بۇگىن, وبلىس اكىمى قىرىمبەك كوشەرباەۆ باستاعان دەلەگاتسيا ەلباسىنىڭ قولىنان «قازاقستاننىڭ ەڭبەك ەرى» اتاعىن العان بەلگىلى كاسىپكەر, «ابزال ي ك» تولىق سەرىكتەستىگىنىڭ ديرەكتورى ابزال ەراليەۆتى قىزىلوردا اۋەجايىنان كۇتىپ الدى. بۇل تۋرالى وبلىس اكىمىنىڭ ءباسپاسوز قىزمەتى حابارلادى.
سىر جۇرتشىلىعى ەڭبەگى ەلەۋلى ازاماتتى گۇل شوقتارىمەن جانە شاشۋمەن كۇتىپ الدى. جەرلەستەرىنىڭ مەرەيلى قۋانىشىنا ورتاقتاسقان ازاماتتار شىنايى تىلەكتەرىن ءبىلدىردى. ايتىسكەر اقىن مۇحتار نيازوۆ جىر جولدارىن ارناسا, وبلىستىق ارداگەرلەر كەڭەسىنىڭ توراعاسى سەيىلبەك شاۋحامانوۆ لەبىزىن جەتكىزىپ, باتاسىن بەردى. ودان كەيىن جۋرناليستەرگە سۇحبات بەرگەن ابزال ەراليەۆ ەڭبەك ەلدىكى ەكەنىن ەسكە سالىپ ءوتتى.
جالپى, مەملەكەتتىك ناگرادا بەلگىلى كاسىپكەرگە قازاقستاننىڭ الەۋمەتتىك-گۋمانيتارلىق دامۋىنداعى اسا ۇزدىك جەتىستىكتەرى, بەلسەندى قوعامدىق قىزمەتى ءۇشىن بەرىلىپ وتىر. بۇل رەتتە ول باسقاراتىن كومپانيانىڭ كۇرىش ونىمدىلىگى جونىنەن وبلىستا كوش باستاپ تۇرعانىن اتاپ وتكىمىز كەلەدى.
باقىتبەك كەنەش ۇلى.
دەرەككوز: وبلىس اكىمىنىڭ ءباسپاسوز قىزمەتى
