان تابيعات سۇلۋلىعى, وتباسىلىق ءومىردىڭ قىزىعى, جىلىلىق پەن ارمان-مۇددەلەرى كورىنىس تاپقان.
اتاپ ايتقاندا, ق.ۇزاق ۇلى ءوز قولىمەن توقىعان ءجۇن ش ۇلىعىن كورمەگە ۇسىنسا, ال ن.حاليكوۆ قاعازدان جاساعان تاۋىستى, ن.ساداباەۆ اعاشتان ويىپ جاساعان قوبديشاسىن, ب.دونباەۆ پلاستماسسا شولمەگىنەن جاسالعان ءتاسپى ۇسىندى. قولونەر بۇيىمدارىنىڭ كورمەسىنە جالپى سانى 5 تۋىندى ۇسىنىلدى.
سايىسقا قاتىسۋشىلار قولونەر بۇيىمدارىن قازىلار القاسىنا كەڭىنەن تانىستىرىپ, بۇيىمداردىڭ ءمان-ماعىناسىن اشىپ بەردى. قازىلار سوتتالعانداردىڭ اڭگىمەلەرىن تىڭداپ, ەرەكشە كوزگە تۇسكەن بۇيىمداردىڭ يەلەرىن جەڭىمپاز دەپ تانىپ, ولاردى مەكەمە باستىعىنىڭ گراموتاسىمەن ماراپاتتادى. قولونەر بۇيىمدارى اۆتورلارىنىڭ ۇسىنىسى بويىنشا كورمەگە ۇسىنىلعان بۇيىمدار اقتاۋداعى بالالار ۇيىنە تابىس ەتىلدى.
وسىلايشا, جازاسىن وتەۋشى جاندار قامكوڭىل بالالارعا قۋانىش سىيلادى.
ماڭعىستاۋ وبلىسى
