ايماقتار • 25 قاڭتار، 2021

ەلوردادا قىلمىس سانى 20%-عا ازايعان

5 رەت كورسەتىلدى

نۇر-سۇلتان قالاسىنىڭ پوليتسيا دەپارتامەنتى وتكەن جىلدىڭ قورىتىندىسىن جاريالادى، دەپ حابارلايدى اكىمدىكتىڭ رەسمي سايتى.

پوليتسەيلەردىڭ اقپاراتىنا سايكەس، 2020 جىلى قولدانىلعان شارالاردىڭ ناتيجەسىندە قىلمىس سانى 30%-عا ازايدى. ۇرلىق 54%-عا، توناۋ 56%-عا ازايدى.

قوعامدىق ورىنداردا، كوشەلەردە، ماس كۇيىندە جاسالاتىن قىلمىس جانە كامەلەتكە تولماعاندار اراسىندا قىلمىس سانى ەداۋىر ازايدى. قىلمىستىڭ بارلىق ءتۇرى بويىنشا ءىستى اشۋ جاقساردى. سونداي-اق جول-كولىك وقيعالارىنىڭ سانى 17،2%-عا، ولاردا زارداپ شەككەندەر 24،9%-عا، قازا بولعاندار 13،9%-عا ازايدى. ماس كۇيىندە كولىك جۇرگىزگەنى ءۇشىن 1000-عا جۋىق جۇرگىزۋشى اكىمشىلىك قاماۋعا الىندى.

وتكەن جىلى ەسىرتكى قىلمىسىنىڭ 903 فاكتىسى انىقتالدى. زاڭسىز اينالىمنان 264 كگ ەسىرتكى زاتى تاركىلەندى. جوعارى قوعامدىق قاۋىپتى ەسكەرە وتىرىپ، ەسىرتكىنىڭ تارالۋ ارنالارىن جانە سينتەتيكالىق ەسىرتكىلەردى دايىنداۋ جونىندەگى جاسىرىن ەسىرتكى زەرتحانالارىنىڭ قىزمەتىن انىقتاۋعا جانە جولىن كەسۋگە باسا نازار اۋدارىلادى. پوليتسياعا قالا تۇرعىندارى بەلسەندى تۇردە كومەكتەسۋدە. ولاردىڭ قىراعىلىعىنىڭ ارقاسىندا باس-اياعى 109 جارنامالىق سايت بۇعاتتالعان.

پاندەميا جاعدايىندا نۇر-سۇلتان پوليتسەيلەرى كارانتيندىك شارالاردى ساقتاۋ بويىنشا ۇلكەن جۇمىس جۇرگىزدى، ول بۇگىنگە دەيىن جالعاسۋدا. 2020 جىلى مونيتورينگتىك موبيلدىك توپتار سانيتارلىق نورمالاردىڭ ەكى جارىم مىڭنان استام بۇزىلۋىن انىقتادى.

«پوليتسيا جۇمىسى قۇقىقتىق ءتارتىپتى، قوعامدىق قاۋىپسىزدىكتى قامتاماسىز ەتۋگە، وتباسىلىق-تۇرمىستىق قۇقىق بۇزۋشىلىقتار مەن جاسوسپىرىمدەر قىلمىسىنىڭ الدىن الۋعا، سونداي-اق ازاماتتاردىڭ سەنىم دەڭگەيىن ارتتىرۋعا باعىتتالاتىن بولادى»، دەپ ءمالىم ەتتى ەلوردالىق پوليتسيا دەپارتامەنتىنىڭ باستىعى گەنەرال-مايور ەرجان سادەنوۆ.

ەلوردانىڭ باس پوليتسەيى 2021 جىل «قۇقىق بۇزۋشىلىقتاردىڭ الدىن الۋ جىلى» دەپ جاريالانعانىن اتاپ ءوتتى. سوندىقتان ەلوردالىق ءتارتىپ ساقشىلارىنىڭ جۇمىسى وتباسىلىق-تۇرمىستىق قاتىناستار سالاسىنداعى قۇقىق بۇزۋشىلىقتاردىڭ الدىن الۋدى كۇشەيتۋگە باسا نازار اۋدارا وتىرىپ، «پوليتسيا قادامدىق قولجەتىمدىلىكتە» قاعيداتىنا نەگىزدەلەتىن بولادى.

سوڭعى جاڭالىقتار

ۇقساس جاڭالىقتار