اقپاراتتىق-اعارتۋ شتابىنىڭ جۇمىسى اشىقتىقتى تالاپ ەتەدى

قازاقستان • 27 قاڭتار، 2021

اقپاراتتىق-اعارتۋ شتابىنىڭ جۇمىسى – اشىقتىقتى تالاپ ەتەدى

9 رەت كورسەتىلدى

سىبايلاس جەمقورلىققا قارسى ءىس-قيمىل اگەنتتىگىنىڭ جانىنان ازاماتتاردىڭ سەنىمى مەن ادالدىق پەن پاراساتتىلىق قاعيدالارىنا بەيىمدىلىگىن ارتىرۋ ماقساتىندا قۇرىلعان اقپاراتتىق-اعارتۋ شتابىنىڭ جىلدىق جۇمىسىن قورىتىندىلاۋ بويىنشا كەڭەس ءوتتى، دەپ حابارلايدى Egemen.kz

ايىم ءداۋىت

ءىس-شاراعا اگەنتتىكتىڭ جانە اۋماقتىق دەپارتامەنتتەردىڭ باسشىلىعى، سونداي-اق جەرگىلىكتى اقپاراتتىق-اعارتۋ شتابتارىنىڭ جەتەكشىلەرى مەن قوعام وكىلدەرى قاتىستى.

رەسپۋبليكالىق شتابتىڭ جەتەكشىسى ىرزا تۇرسىنزادا قۇرامىندا مىرزاتاي جولداسبەكوۆ، ەرمەك تۇرسىنوۆ، عوسمان تولەعۇل سياقتى بەدەلدى قوعام بەلسەندىلەرى بار شتابتاردىڭ قىزمەتى جەمقورلىققا مۇلدەم توزبەۋشىلىكتىڭ ىرگەتاسىن قالاۋعا مۇمكىندىك بەرگەنىن اتاپ ءوتتى. ونىڭ دالەلى رەتىندە وتكەن جىلى جاسالعان جۇمىستاردىڭ العاشقى وڭ ناتيجەلەرىن كەلتىرۋگە بولادى.

ونىڭ ايتۋىنشا ونلاين فورماتتا شتابتىڭ 400 مۇشەسى وتكىزگەن 5 مىڭعا جۋىق ءىس-شارامەن 1،2 ملن ازامات قامتىلدى. ءاربىر شارا ۇلتتىق مادەنيەت پەن بابالار مۇراسى ارقىلى رۋحاني قۇندىلىقتاردى تاربيەلەۋگە ماقساتتى باعىتتالعان قۇرال بولىپ تابىلادى

ى. تۇرسىنزادا ءسوز اراسىندا «جۇزىڭدە ۇيات پەن ادالدىق بولسىن، ىسىڭدە اركەز ادامدىق بولسىن» دەگەن حالىق دانالىعىن قوسا كەتتى.

سونىمەن قاتار پاراساتتىلىق يدەياسى مەن سىبايلاس جەمقورلىققا قارسى مادەنيەتتى جاستار اراسىندا حالىق شىعارماشىلىعى ارقىلى قالىپتاستىرۋ ماقساتىندا ەلىمىزدىڭ ءار وڭىرىنەن 16 ايتىس اقىنى قاتىسقان Antikor-ايتىس جانە Antikor Terme ونلاين جوبالارى ۇيىمداستىرىلدى.

جيىن بارىسىندا شىمكەنت قالاسى، اقمولا، جامبىل، قىزىلوردا، تۇركىستان، پاۆلودار جانە شىعىس قازاقستان وبلىستارىنىڭ شتاب جەتەكشىلەرىنىڭ باياندامالارى تىڭدالىپ، وڭ تاجىريبەلەرى وزگە وڭىرلەرگە ۇلگى رەتىندە مىسال ەتىلدى.

ءوز كەزەگىندە اگەنتتىك توراعاسى اليك شپەكباەۆ اقپاراتتىق-اعارتۋ شتابىنىڭ باستى ماقساتى سىبايلاس جەمقورلىققا قارسى مادەنيەتتى قالىپتاستىرۋ جانە پاراساتتىلىق يدەولوگياسىن ىلگەرىلەتۋ ەكەنىن نازارعا الدى. ا. شپەكباەۆتىڭ پىكىرىنشە، ءاربىر ءوڭىر، ءتىپتى اۋىلدىق ايماققا دەيىن سىبايلاس جەمقورلىققا قارسى كوزقاراستى تۇبەگەيلى ءسىڭىرۋى ماڭىزدى. ول ءۇشىن اۋداندىق دەڭگەيدە اقپاراتتىق-اعارتۋ شتابتارىنىڭ جۇمىسىن ۇيىمداستىرۋ قاجەت.

كەزدەسۋ سوڭىندا اعارتۋ جۇمىسىنا حالىق اراسىندا ابىرويعا يە بەلسەندى ازاماتتاردى، ونىڭ ىشىندە جاستاردى جانە ادەپ جونىندەگى ۋاكىلدەردى كەڭىنەن تارتۋ قاجەتتىگى ايتىلدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز