ايماقتار • 26 قاڭتار، 2021

تاۋارلى ءسۇت فەرماسىن سالۋعا 40 ملن دوللار ينۆەستيتسيا تارتىلماق

28 رەت كورسەتىلدى

الماتى وبلىسىندا تاۋارلى ءسۇت فەرماسىنىڭ سانى كوبەيىپ كەلەدى. بۇگىندە وسىنداي 82 شارۋاشىلىق مال باسىن ءوسىرىپ، وندىرىسكە قاجەتتى ءونىم دايىنداپ وتىر ەكەن. ال ايماقتاعى ءسۇتتى سيىردىڭ سانى 25،7 مىڭ باسقا جەتكەن، دەپ حابارلايدى Egemen.kz

جالپى، وتكەن جىلدىڭ دەرەگى بويىنشا وبلىستا 547،5 مىڭ توننا تازا ءسۇت ساۋىلعان. ونىڭ ىشىندە 89 مىڭ توننا اعاردى جوعارىدا ايتقان تاۋارلى-ءسۇت فەرمالارى دايىنداپتى. ەندى بۇل كورسەتكىشتى 92 مىڭ تونناعا دەيىن جەتكىزۋ ماقساتى تۇر. وسى باعىتتا جۇمىلىپ جۇمىس باستاعان شارۋالاردىڭ ءبىر توبى پانفيلوۆ اۋدانىندا ەڭبەك ەتىپ وتىر. ولاردىڭ ءسۇت ءوندىرىسى باعىتىنداعى قادامدارى ناتيجەسىز ەمەس ەكەن.

مىسالى، جاركەنت وڭىرىندە اۋىل شارۋاشىلىعى ونەركاسىبىن جانداندىرۋعا ۇلەس قوسىپ وتىرعان شارۋاشىلىقتاردىڭ الدىڭعى لەگىندە «كوكتال اگرو» سەرىكتەستىگى تۇر. بىلتىر وسى سەرىكتەستىك 2،5 ملرد تەڭگە ينۆەستيتسيا تارتىپ، جاڭادان تاۋارلى ءسۇت فەرماسىن اشقان بولاتىن. قازىر مۇندا 110 باس اسىل تۇقىمدى ساۋىن سيىر بار. كۇيى كەلىسكەن ويسىلقارا تۇقىمىن كۇنىنە بىرنەشە مارتە ساۋعاندا، جالپى كولەمى 2600 ليتر ءسۇت جينالدى ەكەن. اعارعاندى  تالدىقورعان قالاسىنداعى «JLC ءسۇت» زاۋىتىنا جونەلتەدى. سەرىكتەستىك باسشىلىعى ءسۇت ءوندىرىسىنىڭ اياسىن كەڭەيتپەكشى. جاقىندا اۆستريا ەلىنەن 189 باس تۇقىمى اسىل ساۋىن سيىر ساتىپ اكەلىپتى.

«التىن شىققان جەردى بەلدەن قاز» دەگەندەي، پانفيلوۆتىق شارۋالار تاۋارلى ءسۇت فەرماسىن اشۋدىڭ تيىمدىلىگىن ءتۇسىنىپ، تاعى ءبىر ءوندىرىس ورىنىن اشپاقشى. اۋدانداعى «Al Cut» سەرىكتەستىگى دە ءوز فەرماسىنىڭ ىرگەسىن كوتەرىپ جاتىر ەكەن. جەر اياعى كەڭي سالا قۇرىلىس باستالاتىن تاۋارلى ءسۇت فەرماسىن سالۋعا 40 ملن اقش دوللارى كولەمىندە ينۆەستيتسيا قۇيىلۋى ءتيىس. زاماناۋي ۇلىگىدە جۇمىس ىستەيتىن ءسۇت فەرماسىنىڭ قۇرىلىسى ءۇش كەزەڭ بويىنشا جۇرگىزىلىپ، 2023 جىلى تولىقتاي اياقتالماق.

قازىر «Al Cut» سەرىكتەستىگى 1200 باس ءىرى قارا ساتىپ الۋعا كەلىسىم شارت جاساسىپ تا قويىپتى. ال اۋدان اكىمدىگى ءوندىرىس ورىنىن اشۋعا ارنايى ورىن ءبولىپ وتىر. مۇنىڭ سىرتىندا مال باعۋ مەن جەم-ءشوپ وسىرۋگە دە قولايلى جەر بەرىلگەن ەكەن. ەندى بولاشاق تاۋارلى ءسۇت فەرماسىنىڭ اۋماعى 87 گەكتارعا جەتىپ، باسقا دا قاجەتتىلىك ءۇشىن 2400 گەكتار سۋارمالى جەر جانە يگەرىلمەك. بۇگىندە قاجەتتى ورىنعا 87 گەكتار مەن 2400 گەكتار سۋارمالى جەر بولىنگەن. فەرما جۇمىسىن باستاعان ساتتە ءسۇت فەرماسىندا 100 ادامعا دەيىن جۇمىس ورىنى اشىلسا، كۇردەلى جەم وندىرۋگە تاعى 150 ادام جۇمىسپەن قامتىلماق.

– جازيرالى جاركەنت وڭىرىندە مال باسى كوبەيىپ، ەگىن ءتۇسىمى ارتىپ وتىر. وتكەن جىلى اۋىل شارۋاشىلىعى سالاسىندا 51 ملرد  200 ملن تەڭگەنىڭ ءونىمى ءوندىرىلدى. ياعني، تازا ءتۇسىم ارعى جىلمەن سالىستىرعاندا 2،5 ملرد تەڭگەگە ارتتى. ءىستىڭ ىلگەرلەۋىنە مەملەكەت تاراپىنان جاسالعان قولداۋ دا ۇيىتقى بولۋدا. ونىڭ ىشىندە ەتتى، ءسۇتتى مال باسىن كوبەيتۋگە بەرىلگەن سۋبسيديا كولەمى ارتىپ، ەگىنشىلىكتى دامىتۋعا قارجىلاي دا، تەحنيكالىق جاعىنان دا دەمەۋ بولىپ وتىر.  ماسەلەن، بىلتىر اۋىل شارۋاشىلىعى سالاسىن دامىتۋعا بولىنگەن 1 ملرد 130 ملن تەڭگەگە قاجەتتى تەحنيكا ساتىپ الدىق، – دەيدى پانفيلوۆ اۋدانىنىڭ اكىمى تالعات ومىراليەۆ.

سوڭعى جاڭالىقتار

ۇقساس جاڭالىقتار