قازاقستان • 26 قاڭتار، 2021

ادىلەت مينيسترلىگى قازاقستانعا كرەماتوري نە ءۇشىن كەرەك ەكەنىن ايتتى

742 رەت كورسەتىلدى

قازاقستانعا كرەماتوري قۇرىلىسى نە ءۇشىن قاجەت بولدى؟ بۇل سۇراققا ادىلەت مينيسترلىگىنىڭ ساراپشىلىق جۇمىسىن ۇيىمداستىرۋ دەپارتامەنتە قاراستى سوت ساراپتامالارى ورتالىعىنىڭ جۇمىسىن باقىلاۋ باسقارماسىنىڭ باسشىسى تەمىربولات قوجامجاروۆ جاۋاپ بەردى، دەپ حابارلايدى Egemen.kz

«پاندەميانىڭ شارىقتاۋ شەگى كەزىندە COVID-19 ىندەتىنەن كوز جۇمعان ازاماتتاردىڭ سانى كۇرت ءوسىپ كەتتى. اۋرۋحانالاردىڭ پاتولوگو-اناتوميالىق بيۋروسى مەن سوت-مەديتسينالىق مورگتارعا ادامداردىڭ دەنەسى كوپ جەتكىزىلىپ، ونداعى قىزمەتكەرلەر جۇكتەمەنى ەڭسەرە الماي جاتتى. ال بۇل جاعداي حالىقتىڭ اشۋىن تۋعىزدى. سونىمەن قاتار كىسىلەردىڭ دەنەسىن پاتولوگو-اناتوميالىق جانە سوت-مەديتسينالىق اشۋ كەزىندە مەديتسينالىق ماسكا، كوستيۋم، پاكەت، بينت، شپريتس سەكىلدى قاۋىپتى زاتتار كوبەيىپ كەتتى»، دەپ ءتۇسىندىردى تەمىربولات قوجامجاروۆ.

ونىڭ ايتۋىنشا مۇنداي جاعدايدا قاۋىپتى زاتتاردى جويۋدىڭ بىردەن ءبىر امالى – ارنايى پەشتەردە ورتەۋ. ءولىمنىڭ بۇرىنعىدان كوبىرەك تىركەلىپ، قاۋىپتى زاتتاردىڭ ارتۋى نۇر-سۇلتان جانە الماتى قالالارىندا اسا قاۋىپتى بيولوگيالىق قالدىقتاردى جويۋعا ارنالعان جوعارى تەحنولوگيالى پەشتەرى بار پاتولوگو-اناتوميالىق بيۋرولاردى سالۋعا ماجبۇرلەگەن.

«قازاقستاندا ومىردەن ءوتىپ كەتكەن شەتەل ازاماتتارىن جەرلەۋگە قاتىستى دا پروبلەما تۋىندادى. 2019 جىلى قايتىس بولعان 50 شەتەلدىك ازاماتتىڭ دەنەسى تەكسەرىلسە (اعزاسىن اشۋ ارقىلى زەرتتەۋ)، ءوتىپ كەتكەن جىلى 200 ازاماتتى وسىلاي تەكسەرۋگە تۋرا كەلدى. شەكارالار جابىلىپ، وتانىنا قايتارۋ مۇمكىن بولماعاندىقتان، ولاردىڭ تۋعان-تۋىستارى مورگتارعا جۇگىنىپ، كرەماتسيا جاساتۋعا ءوتىنىش ءبىلدىردى. پاتولوگو-اناتوميالىق بيۋرولار اسا قاۋىپتى ۆيرۋستان نەمەسە كوروناۆيرۋستان كوز جۇمعان ءبىزدىڭ ازاماتتاردىڭ دەنەسىن كرەماتسيالاۋدى كوزدەمەيدى. قر دەنساۋلىق ساقتاۋ ءمينيسترى 2018 جىلعى 18 جەلتوقساندا بەكىتكەن №40 بۇيرىعىنىڭ 239-ەرەجەسىنىڭ 4-بولىگىندە كورسەتىلگەندەي، ادامنىڭ دەنەسى تەك تۋعان-تۋىستارىنىڭ كەلىسىمى بويىنشا كرەماتسيالانادى. كرەماتسيادان كەيىن ك ۇلى تۋىستارىنا بەرىلەدى. وسى ماقساتتا ادىلەت مينيسترلىگىنە جوعارى تەحنولوگيالى پەشتەرى بار پاتولوگو- اناتوميالىق بيۋرولاردى سالۋ ءۇشىن نۇر-سۇلتان قالاسىنا ارنالىپ 1 ملرد 475 ملن تەڭگە، ال الماتى قالاسىن ارنالىپ 1 ملرد 744 ملن تەڭگە ءبولىندى»، دەپ قوستى تەمىربولات قوجامجاروۆ.



سوڭعى جاڭالىقتار

ۇقساس جاڭالىقتار