وقيعا • 26 قاڭتار، 2021

قاراجات جىمقىردى دەپ ايىپتالعان بۇرىنعى ۆيتسە-مينيستر اقتالدى

9 رەت كورسەتىلدى

قاراعاندى قالاسىنىڭ قازىبەك بي اۋداندىق سوتى بۇرىنعى ەنەرگەتيكا ۆيتسە-ءمينيسترى اناتولي شكارۋپانى اقتاپ شىقتى. وعان بيۋدجەت قاراجاتىن جىمقىرعانى ءۇشىن ايىپ تاعىلعان بولاتىن. بۇگىن سۋديا جانات ەگەمبەرديەۆا جاڭا ۇكىمدى وقىدى، دەپ حابارلايدى Egemen.kz

ەكس ەنەرگەتيكا ۆيتسە-ءمينيسترى اناتولي شكارۋپا مەن «تكش دامىتۋ قورى» كومپانياسىنىڭ بۇرىنعى باسقارما توراعاسى قايسار بايدالى مەن «ENERسو» كومپانياسىنىڭ ديرەكتورى ەرلان نابيەۆكە قاتىستى ۇكىمنىڭ جاريالانۋى ءۇش ساعاتتان استام ۋاقىتقا سوزىلدى. قاراعاندى قالاسى قازىبەك بي اۋداندىق سوتىنىڭ سۋدياسى جانات ەگەمبەرديەۆا 115 تومدى قۇرايتىن ءىس ماتەريالدارىن وقىپ بەردى.

قىلمىستىق ءىس ماتەريالدارىن زەردەلەپ، سوتتالۋشىلاردان، جابىرلەنۋشىلەردىڭ وكىلدەرىنەن، ايىپتاۋ كۋاگەرلەرىنەن، سونداي-اق قورعاۋشىلاردان، ساراپشىلاردان، مامانداردان جاۋاپ الىپ، سوت سوتتالۋشىلاردىڭ ارەكەتتەرىندە قىلمىستىق قۇقىق بۇزۋشىلىق قۇرامى جوق دەگەن قورىتىندىعا كەلدى.

«سوتقا دەيىنگى تەرگەپ-تەكسەرۋ ورگانى ايىپتاۋ اكتىسىندە قىلمىستىق ارەكەت جاساۋ ءتاسىلىن، اتاپ ايتقاندا: ۇرلاۋ قالاي جاسالعانىن – يەمدەنىپ الۋ نەمەسە جىمقىرۋ ارقىلى ەكەنىن كورسەتپەدى. ءىس بويىنشا جۇرگىزىلگەن، ءىس بويىنشا كەلتىرىلگەن زالال سوماسىن بولجامدى راستايتىن ساراپتامالاردى سوت ولاردى جۇرگىزۋ ءتارتىبىنىڭ ەلەۋلى بۇزىلۋىنا، ساراپتامالاردىڭ، ساراپشىلاردىڭ، سونداي-اق مامانداردىڭ قورىتىندىسىنا بايلانىستى جول بەرىلمەيتىن دالەلدەمە دەپ تانىدى. ولار شىندىققا جاناسپادى جانە ولار كەلتىرىلگەن شىعىن مولشەرىن راستامادى. ايىپتالۋشىلار اراسىنداعى قىلمىستىق قاستاندىق فاكتىسى سوت تەرگەۋىمەن راستالعان جوق. سوت تالقىلاۋى بارىسىندا سوتتالۋشىلاردىڭ كىنالىلىگى تۋرالى جەتكىلىكتى جانە بۇلتارتپاس دالەلدەر الىنعان جوق. ءىس بويىنشا جۇرگىزىلگەن تەرگەۋ ارەكەتتەرىندە كىنالىلىكتىڭ دالەلى جوق. جاۋاپ الىنعان كۋاگەرلەر سوتتالۋشىلاردىڭ كىناسىن تىكەلەي نەمەسە جاناما تۇردە راستامادى»، دەپ ءتۇسىندىردى قاراعاندى قالاسى قازىبەك بي اۋداندىق سوتىنىڭ سۋدياسى جانات ەگەمبەرديەۆا.

سونداي-اق، سۋديا سوت تەرگەۋىندە زالال سوماسى انىقتالماعانىن اتاپ ءوتتى. بۇل قىلمىس قۇرامىنىڭ جوقتىعىن كورسەتەدى. اقتالعاندار تەرگەۋ ورگاندارىنا تالاپ ارىز بەرىپ، زاڭسىز قىلمىستىق جاۋاپكەرشىلىككە تارتىلعانى ءۇشىن مورالدىق زياننىڭ وتەلۋىن تالاپ ەتۋگە قۇقىلى.

جانات ەگەمبەرديەۆا وسى قىلمىستىق ءىستى تەرگەۋ كەزىندە قىجك نورمالارىنىڭ بۇزىلۋىنا جول بەرگەنى ءۇشىن باس پروكۋراتۋراعا قاۋلى شىعاردى.

ەستەرىڭىزگە سالا كەتەيىك، ەنەرگەتيكا ۆيتسە-ءمينيسترى اناتولي شكارۋپا 2018 جىلدىڭ 18 قاراشاسىندا قاماۋعا الىندى. وعان جانە تاعى ەكى كۇدىكتىگە «تۇرعىن ءۇي-كوممۋنالدىق شارۋاشىلىقتى دامىتۋ قورى» اق قاراعاندى وبلىسىنىڭ ساران قالاسىندا جىلۋ ەسەپتەۋ قۇرالدارىن ساتىپ الۋعا جانە ورناتۋعا بولگەن قاراجاتىن جىمقىردى دەپ ايىپ تاعىلعان بولاتىن.

 

سوڭعى جاڭالىقتار

ۇقساس جاڭالىقتار