قوعام • 25 قاڭتار، 2021

جاڭاقالا جىگىتتەرىنىڭ جاقسى ءىسى

695 رەت كورسەتىلدى

باتىس قازاقستان وبلىسىنىڭ جاڭاقالا اۋدانىندا جەرگىلىكتى كاسىپكەرلەر، شارۋا قوجالىقتارى مال ازىعىنان تاپشىلىق كورىپ وتىرعان اۋىلداستارىنا قامقورلىق جاساپ، تەگىن ءشوپ پەن جەم تاراتۋدا.

وتكەن جىلى باتىس قازاقستان وبلىسىنىڭ ءبىراز جەرىندە قۋاڭشىلىق بولىپ، ءشوپ شىقپادى. حالىق ءتورت ت ۇلىك مالىنا قاجەتتى ازىقتى جىلداعىداي تولىق جيناپ الا المادى. سونىڭ ءبىرى – جاڭاقالا اۋدانى. باسىن رەسەي جەرىنەن الاتىن قاراوزەن مەن سارىوزەن سۋالىپ، ايگىلى قامىس-سامار كولدەرى بىرىنەن سوڭ ءبىرى قۇرعاپ قالدى. شابىندىق سۇيىلدى. ءالى كەلگەندەر ءشوپتى قاراتوبە، شىڭعىرلاۋ اۋداندارىنان الدىرىپتى. بىراق الىستان الدىرۋعا ەكىنىڭ ءبىرىنىڭ قاۋقارى جەتپەيدى عوي. مىنە، ناتيجەسىندە قىس ورتاسى بولماي جاتىپ، جەم-شوپتەن تارىققان وتباسىلاردىڭ جانايقايى ەستىلە باستاپتى.

وسى ماسەلەگە الدىمەن كوڭىل اۋدارىپ، اۋىل ازاماتتارىنىڭ اراسىنان ءۇن قوسقان – مەكتەپ مۇعالىمى، جاڭاقالا اۋداندىق قوعامدىق كەڭەس مۇشەسى رۋسلان ورازاليەۆ بولدى.

1

- قازاق «قىستىڭ قامىن جاز ويلا» دەگەن. بىراق بيىلعى جازدا قىستىڭ قامىن ويلاۋ تۇگىلى «بايتال تۇگىلى باس قايعى» بولىپ، ىندەتتەن قورىققاننان ۇيدەن شىعۋدىڭ ءوزى مۇڭ بولدى عوي. ونىڭ ۇستىنە «جۇت جەتى اعايىندى» دەمەكشى، قۋاڭشىلىق ەلدىڭ ەزىلگەن ەڭسەسىن ەزىپ جىبەردى. ءبىزدىڭ جاڭاقالا - مال شارۋاشىلىعىمەن اينالىساتىن اۋدان. حالىقتىڭ تۇرمىس-تىرشىلىگىنىڭ، كۇن كورىسىنىڭ باستى كوزى دە وسى مال شارۋاشىلىعى. الايدا، كۇنى بۇگىن اۋىل تۇرعىندارىنىڭ مال ازىعى تاۋسىلۋعا از-اق قالدى. ءتىپتى كەيبىر اۋلادا تاۋسىلدى دەۋگە دە بولادى. قولداعى ازىن-اۋلاق مالىمىزدى ءوزىمىز امان الىپ قالۋدىڭ جولىن ىزدەمەسەك، قامىن جاساماساق، قۇر تاياققا سۇيەنىپ قالماسىمىزعا كىم كەپىل؟! بىرىگەتىن، بىرلەسىپ ارەكەت ەتەتىن ۋاقىت كەلدى، - دەيدى رۋسلان.

رۋسلاننىڭ جەرگىلىكتى كاسىپكەرلەرگە، قولىندا كۇشى بار شارۋا قوجالىقتارىنا ۇندەۋ جولداعان الەۋمەتتىك جەلىدەگى جازباسىن بىردەن قولداعان – كوپجاسار اۋىلىنداعى «مۋسا» شارۋا قوجالىعىنىڭ جەتەكشىسى تىلەگەن مۋسين بولدى.

«اتالارمىز «ۋ ىشسەڭ رۋىڭمەن»، «ولە جەگەنشە بولە جە» دەگەن عوي. ءىنىم ەربول ەكەۋمىزدىڭ اتىمىزدان 120 رۋلوندى جاعدايى ەڭ قيىن، ساتۋ الۋ مۇمكىندىگى جوق وتباسىلارىنا تەگىن بەرە الامىز. ءشوپتىڭ كىمگە بەرىلەتىنىن رۋسلان ءوزى انىقتاسىن. ەلدە شارۋاشىلىعى ىرگەلى، اۋقاتتى ازاماتتار بار عوي. ولار دا ءۇن قوسادى دەپ سەنەمىن. ءتىپتى تەگىن بەرمەسە دە، باعاسىن ارزانداتىپ، تايلانعان ءشوپتىڭ ءار داناسىن ورتاشا 6 مىڭ تەڭگەدەن بەرسە دە ۇلكەن كومەك بولار ەدى» دەپ جازدى تىلەگەن تەمىرجان ۇلى رۋسلاننىڭ باستاماسىن قولداپ.

وسىلايشا جاڭاقالا اۋدانىندا جاقسى ءىستىڭ جارىسى باستالدى. جەرگىلىكتى كاسىپكەرلەر شاما-شارقىنشا قايىرىمدىلىق شاراسىنا جۇمىلدى. رۋسلان ورازاليەۆتىڭ ايتۋىنشا، ءۇش كۇننىڭ ىشىندە اۋدان اۋماعىندا 52 وتباسىنا 188 تاي ءشوپ تەگىن تاراتىلعان.

2

- اقىلداسىپ قۇرىلعان بىرنەشە ادام اۋەلى ءشوپ سۇراعان جانداردىڭ تۇرمىس-تىرشىلىگىمەن، مال-جانىمەن مۇقيات تانىسىپ شىقتىق. ءسويتىپ، ىشىندەگى ەڭ مۇقتاج وتباسىلارىن تاڭدادىق. ولاردىڭ ىشىندە ءى توپ مۇگەدەكتەرى، 8-9 بالالى وتباسىلار بار. «جاقسىلىق قىلساڭ ءبۇتىن قىل» دەگەندەي، ءشوپتى ارقايسىنىڭ اۋلاسىنا ءوزىمىز اپارىپ، ءتۇسىرىپ بەرەمىز، - دەيدى رۋسلان.

سونىمەن، قايىرىمدىلىق شاراسىنا تىلەگەن تەمىرجان ۇلىنىڭ «مۋسا» شارۋا قوجالىعىنان باسقا، «نۇر اسىل» جانە «امينەليا» شارۋا قوجالىقتارى 10 رۋلوندى مۇقتاج ادامدارعا تەگىن، 30 رۋلوندى قولجەتىمدى باعامەن بەرىپتى. باقتيار جازباەۆ پەن ابىلاي ساعىنتاەۆ ەسىمدى جومارت جاندار باسقاراتىن «ارسەن» جانە «نۇراسىل» قوجالىقتارى جاڭاقالاداعى مۇقتاج جاندارعا 58 رۋلون ءشوپ تەگىن ۇيلەستىرگەن. ءبىر قۋانارلىعى، جاڭاقالا اۋداندىق پوليتسيا ءبولىمىنىڭ باستىعى پوليتسيا پودپولكوۆنيگى بيجان تورەمۇراتوۆ اۋىلعا ءشوپ اكەلگەن تىركەمەلى تراكتورلاردىڭ قاۋىپسىزدىگىن قامتاماسىز ەتىپ، ارنايى ەكيپاج قوسىپتى.

- ەل ىشىندە، اسىرەسە اۋدان ورتالىعىندا مال ازىعىنا مۇقتاج وتباسىلار كوپ ەكەن. ءبارىن قامتىپ ۇلگەرمەي جاتىرمىز. ەندى ەرتەڭ جەم تاراتىپ باستايمىز، - دەدى رۋسلان بىزگە تەلەفون ارقىلى.

جەمدى دە جاناشىر ازاماتتار ورتاق قورعا تەگىن ۇسىنىپ جاتىر ەكەن. مىسالى، «اقتورعاي» جەكە كاسىپكەرى اقىلباي شاڭگەرەەۆ، «جانىس» شق باسشىسى مەڭدىبەك تىلەكقابىلوۆ، «ورازعالي» شق باسشىسى قادىربەك ايۋپوۆ، «سايات» شارۋا قوجالىعى ارقايسىسى 20 قاپشىقتان جەم ۇسىنعان. ماحامبەت بەسپاەۆ («مۇراگەر» شق)، باۋىرجان قاپانوۆ («بەك» شق)، ناۋرىز قۇرماشەۆ («ناۋرىز شق)، اسكەربەك ايۋپوۆ («راۋان» جك)، جامبىل ءسۇيىنوۆ ء(«سۇيىنوۆ» شق)، نۇربول مۋسين («ەروش» جك)، نۇربول وڭعاروۆ («نۇربول» جك) تا ارقايسىسى 5-10 قاپشىق جەمدى تەگىن بەرىپ جاتىر. سالامات سەرىك ۇلى دەگەن ازامات 100 وتباسىنىڭ ارقايسىسىنا 5 قاپشىقتان جەم تاراتاتىنىن جاريالاعان.

جاڭاقالاداعى جومارت جانداردىڭ جاقسىلىق ەستافەتاسى جالعاسۋدا. 

P.S. وسى ءىستىڭ باسى-قاسىندا جۇرگەن رۋسلان ورازاليەۆتىڭ تەلەفونىنا سوڭعى مالىمەتتەردى الۋ ءۇشىن بىرنەشە مارتە حابارلاسىپ، الا الماپ ەدىك. الگىندە ءوزى قوڭىراۋ شالدى. ء«شوپ ءتۇسىرىسىپ ءجۇر ەدىم، ەستىمەي قالىپپىن. قازىر ءشوپ اكەلگەن جىگىتتەرگە ءشاي بەرۋ ءۇشىن اسحاناعا الىپ بارا جاتىرمىن. سوناۋ قىردان ءشوپ جەتكىزىپ، ەلدى قۋانتقان ازاماتتاردى قۇر جىبەرگەنىم ۇيات بولار» دەيدى رۋسلان.

 

باتىس قازاقستان

سوڭعى جاڭالىقتار

ەسىل وزەنىنە جاڭا كوپىر سالىنادى

ايماقتار • بۇگىن، 15:16

شىعىس قازاقستان «جاسىل» ايماقتا

ايماقتار • بۇگىن، 12:15

دوللار ارزانداپ، مۇناي قىمباتتادى

ەكونوميكا • بۇگىن، 11:36

قىركۇيەكتە حالىق ساناعى باستالادى

قازاقستان • بۇگىن، 09:47

بۇگىن ەلىمىزدە قاتتى ىستىق بولادى

قازاقستان • بۇگىن، 09:05

بەكىرەگە قويىلعان بەلگى

ايماقتار • بۇگىن، 07:45

«COVID-19» سپەكتاكلى قويىلدى

ونەر • بۇگىن، 07:43

ەركىن جۇرگىڭ كەلسە، ەكپە سالدىر

مەديتسينا • بۇگىن، 07:22

شابان قيمىل شاڭ قاپتىرماسىن

تەحنولوگيا • بۇگىن، 07:20

نە ەكسەڭ، سونى ورارسىڭ

قازاقستان • بۇگىن، 07:17

«استانا» ۇزاپ بارادى

فۋتبول • بۇگىن، 07:07

ۇقساس جاڭالىقتار