ايماقتار • 26 قاڭتار، 2021

كەگەن اۋدانىندا مال نەگە قىرىلدى؟

468 رەت كورسەتىلدى

الماتى وبلىسىنىڭ كەگەن اۋدانىنا قاراستى شارۋاشىلىقتىڭ بىرىندە ءىرى قارا مالى قىرىلىپ جاتىر دەگەن اقپارات تاراعان بولاتىن. اياق استىنان شىققان دەرتتەن بولەكساز اۋىلىنداعى «Meat Processing and Service» سەرىكتەستىگىنە قاراستى مال بورداقىلاۋ الاڭىندا 53 باس سيىر ولگەن. ال اۋىرعان مالدىڭ قاراسان مەن پاستەرەللەزگە شالدىققانىن ايماقتىڭ ۆەتەريناريالىق قىزمەتى راستادى، دەپ حابارلايدى Egemen.kz.

– بولەكساز اۋىلىنداعى 53 باس ءىرى قارانىڭ ولەكسەسىن زەرتتەي كەلە، ولاردىڭ پاستەرەللەز بەن قاراسانعا شالقىققانىن انىقتادىق. شەشىمدى وبلىستاعى ۆەتەريناريالىق زەرتحانا راستادى. قازىر قىرىلعان مالدىڭ قالدىعى الىنىپ، ارنايى ورىنعا كومىلىپ، ورتەلدى. مال يەلەرى اۋرۋدان ولگەن 34  باستى ءوز بەتتەرىنشە كومگەن ەكەن، ءبىز بۇدان حابارسىزبىز بولدىق. حابار تيىسىمەن ولەكسەنى زالالسىزداندىرىپ، ارنايى ورىنعا تاستاپ، جويدىق. ال ۆەتەريناريا قىزمەتى تاعى 19 باس ءىرى قارانىڭ قاراسان اۋرۋىن جۇقتىرعانىن انىقتاعاسىن، ولار دا جويىلدى. بۇل ەكى اۋرۋ ءتۇرى دە جۇقپالى بولعاندىقتان ساقتىق شاراسىن مۇقيات ساقتاپ، تۇرعىندارعا قاۋىپتىڭ الدىن الۋ، ساقتانۋ تۋرالى تۇسىندىرمە جۇمىسى جاسالدى، – دەيدى كەگەن اۋدانىنىڭ باس مال دارىگەرى  قابىل توكەنوۆ.

وكىنىشكە قاراي، اۋدان ورتالىعىنان 18 شاقىرىم قاشىقتا جاتقان اۋىلدا جۇقپالى اۋرۋدىڭ اياق استىنان پايدا بولۋىن ماماندار ءتۇسىندىرىپ بەرە الماي وتىر. بىراق، تۇرعىندارىنا الاڭداۋىنا نەگىز بار ەكەن. اسىرەسە، پاستەرەللەز دەرتى وتە قاۋىپتى كورىنەدى. ماماندار بل اۋرۋدىڭ مالدان ادامعا جۇعۋ مۇمكىندىگى جوعارى ەكەنىن ايتادى. جانۋارلاردىڭ اعزاسىندا كوبەيەتىن پاستەرەللا باكتەرياسى ىندەتتىڭ قوزدىرعىشىنا اينالىپ، مالدىڭ تىنىس الۋ، ىشەك-قارىن جولدارىن زاقىمدايدى دا، سونىڭ كەسىرىنەن جانۋارلاردا شىرىشتى سىلەكەي پايدا بولىپ، مال جەم، شوپتەن قالادى ەكەن. ءتىپتى، باكتەريا قوزدىرعىشى اسقىنعان جاعداي مال ءولىپ، اۋرۋدىڭ ادامعا جۇعۋ قاۋىپى تۋىندايدى-مىس. ادەتتە ادام اعزاسىنا ەنگەن پاستەرەللەز تاياقشالارى وستەوميەليت، برونحوپنەۆمونيا دەرتىنىڭ اسقىنۋىنا اكەلەدى دەپ جازىلعان  مەديتسينالىق انىقتامالىقتاردا.

ال قازاقتىڭ باعزىدان ايتىلاتىن «قاراسان كەلگىر...» دەپ باستالاتىن قارعىسى وسى ءىرى قارا اۋرۋىنا قاتىستى بولسا كەرەك. ۆەتەريناريا تىلىندە قاراساندى سيىر اعزاسىنداعى ەمفيزەماتوزدى اۋرۋ قوزدىرعىشىنان پايدا بولاتىن دەرت رەتىندە سيپاتتايدى. بۇل اۋرۋ اسىرەسە ەتتى، قوڭدى ءىرى قارادا بايقالادى ەكەن. جۇعۋ قاۋىپى تومەن بولعانىمەن، ساقتىق شاراسىنان باس تارتۋعا بولمايدى دەديى ماماندار. جالپى، مال اۋرۋلارىنىڭ كەز كەلگەن ءتۇرىنىڭ الدىن الۋ ءۇشىن ولارعا دەر كەزىندە ۆاكتسينا سالۋ قاجەت كورىنەدى. دەمەك، كەگەن اۋدانى اۋماعىنداعى مال اۋرۋلارىنىڭ شىعۋىنا شارۋاشىلىقتارداعى ءىر قاراعا دەر كەزىندە ەكپە جاسالماعانى سەبەپ بولۋى مۇمكىن. قازىر ۆەتەرينارلار بولەكساز اۋىلىنداعى ءىرى قارا مالىن جۇقپالى اۋرۋعا قارسى ەمدەۋدى باستاعان. اۋداندىق ۆەتەريناريا ستانساسىنىڭ باسشىسى قابىل توكەنوۆتىڭ ايتۋىنشا، وڭىردەگى 100 باس ءىرى قاراعا ەكپە سالىنادى.

ايتپاقشى، بولەكساز اۋىلىنىڭ تۇرعىندارى ىرگەدە ورنالاسقان «Meat Processing and Service» سەرىكتەستىگىنڭ مال بورداقىلاۋ الاڭىنداعى ءىرى قارا مالىنىڭ جاپپاي قىرىلعانىنا ايعا جۋىق وتكەنىن ايتىپ، ءتيىستى زازالسىزداندىرۋ جۇمىسىنىڭ تىڭعىلىقتى جۇرگىزىلمەگەنىنە نارازى. ءارى قوجالىقتىڭ مال قوراسى اۋىلداعى ورتا مەكتەپكە جاقىن ماڭدا ورنالاسقان ەكەن.

قازىر قار استىندا قالىپ، قيعا كومىلگەن ولەكسەلەردى جيناپ العانىمەن، ك ۇلىمسى ءيىس اينالاعا تاراپ كەتكەن كورىنەدى. ونىڭ ۇستىنە مالدىق ولەكسەسى كومىلىپ، ورتەلگەن ورىن تاۋدان اعاتىن قىزىل سۋدىڭ جولىنان قازىلعان ەكەن. تۇرعىندار قار سۋى شۇقىردى شايىپ ءوتىپ، ەتەكتەگى وزەنگە قۇيىلسا، تىرشىلىكە قاجەتتى سۋ كوزىنىڭ لاستانۋىنان قاۋىپتەنەدى. تۇرعىنداردىڭ نارازىلىعىنان كەيىن اۋىلعا ارنايى بارعان اۋدان اكىمى تالعات بايەدىلوۆ ماسەلەنىڭ انىق-قانىعىن زەرتتەپ، ءتيىستى شارا قولداناتىندىعىن ايتقان.

ءبىز اتالعان ماسەلەگە وراي الماتى وبلىسىنىڭ اكىمدىگىنەن ناقتى جاۋاپ بەرۋدى سۇراعان ەدىك. وسىعان بايلانىستى وبلىس اكىمىنىڭ ءباسپاسوز قىزمەتى تومەندەگىدەي جاۋاپ جولدايدى: «Meat Processing and Service» جشس الماتى وبلىسى، كەگەن اۋدانىنىڭ بولەكساز اۋىلدىق وكرۋگىندە ورنالاسقان. بورداقىلاۋ الاڭىندا 1249 باس ءىرى قارا بار. 2020 جىلى ساۋىردە بورداقىلاۋ الاڭىندا 1000 باس ءىرى قارا ەمفيزەماتوزدىق كاربۋنكۋلعا قارسى ۆاكتسينا سالىندى. جالپى، اۋىل شارۋاشىلىعى مينيسترلىگىنىڭ «جانۋارلاردىڭ اسا قاۋىپتى اۋرۋلارىنا قارسى ۆەتەرينارلىق ءىس-شارالاردى جوسپارلاۋ جانە وتكىزۋ قاعيدالارىن بەكىتۋ تۋرالى» بۇيرىعىنا سايكەس پاستەرەللەزگە قاتىستى ەپيزوتيكالىق جاعدايدىڭ تۇراقتى بولۋىنا بايلانىستى پاستەررەللەزگە قارسى ۆاكتسيناتسيا جاساۋ جوسپارلانباعان.الايدا 2021 جىلدىڭ 1 قاڭتارىندا «Meat Processing and Service» جشس باسشىسى ب.ابدراسيلوۆتىڭ اتىنان بولەكساز اۋىلدىق وكرۋگىنىڭ ۆەتەرينارلىق پۋنكتىنىڭ مەڭگەرۋشىسىنە 2 باس ءىرى قارانىڭ ولگەنى تۋرالى اقپارات كەلىپ تۇسكەن. حابارلاما كەلگەن ساتتەن مال ولەكسەسىنەن پاتولوگيالىق ماتەريال سىناماسى الىنىپ، الماتى ايماقتىق ۆەتەرينارلىق زەرتحانا فيليالىنا وتكىزىلگەن.

زەرتتەۋ قورىتىندىسىندا ەمفيزەماتوزدىق كاربۋنكۋل جانە  پاستەرەللەز اۋرۋلارى انىقتالدى. مۇنا كەيىن كەگەن اۋدانى بولەكساز اۋىلدىق وكرۋگى اكىمىنىڭ شەشىمىمەن «Meat Processing and Service» سەرىكتەستىگى اۋماعىندا ەمفيزەماتوزدىق   كاربۋنكۋل مەن پاستەرەللەزدىڭ تىركەلۋىنە بايلانىستى كارانتين بەلگىلەنىپ، شەكتەۋ شارالارى ەنگىزىلدى» دەپ جازىلعان حابارلامادا.

سوڭعى جاڭالىقتار

ۇقساس جاڭالىقتار