پرەزيدەنت • 26 قاڭتار، 2021

قاسىم-جومارت توقاەۆ ۇكىمەتتىڭ كەڭەيتىلگەن وتىرىسىن وتكىزدى

34 رەت كورسەتىلدى

جيىنعا پرەمەر-مينيستر اسقار مامين، مەملەكەتتىك حاتشى قىرىمبەك كوشەرباەۆ، پرەزيدەنت اكىمشىلىگىنىڭ باسشىسى ەرلان قوشانوۆ، ۇكىمەت مۇشەلەرى، وبلىستاردىڭ جانە نۇر-سۇلتان، الماتى، شىمكەنت قالالارىنىڭ اكىمدەرى، ورتالىق مەملەكەتتىك ورگانداردىڭ جانە ۇلتتىق كومپانيالاردىڭ باسشىلارى قاتىستى، دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.

مەملەكەت باسشىسى ءوز سوزىندە ۇكىمەتتىڭ باستى مىندەتى ەكونوميكالىق ءوسىمدى قالپىنا كەلتىرۋ، ينۆەستيتسيا تارتۋ جانە قازاقستاندىقتاردىڭ تابىسىن ارتتىرۋ ەكەنىن اتاپ ءوتتى. پرەزيدەنت پاندەميا مەن شەكتەۋ شارالارىنان، سونداي-اق، ساۋدا بايلانىستارىنىڭ ۇزىلۋىنەن ايتارلىقتاي زارداپ شەككەن شاعىن جانە ورتا بيزنەستى قولداۋدىڭ ماڭىزدىلىعىنا نازار اۋداردى.

– بيىل شاعىن جانە ورتا بيزنەسكە قولداۋ كورسەتۋ ەڭ باستى نازاردا بولۋعا ءتيىس. ۇكىمەتكە «اتامەكەن» ۇلتتىق كاسىپكەرلەر پالاتاسىمەن بىرلەسىپ، ءبىر ايدىڭ ىشىندە وسىعان قاجەتتى ءىس-شارالار توپتاماسىن ازىرلەۋدى تاپسىرامىن.  «ەڭبەك» مەملەكەتتىك باعدارلاماسى – حالىقتى جۇمىسپەن قامتۋدىڭ نەگىزگى قۇرالى. ونىڭ «باستاۋ-بيزنەس» باعىتى بويىنشا 150 مىڭنان استام ادام وقىپ شىقتى. بىراق تەك 10 پايىزى نەسيەگە، 19 پايىزى گرانتقا يە بولدى. 100 مىڭنان استام ادام مەملەكەت قولداۋىنان تىس قالدى. اسىرەسە، باعدارلامانىڭ اۋىلداعى تۇلەكتەرىنە قارجى جەتپەي جاتىر. سوندىقتان باعدارلامانىڭ قارجى كولەمىن عانا ەمەس، ونى جۇزەگە اسىرۋ ۇستانىمدارى مەن تەتىكتەرىن قايتا قاراۋىمىز كەرەك. حالىققا بەرىلەتىن شاعىن نەسيەلەردىڭ ستاۆكاسى 6 پايىزدان اسپاۋعا ءتيىس، – دەدى مەملەكەت باسشىسى.

قاسىم-جومارت توقاەۆ ۇكىمەت مۇشەلەرى مەن اكىمدەردىڭ ساتىپ الۋداعى جەرگىلىكتى ونىمدەردىڭ ۇلەسىن ارتتىرۋ بويىنشا جۇرگىزىلگەن جۇمىستارىن سىنعا الدى. بىلتىر 9 ايدا تاۋارعا، جۇمىسقا جانە قىزمەت كورسەتۋگە قاتىستى ساتىپ الۋلاردى رەتتەۋدىڭ جالپى كولەمى 12،5 تريلليون تەڭگەنى قۇرادى. جەرگىلىكتى تاۋارلار مەن قىزمەت كورسەتۋگە بار بولعانى 6،4 تريلليون تەڭگە نەمەسە قارجىنىڭ 52 پايىزى بولىنگەن. ەكونوميكاعا اتالعان قاراجاتتىڭ جارتىسىنا جۋىعى جۇمسالماعان.

– بيۋدجەتتىڭ تريلليونداعان قارجىسىن يمپورتقا جۇمساۋعا قاقىمىز جوق. سوندىقتان بيۋدجەتتىڭ اكىمشىلەرى تىكەلەي جاۋاپ بەرەتىن بولادى. بۇل ورايدا بىزگە «سەمىز» تسيفرلار قاجەت ەمەس. ماڭىزدىسى – دۇرىس ەسەپتەۋ. قازاقستاندا تىركەلگەن زاڭدى تۇلعانىڭ كەز كەلگەن ءونىمى ءجيى ەسەپكە الىناتىنى تۋرالى اقپارات بار. ول ءوزىنىڭ تاۋارىن جەتكىزە مە، الدە يمپورتتان اكەلە مە، ونى باقىلاپ وتىرعان ەشكىم جوق. يندۋستريا جانە ينفراقۇرىلىمدىق دامۋ مينيسترلىگىنە بەرىلگەن تسيفرلاردى بەكىتىلگەن ادىستەمەگە سايكەس قايتا تەكسەرۋدى تاپسىرامىن، – دەدى پرەزيدەنت.

حالىقتى جۇمىسپەن قامتۋ ماسەلەسى بويىنشا دا بەرىلگەن ەسەپ پەن جاسالعان جۇمىستاردىڭ اراسىندا ايتارلىقتاي ايىرماشىلىقتار بار. جۇمىسپەن قامتۋدىڭ جول كارتاسىن جۇزەگە اسىرۋعا 1 تريلليون تەڭگە ءبولىندى. بۇل قارجىنىڭ 98،2 پايىزى يگەرىلگەن. باعدارلاما حالىقتى جۇمىسپەن قامتۋدا جانە ىسكەرلىك بەلسەندىلىكتى قولداۋدا ماڭىزدى ءرول اتقاردى. بىراق ونداعان، جۇزدەگەن مىڭ جۇمىس ورىندارىنىڭ اشىلعانى تۋرالى مالىمەتتى تەكسەرۋ كەزىندە ايىرماشىلىق بار ەكەنى انىقتالدى.

– ازاماتتاردى قاعاز جۇزىندە عانا جۇمىسقا ورنالاستىرۋ بەلەڭ الىپ وتىر. بىرىڭعاي اقپاراتتىق جۇيەگە ءبىر ادام تۋرالى مالىمەت قايتا-قايتا ەنگىزىلەدى. ءدال وسىنداي 15 مىڭ جاعداي تىركەلگەن. جۇمىسقا ورنالاستى دەگەن ادامداردىڭ ۇشتەن ءبىرى زەينەتاقى قورىنا قارجى اۋدارماعان بولىپ شىقتى. مۇنداي جاعداي، اسىرەسە، تۇركىستان (79%)، قىزىلوردا (43%) جانە جامبىل وبلىستارىندا (36%) انىقتالىپ وتىر. جالپى، ەڭبەكپەن قامتىلعانداردىڭ 40 پايىزعا جۋىعى «كولەڭكەدە» قالىپ قويعان. جۇمىسپەن قامتۋدىڭ جول كارتاسىنا بولىنگەن 1 تريلليوننان نەبارى 5،5 ميلليارد تەڭگە سالىق تولەنگەن. بۇل – جارتى-اق پايىز دەگەن ءسوز! مەملەكەتتىك كىرىسكە جاۋاپتى ورگاندار ماسەلەنى قاتاڭ باقىلاۋعا الۋى كەرەك. قاجەت بولسا، قۇقىق قورعاۋ ورگاندارىن دا وسى جۇمىسقا تارتامىز، – دەدى مەملەكەت باسشىسى.

قاسىم-جومارت توقاەۆ ۇكىمەتكە سالىقتىق-بيۋدجەتتىك ساياساتتى جەتىلدىرۋ جونىندە ۇسىنىستار ازىرلەۋ تاپسىردى. بىلتىر سالىق جانە كەدەن سالاسىنان تۇسكەن قارجىنىڭ كىرىس كولەمى 47 پايىزعا قىسقارعان. ايتسە دە، الدىڭعى جىلى بۇل كورسەتكىش 65 پايىزعا جەتكەن. كەدەندىك تولەمدەردىڭ جيناقتىق دەڭگەيى تومەن ەكەنى بايقالادى. تەك قىتايمەن اراداعى شەكارادا 50 مىڭعا جۋىق جالعان دەكلاراتسيا تولتىرىلعانى تۋرالى دەرەك انىقتالدى. قىتايمەن اراداعى اشىق ستاتيستيكا بويىنشا ايىرماشىلىق 5 ميلليارد دوللاردان استام قارجىنى قۇرايدى.

پرەزيدەنت جالعان كاسىپورىندار مەن ادەيى سالىق تولەمەيتىندەرگە قارسى جۇمىستى جۇيەلى تۇردە كۇشەيتۋدى تالاپ ەتتى. رەسمي باعالاۋلار بويىنشا ىشكى جالپى ءونىمنىڭ تورتتەن بىرىنە، ال دۇنيەجۇزىلىك بانكتىڭ دەرەكتەرى بويىنشا 40 پايىزعا جۋىعى «كولەڭكەلى» ايماقتا ەكەن. «كولەڭكەلى» ەكونوميكاعا قارسى كۇرەس جونىندەگى شارالاردى جۇزەگە اسىرۋ ءۇشىن ەكونوميكالىق قىلمىستارمەن كۇرەس اگەنتتىگى قۇرىلادى.

– ورتالىق مەملەكەتتىك ورگاندار باسشىلارىنىڭ اۆتوپاركىن ۇستاپ تۇرۋ ءۇشىن ايتارلىقتاي بيۋدجەت قاراجاتى جۇمسالادى. ءبىر عانا اۆتوموبيل ءۇشىن ورتاشا ەسەپپەن جىلىنا 6 ميلليون تەڭگەدەن استام قارجى شىعىندالادى. بىرقاتار ەلدە جەكە قىزمەتتىك كولىكتىڭ ورنىنا اقشالاي وتەماقى تولەۋ تاجىريبەسى ەنگىزىلگەن. بۇل تاجىريبە ءبىزدىڭ ەلدە دە، ناقتى ايتقاندا ەلوردا اكىمدىگىندە قولدانىلعان. مۇنداي ءادىس «سامۇرىق-قازىنا» قورىندا  اپروباتسيادان ءساتتى ءوتتى. بۇل قىزمەتتىك كولىكتەردىڭ سانىن ەداۋىر قىسقارتۋعا جانە اكىمشىلىك شىعىنداردى 1،5 ميلليارد تەڭگە كولەمىندە ازايتۋعا مۇمكىندىك بەردى. ۇكىمەتكە پرەزيدەنتتىڭ ءىس باسقارماسىمەن بىرلەسىپ، مەملەكەتتىك ورگانداردىڭ باسشىلارىن  قىزمەتتىك كولىكتەرمەن قامتاماسىز ەتۋدىڭ جاڭا جوباسى بويىنشا ۇسىنىستار ەنگىزۋدى تاپسىرامىن. بۇل جۇمىس ناقتى قىسقارتۋدى قاجەت ەتەدى، – دەدى قاسىم-جومارت توقاەۆ.

مەملەكەت باسشىسى پرەمەر-ءمينيستردىڭ جاڭادان تاعايىندالعان ورىنباسارى – سىرتقى ىستەر مينيسترىنە اقپان ايىنىڭ سوڭىنا دەيىن ينۆەستيتسيالاردى باسقارۋ جۇيەسىن رەفورمالاۋ جونىندە ناقتى ۇسىنىستار ەنگىزۋدى تاپسىردى. ءاربىر ەركىن ەكونوميكالىق ايماقتاردىڭ لايىقتىلىعىنا تالداۋ جاساپ، ولاردىڭ جاڭا جۇمىس مودەلدەرىن ازىرلەۋ قاجەت.

– وزدەرىنىڭ ارنايى ەكونوميكالىق ايماقتارىن ناقتى دامىتۋمەن اينالىسپايتىن اكىمدەردىڭ جاعدايى قىلسىن ۇستىندە تۇرعانىن اتاپ وتكىم كەلەدى. ءبىز ونداي ايماقتاردى جابامىز جانە ولارعا بيۋدجەت قارجىسىن شىعىندامايمىز. ءبىز بۇل پروبلەمانى تەز ارادا شەشۋىمىز كەرەك. ەكونوميكانى قايتا قالپىنا كەلتىرۋدەگى ينۆەستيتسيانىڭ ەكىنشى كوزى – بانكتەردىڭ نەسيەلەرى جانە قور نارىعى. بىراق ول دا اقساپ تۇر. ينفلياتسيانىڭ ورنىقتى تومەندەۋى، ينفلياتسيا مەن دەۆالۆاتسيانىڭ تۇراقتانۋى – اقشا-كرەديت ساياساتىن جۇمسارتۋدىڭ ماڭىزدى شارتى. سوندىقتان ۇكىمەت پەن ۇلتتىق بانك ينفلياتسيانى 2021-2022 جىلدارى 4-6 پايىزعا قايتارىپ، 2025 جىلى 3-4 پايىزعا دەيىن تومەندەتۋى كەرەك. قارجى سەكتورىنىڭ ورنىقتىلىعى – ەكونوميكانى دامىتۋدىڭ انىقتاۋشى فاكتورى، – دەدى پرەزيدەنت.

مەملەكەت باسشىسىنىڭ پىكىرىنشە، ازىق-ت ۇلىك قاۋىپسىزدىگىن قامتاماسىز ەتۋ اسا ماڭىزدى مىندەت بولىپ وتىر. وتكەن جىلى حالىقتىڭ تابىسى ازايعان كەزدە ازىق-ت ۇلىك باعاسى ارزانداي ءتۇسۋدىڭ ورنىنا، كەرىسىنشە، قىمباتتاعان. مەملەكەتتىك ورگاندار تاراپىنان باعالاردى ۇستاپ تۇرۋ، ونىڭ ىشىندە ساۋدا جەلىلەرىن جەڭىلدىكپەن نەسيەلەۋ جانە ساۋدا ۇستەمەلەرىن ورناتۋ سياقتى قابىلدانعان شارالار وڭ ناتيجە بەرگەن جوق. الەۋمەتتىك ماڭىزى بار ازىق-ت ۇلىك باعاسى 11 پايىزعا ءوستى. ونىڭ جالپى ينفلياتسياعا قوسقان ۇلەسى 60 پايىزدان استى. ۇكىمەت جوعارىدا اتالعان ماسەلەلەردى شەشۋ بارىسىندا نارىق تەتىكتەرىن نەگىزگە الا وتىرىپ، ءىس-قيمىل جيىنتىعىن ازىرلەۋى ءتيىس.

سونىمەن قاتار پرەزيدەنت جەر كودەكسىنىڭ كەيبىر نورمالارىنا جاريالانعان ءموراتوريدىڭ بيىل اياقتالاتىنىنا نازار اۋداردى. وسىعان بايلانىستى ۇكىمەتكە جەر كوميسسياسىنىڭ جۇمىسىن قايتا جانداندىرۋدى جانە قاراشا ايىنا دەيىن تۇزەتۋلەردى قابىلداۋدى تاپسىردى. ۇسىنىستار بايىپپەن تالقىلانىپ، ناقتى شەشىم قابىلدانۋى ءتيىس.

– جايىلىمدار ماسەلەسىنە ارنايى توقتالعىم كەلەدى. بۇل جەرلەر، ەڭ الدىمەن، اۋىل تۇرعىندارىنا قولجەتىمدى بولۋى كەرەك. جەرگىلىكتى اكىمدىكتەر جۇمىستى دۇرىس ۇيىمداستىرماي وتىر. سونىڭ سالدارىنان، اۋىل تۇرعىندارى مال جاياتىن جايىلىم تاپپاي قينالۋدا. اسىرەسە، الماتى، تۇركىستان وبلىستارىنان ارىز-شاعىمدار كوپ تۇسۋدە. جايىلىمداردىڭ 99 پايىزى شارۋا قوجالىقتارىنىڭ يەلىگىندە. الايدا، ونىڭ 36 پايىزىندا عانا مال جايىلادى. قالعان 46 ميلليون گەكتار جايىلىمدىق جەر بوس جاتىر. ۇكىمەتكە باس پروكۋراتۋرامەن بىرلەسىپ، بيىلعى جىلدىڭ سوڭىنا دەيىن وسىنداي جايىلىمداردى قايتارىپ الۋدى تاپسىرامىن. ونى اۋىل تۇرعىندارىنىڭ يگىلىگىنە بەرگەن ءجون، – دەدى قاسىم-جومارت توقاەۆ.

پرەزيدەنت سۋ رەسۋرستارىن ساقتاپ، ءتيىمدى پايدالانۋدى ۇلتتىق قاۋىپسىزدىك پەن ورنىقتى دامۋدىڭ كەپىلى ەكەنىن ايتتى. وسىعان وراي مەملەكەتتىك ورگانداردىڭ الدىندا سۋ رەسۋرستارىن باسقارۋ جونىندەگى ۇلتتىق جوبانى قابىلداپ، قارجىلاندىرۋدى جەدەلدەتۋ مىندەتى تۇر. ەكولوگيا ماسەلەسى ۇكىمەت پەن قوعامنىڭ ۇدايى باقىلاۋىندا بولۋى كەرەك.

– قوعامدىق باقىلاۋ قۇرالى رەتىندە ينتەراكتيۆتى كارتا دايىنداۋ قاجەت. سول ارقىلى ەكولوگيا سالاسىندا اتقارىلىپ جاتقان جۇمىستاردىڭ بارىسى مەن تيىمدىلىگىن قاداعالاۋعا بولادى. ۇكىمەتكە 2021-2025 جىلدارعا ارنالعان «جاسىل قازاقستان» ۇلتتىق جوباسىن ازىرلەۋدى تاپسىرامىن. اسىرەسە، قورشاعان ورتانى قورعاۋ ىسىنە قاجەتتى بارلىق كورسەتكىشتەردى تسيفرلاندىرۋ – ماڭىزدى مىندەتتەردىڭ ءبىرى، – دەدى قاسىم-جومارت توقاەۆ.

مەملەكەت باسشىسى قازاقستاندىقتاردىڭ باسپانا ماسەلەسىن شەشۋ ءۇشىن زەينەتاقى جيناقتارىن پايدالانۋ جونىندەگى باستاماعا دا توقتالدى. ەندىگى كەزەكتە تۇرعىن ءۇي نارىعىنداعى دۇرمەك پەن باعالاردىڭ وسۋىنە جول بەرمەۋ ءۇشىن ناقتى شارالار قابىلداۋ قاجەت. پرەزيدەنتتىڭ پىكىرىنشە، مەملەكەتتىك ورگاندار تۇرعىندار مەن قۇرىلىس كومپانيالارىنىڭ باسشىلارىنا تۇسىندىرمە جۇمىستارىن جۇرگىزىپ، نارىقتاعى الىپ-ساتارلىق وپەراتسيالارعا شەكتەۋ قويۋى كەرەك. ۇكىمەتكە ەكى اپتا ىشىندە تۇرعىن ءۇي ساياساتىن جەتىلدىرۋ بويىنشا جاڭا ۇسىنىستار توپتاماسىن ەنگىزۋ جونىندە تاپسىرما بەرىلدى.

دەنساۋلىق ساقتاۋ سالاسىن دامىتۋ ماسەلەسى ەرەكشە باقىلاۋدا. پاندەميا كەزىندە اتالعان جۇيە كۇردەلى سىناقتان ءوتىپ، سالاداعى بارشا ولقىلىقتار ايقىن كورىندى. وتكەن جىلى 156 انا ءولىمى تىركەلىپ، ءولىم-ءجىتىم 2،8 ەسەگە ارتقان.

– ۇكىمەتكە وبلىس اكىمدىكتەرىمەن بىرلەسىپ جانە كاسىبي قاۋىمداستىق مۇشەلەرىن تارتا وتىرىپ، بارلىق دەنساۋلىق ساقتاۋ ۇيىمدارىندا ينۆەنتاريزاتسيا جۇرگىزۋدى تاپسىرامىن. بۇل رەتتە، بوساندىرۋ جانە جانساقتاۋ بولىمدەرىنە، ولاردىڭ مەديتسينالىق جابدىقتارمەن، ءدارى-دارمەكپەن، قاجەتتى بۇيىمدارمەن قامتاماسىز ەتىلۋىنە باسىمدىق بەرۋ كەرەك. باس پروكۋراتۋراعا وسى ماسەلە بويىنشا ىرىكتەلگەن تەكسەرۋ جۇمىستارىن جۇرگىزۋ تاپسىرىلدى. ونىڭ قورىتىندىسى بويىنشا كىنالى ادامدارعا قاتىستى شارا قابىلداۋ قاجەت، – دەدى مەملەكەت باسشىسى.

قاسىم-جومارت توقاەۆتىڭ ايتۋىنشا، بۇگىنگى جاعدايدان ساباق الۋىمىز كەرەك. پاندەميانىڭ باستالعانىنا ءبىر جىل بولدى. جيناقتالعان تاجىريبەنى ەسكەرە وتىرىپ، ارەكەت ەتۋ قاجەت. ۇكىمەتكە «اتامەكەن» ۇلتتىق كاسىپكەرلەر پالاتاسىمەن بىرلەسە وتىرىپ، ءبىر ايدىڭ ىشىندە ەپيدەمياعا قارسى شارالارعا تەڭدەستىرىلگەن ءتاسىلدى قامتاماسىز ەتۋ ماقساتىندا يممۋندىق مارتەبە تۋرالى اقپارات قامتىلاتىن QR كودتاردى ەنگىزۋ ماسەلەسىن پىسىقتاۋ تاپسىرىلدى.

– ارينە، جاپپاي ۆاكتسيناتسيالاۋ داعدارىستى ەڭسەرۋدىڭ ناقتى ءارى جۇيەلى شاراسى بولىپ وتىر. ونى ساپالى وتكىزۋ ءۇشىن بارلىق جاعداي جاسالۋى قاجەت. دايىندىق جۇمىستارىن زەرتتەۋ كەزىندە ۆاكتسينانى ساقتاۋعا ارنالعان توڭازىتقىش جابدىقتارىنىڭ قاجەتتى كولەمى جەتىسپەسپەيتىنى انىقتالدى.  باتىس قازاقستان، ماڭعىستاۋ جانە تۇركىستان وبلىستارىندا اسا كۇردەلى جاعداي قالىپتاسىپ وتىر. ۇكىمەتكە اكىمدەرمەن بىرلەسىپ، دايىندىق جۇمىستارىن تولىق قامتاماسىز ەتىپ، 1 اقپاننان باستاپ جاپپاي ۆاكتسيناتسيالاۋعا كىرىسۋدى تاپسىرامىن. وتاندىق ۆاكتسينانىڭ تەستىلەۋى وڭ قورىتىندى بەرەدى دەپ ۇمىتتەنەمىز. وسى رەتتە، ءوزىم وتاندىق ەكپە ەكتىرەمىن، – دەدى پرەزيدەنت.

مەملەكەت باسشىسى وقۋشىلاردىڭ ءبىلىم ساپاسىنىڭ حالىقارالىق باعالاۋىنا دا نازار اۋدارىپ، مەكتەپتەردەگى ءبىلىم ساپاسىنىڭ جۇيەلى تۇردە ناشارلاعانىن ايتتى. سوندىقتان بۇل سالاعا تۇبەگەيلى وزگەرىس كەرەك.

– بۇگىندە وقۋ باعدارلاماسىنا جاڭا پاندەر ەنگىزۋ جونىندە ۇسىنىستار وتە كوپ. سوڭعى ون جىلدا 9 ءپان ەنگىزىلگەن. ءبىلىم بەرۋ – تاجىريبە الاڭى ەمەس. مۇنىڭ ءبارى نەگىزگى پاندەرگە بولىنگەن ساعاتتىڭ قىسقارۋىنا اكەپ سوعادى. سونىڭ وزىندە ەلىمىزدە وقىتۋ جۇكتەمەسى تىم جوعارى – 67 ساعات. ال فينيليانديا مەن وڭتۇستىك كورەيادا وقىتۋ جۇكتەمەسى – 39 ساعات، اقش-تا – 55 ساعات. شاكىرتتەردى وقىتۋ مەن باسقا دا دامىتۋ شارالارىنىڭ اراسىندا تەپە-تەڭدىك بولۋى اسا ماڭىزدى. الەمدىك ۇدەرىستەردى ەسكەرە وتىرىپ، ماتەماتيكا، ءتىل مەڭگەرۋ جانە ينفورماتيكا سەكىلدى پاندەرگە ەرەكشە باسىمدىق بەرگەن ءجون، – دەدى مەملەكەت باسشىسى.

سونىمەن قاتار قازاقستان تاريحى جانە دۇنيەجۇزى تاريحى پاندەرى بويىنشا بىرىڭعاي وقۋلىق ازىرلەپ، ونى ەنگىزۋ كەرەك. «Nur Otan» پارتياسىنىڭ سايلاۋالدى تۇجىرىمداماسىندا 2025 جىلعا دەيىن جاڭا 800 مەكتەپ سالۋعا ۋادە بەرىلگەن. پرەزيدەنت وسى جۇمىسقا شۇعىل كىرىسۋدى جانە بيىل 200 جاڭا مەكتەپ سالۋدى تاپسىردى.

سونداي-اق قاسىم-جومارت توقاەۆ «حالىق ۇنىنە قۇلاق اساتىن مەملەكەت» تۇجىرىمداماسى بويىنشا ازاماتتاردىڭ وتىنىشتەرىمەن جۇمىس جاساۋدى قايتا جاڭعىرتۋ ماڭىزدى دەپ سانايدى. ءوتىنىش بەرۋشىلەرمەن جۇمىس جاساۋدىڭ ساپاسىن ارتتىرۋ ءۇشىن «ە-ءوتىنىش» جاڭا اقپاراتتىق جۇيەسىن جانە «ناتيجە» ورتالىقتارىن اشۋ تاپسىرىلدى. 1 شىلدەگە دەيىن جۇيە بارلىق مەملەكەتتىك ورگانداردا ىسكە قوسىلۋى ءتيىس.

قاسىم-جومارت توقاەۆ ءسوزىنىڭ سوڭىندا ەڭ باستى مىندەت – ازاماتتاردىڭ ءومىر ساپاسىن جاقسارتىپ، تابىستارىن ارتتىرۋ ەكەنىن تاعى دا اتاپ ءوتتى. مەملەكەتتىك ورگانداردىڭ ءاربىر شەشىمى، ءاربىر ارەكەتى ەكونوميكانى دامىتۋعا جانە حالىق يگىلىگىنە باعىتتالۋعا ءتيىس.

سوڭعى جاڭالىقتار

ۇقساس جاڭالىقتار