قازاقستان • 25 قاڭتار، 2021

قازاقستاندىقتاردىڭ وزگە ەلدەردەن زەينەتاقى الۋىن قامتاماسىز ەتەتىن كەلىسىم كۇشىنە ەندى

114 رەت كورسەتىلدى

ەۋرازيالىق ەكونوميكالىق وداق ەلدەرى (ەاەو) ءوزارا ۋاعدالاسقان وداققا مۇشە مەملەكەتتەردىڭ ەڭبەكشىلەرىن زەينەتاقىمەن قامسىزداندىرۋ تۋرالى كەلىسىمىنىڭ 2021 جىلدىڭ 1 قاڭتارىنان باستاپ كۇشىنە ەنگەنى حابارلاندى.

بىرىڭعاي جيناقتاۋشى زەينەتاقى قورىنىڭ حابارلاۋىنشا، كەلىسىمنىڭ نەگىزگى ماقساتى – ەڭبەكشىلەردىڭ زەينەتاقى قۇقىقتارىن جۇمىسقا ورنالاسقان مەملەكەتتىڭ ازاماتتارى سياقتى جاعدايلاردا قالىپتاستىرۋ، ساقتاۋ جانە ىسكە اسىرۋ.كەلىسىمگە سايكەس ەڭبەكشىلەر بولىپ ەاەو-عا مۇشە باسقا مەملەكەتتىڭ اۋماعىندا ەڭبەك نەمەسە وزگە دە قىزمەتتى جۇزەگە اسىرۋ ارقىلى زەينەتاقى قۇقىقتارى قالىپتاستىرىلاتىن نە قالىپتاستىرىلعان  قازاقستان، رەسەي فەدەراتسياسى، قىرعىزستان، ارمەنيا جانە بەلارۋس ەلدەرىنىڭ ازاماتتارى ەسەپتەلەدى.

كەلىسىم اياسىندا وداقتىڭ ءبىر ەلىنەن ەكىنشى ەلىنە زەينەتاقىنى ەكسپورتتاۋ ءتارتىبى مەن تەتىگىايقىنداپ، زەينەتاقى الۋ قۇقىعىن انىقتاۋ ءۇشىن ەاەو مەملەكەتتەرىندەگى جۇمىس ءوتىلىن جيناقتاۋكوزدەلەدى.

«ەڭبەكشىنى مەديتسينالىق كۋالاندىرۋ، ونىڭ ىشىندە مۇگەدەكتىگى بويىنشا زەينەتاقى تاعايىنداۋ بارىسىندا سىرتتاي مەديتسينالىق كۋالاندىرۋ ماسەلەسى رەتتەلدى. سونداي-اق، كەلىسىم كۇشىنە ەنگەنگە دەيىن جانە ودان كەيىنگى جۇمىس كەزەڭدەرى ءۇشىن زەينەتاقى تاعايىنداۋ مەن تولەۋ ءتارتىبىن ايقىندايتىن وتپەلى ەرەجەلەر بەكىتىلدى. ەاەو-عا مۇشە ءاربىر مەملەكەتتىڭ ەڭبەك ەتۋشىگە زەينەتاقىنىڭ جۇمىس كەزەڭىندە جانە جۇمىسقا ورنالاسقان ەلدەگى زەينەتاقى جارنالارىنىڭ اۋدارىمدارىنا بارابار بولىگىن تولەيتىنىن ەسكەرە وتىرىپ، 01.01.2021ج. باستاپ ەڭبەكشىلەر ەاەو-عا مۇشە مەملەكەتتەردە جۇمىس بەرۋشىلەرمەن ەڭبەك قاتىناستارىن رەسمي رءاسىمدەۋلەرى، ياعني مىندەتتى تۇردە ەڭبەك نەمەسە ازاماتتىق-قۇقىقتىق شارتتاردى ۋاقىتىلى جاساسۋلارى قاجەت» دەلىنگەن بجزق حابارلاماسىندا.

بۇل رەتتە كەلىسىمگە سايكەس جيناقتاۋشى زەينەتاقىنى، سونداي-اق، مۇگەدەكتىگى بويىنشا جانە اسىراۋشىسىنان ايرىلۋ جاعدايى بويىنشا ەڭبەك (ساقتاندىرۋ) زەينەتاقىلارىن قوسپاعاندا، زەينەتاقى الۋ قۇقىعى ەڭبەككەردىڭ مۇشە مەملەكەتتىڭ اۋماعىندا جيناعان  كەمىندە تولىق 12 اي جۇمىس ءوتىلى بولعان كەزدە (كەلىسىم كۇشىنە ەنگەننەن كەيىن)، سول مەملەكەتتىڭ زاڭناماسىنا سايكەس تولەنەدى.

قازاقستاندا بۇل كەلىسىمدى جۇزەگە اسىراتىن قۇزىرەتتى ورگان – بجزق. ياعني، ازاماتتار ءتۇرلى سۇراقتار بويىنشا وسى ورگانعا جۇگىنە الادى.

سوڭعى جاڭالىقتار

ۇقساس جاڭالىقتار