كارديولوگيا ينستيتۋتىندا باۋىردى تەكسەرەتىن بىرەگەي ۋدز اپپاراتى ىسكە قوسىلدى

قوعام • 23 قاڭتار، 2021

كارديولوگيا ينستيتۋتىندا باۋىردى تەكسەرەتىن بىرەگەي ۋدز اپپاراتى ىسكە قوسىلدى

60 رەت كورسەتىلدى

الماتىداعى كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا ينۆازيۆتىك ەمەس ەلاستو جانە ستەاتوومەتريامەن قوسىمشا فۋنكتسيونالدىق دياگنوستيكا جاساۋ مۇمكىندىگى بار Hitachi اloka Arietta بىرەگەي ۋدز اپپاراتى پايدالانۋعا بەرىلدى.

ايناش ەسالى

ەلاستومەتريا باۋىردىڭ زاقىمدانۋ دەڭگەيىن دۇرىس باعالاۋعا جانە اۋرۋدى بولجاۋعا، باۋىردىڭ سوزىلمالى ديففۋزدىق اۋرۋلارىنىڭ ديناميكاسىن، ياعني گەپاتيتتىڭ ءورشۋى مەن ونىڭ تسيرروزعا اۋىسۋىن باقىلاۋعا، باۋىرداعى ونكولوگيالىق وشاقتى انىقتاۋعا، سونىمەن قاتار شەكتەۋلەرى بار باۋىردىڭ قاجەتسىز بيوپسياسىن جاساتپاۋعا مۇمكىندىك بەرەدى. ال بيوپسيا جاساعان كەزدە باۋىر پارەنحيماسىنىڭ تەك ازداعان بولىگى زەرتتەلەدى، فيبروتيزاتسيا دەڭگەيى سۋبەكتيۆتى تۇردە انىقتالادى، پاتسيەنت ءۇشىن جايسىزدىقتار تۋىندايدى، اسقىنۋ قاۋىپتەرى پايدا بولادى جانە قارسى كورسەتكىشتەرى بار.

كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ فۋنكتسيونالدىق، ۋلترادىبىستىق جانە ساۋلەلىك دياگنوستيكا بولىمشەسىنىڭ ۋدز دارىگەرى زۋلفيا راحيموۆانىڭ ايتۋىنشا، جاڭا ءادىس پاتسيەنت ءۇشىن وتە جايلى، سەبەبى ول ەش جاراقاتسىز جانە قاۋىپسىز جاسالادى، زەرتتەۋ جۇرگىزۋگە ونىڭ كەرى كورسەتكىشتەرى جوق، بالالارعا قولدانىلادى، پاتسيەنتتى الدىن الا تەكسەرۋدىڭ، دايىنداۋدىڭ، ستاتسيوناردا جاتۋىنىڭ قاجەتى جوق. ەكونوميكالىق جاعىنان دا بيوپسياعا قاراعاندا ارزان.

زۋلفيا نيازوۆنا ايتىپ وتكەندەي، تەكسەرۋگە 10-15 مينۋت ۋاقىت كەتەدى، ناتيجەسى پاتسيەنتكە تەكسەرىلگەننەن كەيىن بىردەن بەرىلەدى، باۋىردىڭ فيبروسكانيرلەۋى پاتسيەنتكە بىرنەشە رەت جۇرگىزىلۋى مۇمكىن، بۇل ديسپانسەرلىك باقىلاۋ مەن تەراپيانىڭ تيىمدىلىگىن باقىلاۋ كەزىندە ماڭىزدى.

ددۇ مالىمەتتەرى بويىنشا، ادامداردىڭ 30%-ى، ياعني جەر شارىنداعى شامامەن 2 ملرد ادامدا باۋىردىڭ سوزىلمالى ديففۋزدىق اۋرۋلارى بار. ولاردىڭ ىشىندە ۆ جانە س گەپاتيتتەرى دۇنيە جۇزىندەگى ءولىم مەن مۇگەدەكتىلىك سەبەپتەرىنىڭ «وندىعىنا» كىرەدى.

اۋرۋدىڭ بولجامىن انىقتاۋ جانە وعان ناقتى ەم تاعايىنداۋ ءۇشىن باۋىر فيبروزى، ستەنوزىن (مايلانىپ زاقىمدانۋ) دەر كەزىندە تابۋ جانە انىقتاۋدىڭ ماڭىزى زور. وكىنىشكە وراي، باۋىردىڭ ستاندارتتى ەمى (الت، است جانە ۋدز زەرتحانالىق ادىستەرى) فيبروتيكالىق وزگەرىستەردىڭ دارەجەسىنە سايكەس كەلە بەرمەيدى. ءتىپتى فيبروزدىڭ ايقىن كورىنۋ دارەجەسىندە دە قالىپتى بيوحيميالىق كورسەتكىشتەرىنىڭ بولۋى مۇمكىن.

بۇگىندە فيبروسكانيرلەۋ ءادىسى «فيبروسكان» (سوقىر ءادىس) اپپاراتىندا جانە زاماناۋي شەشىم رەتىندە Hitachi Arietta اپپاراتتارىندا جاسالادى.

الدىڭعى قاتارلى ساراپتاۋ كلاسىنىڭ Hitachi Arietta اپپاراتى ەڭ دۇرىس دياگنوز قويۋ جانە گەپاتو-كورىنىس الۋ ءۇشىن قاجەتتى تەكسەرىپ-زەرتتەۋدىڭ بارلىق كەشەنىن ناقتى جۇرگىزۋگە مۇمكىندىك بەرەدى. ۋدز دارىگەرى زاقىمدانۋ وشاعىن عانا ەمەس، سونىمەن قاتار ونىڭ قۇرىلىمىن دا ناقتى انىقتايدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز