2020 جىلى سالىمشىلار شوتتارىنا 1,2 ترلن تەڭگە تازا ينۆەستيتسيالىق كىرىس تۇسكەن. بۇل 2019 جىلمەن (641,8 ملرد تەڭگە) سالىستىرعاندا ەكى ەسەگە ارتىق كورسەتكىش. 2020 جىلى ينفلياتسيا 7,5 پايىز بولعان كەزدە تابىستىلىق 10,92 پايىزدى قۇراعان.
جەكە زەينەتاقى شوتتارىنا (جزش) تۇسەتىن, ەسەبىن بجزق جۇرگىزەتىن زەينەتاقى جارنالارىن زەينەتاقى اكتيۆتەرىن سەنىمگەرلىكپەن باسقارۋشى ۇلتتىق بانك ءتۇرلى قارجى قۇرالدارىنا ينۆەستيتسيالايدى. سالىمشىلاردىڭ (الۋشىلاردىڭ) زەينەتاقى جيناقتارىنىڭ سوماسى زەينەتاقى اكتيۆتەرىن ينۆەستيتسيالاۋ ناتيجەلەرىنە سايكەس كۇن سايىن قايتا ەسەپتەلەدى جانە قايتا باعالانادى. ينۆەستيتسيالىق تابىستىڭ قۇرامىنا باعالى قاعازدار (سالىمدار جانە باسقا دا وپەراتسيالار) بويىنشا سىياقى, قارجى قۇرالدارىن نارىقتىق قايتا باعالاۋ, ۆاليۋتالىق قايتا باعالاۋ, سىرتقى باسقارۋداعى اكتيۆتەر بويىنشا كىرىستەر جانە تاعى باسقا قۇرالدار كىرەدى.
«جالپى العاندا, بارلىق زەينەتاقى اكتيۆتەرى بجزق-عا بىرىكتىرىلگەن ساتتەن باستاپ ۇلتتىق بانك قامتاماسىز ەتكەن ينۆەستيتسيالىق تابىس 4,7 ترلن تەڭگەگە جەتتى. 2021 جىلدىڭ 1 قاڭتارىنا زەينەتاقى جيناقتارىنىڭ جالپى كولەمىندەگى تازا ينۆەستيتسيالىق تابىستىڭ ۇلەسى 34,5 پايىزدىقۇرادى. ەگەر قازاقستاننىڭ جيناقتاۋشى زەينەتاقى جۇيەسى قۇرىلعان 1998 جىلدان بەرگى كەزەڭدى الاتىن بولساق, تازا ينۆەستيتسيالىق تابىس 5,5 تريلليون تەڭگەدەن استى. وسى ۋاقىت ىشىندە ينۆەستيتسيالىق كىرىستىلىك ءوسۋ قورىتىندىسىمەن 602,90 پايىز بولدى. ال ينفلياتسيا 496,65 پايىز. وسىلايشا 2021 جىلعى 1 قاڭتارداعى جاعداي بويىنشا زەينەتاقى اكتيۆتەرىنىڭ ناقتى تابىستىلىعى 106,25 پايىزعا تەڭ» دەلىنگەن بجزق حابارلاماسىندا.
بجزق حابارلاۋىنشا, ينۆەستيتسيالىق باسقارۋ مەن زەينەتاقى اكتيۆتەرىن ەسەپكە الۋدىڭ بارلىق جۇيەسى اشىق: ءاربىر سالىمشى ءوزىنىڭ ينۆەستيتسيالىق تابىسىن enpf.kz سايتىنداعى جەكە كابينەتتەن نەمەسە ۇيالى قوسىمشانىڭ كومەگىمەن باقىلاي الادى. بجزق-نىڭ زەينەتاقى اكتيۆتەرىن ينۆەستيتسيالىق باسقارۋ جانە زەينەتاقى اكتيۆتەرى ورنالاستىرىلعان قارجى قۇرالدارى تۋرالى اقپارات قوردىڭ رەسمي سايتىنداعى (www.enpf.kz) «كورسەتكىشتەر/ينۆەستيتسيالىق قىزمەت» بولىمىندە جاريالانىپ وتىرادى.
