وتكەن جىلدىڭ ءساۋىر ايىندا پاندەمياعا بايلانىستى سالىقتار مەن الەۋمەتتىك تولەمدەردەن بوساتىلعان شوب نىساندارىنىڭ ءتىزىمى بەكىتىلگەنى بەلگىلى. العاشىندا 1قازانعا دەيىن بەرىلگەن جەڭىلدىك ۇكىمەتتىڭ №721 قاۋلىسى نەگىزىندە جىل سوڭىنا دەيىن تاعى ۇزارتىلعان بولاتىن. وسىنىڭ نەگىزىندە پاندەميادان زارداپ شەككەن بيزنەس نىساندارى مىندەتتى مەديتسينالىق ساقتاندىرۋ جۇيەسىنە اۋدارىلاتىن تولەمدەردەن دە 9 ايعا بوساتىلدى.
فيليال ديرەكتورىنىڭ ورىنباسارى جانار كەنجەباەۆانىڭ ايتۋىنشا, شاعىن جانە ورتا بيزنەس نىساندارى ءوز قىزمەتكەرلەرى تۋرالى مالىمەتتى 2020 جىلدىڭ شىلدەسىنەن باستاپ ءار ايدىڭ 25-ىنە دەيىن تۇراقتى تۇردە جاڭارتىپ وتىرۋى ءتيىس بولاتىن.
«جالپى, الماتى قالاسى بويىنشا جىل سوڭىنا دەيىن ءمامس تولەۋدەن بوساتىلعان شاعىن جانە ورتا بيزنەس سۋبەكتىلەرى – 116 604, ونىڭ ىشىندە 60 259-ى 2020 جىلدىڭ ىشىندە دەرەكتەردى وزەكتەندىردى. وسىلايشا, بىرقاتار كاسىپورىنداردىڭ جالدامالى قىزمەتكەرلەرى ءمامس جۇيەسىنەن تىس قالادى. سوندىقتان جۇمىس بەرۋشىلەرگە شوب قىزمەتكەرلەرىنىڭ ساقتاندىرىلۋ مارتەبەسى بويىنشا جۇرگىزىلىپ جاتقان جۇمىستىڭ ماڭىزدىلىعىن ءتۇسىنۋ جانە دەرەكتەردى قور سايتىنا ەنگىزۋ ماڭىزدى» - دەپ ءتۇسىندىردى ج.كەنجەباەۆا.
قىزمەتكەرلەردى ساقتاندىرۋ ءۇشىن نە ىستەۋ كەرەك؟
· ول ءۇشىن جۇمىس بەرۋشى msb.fms.kz سايتىنا كىرەدى
· زاڭدى تۇلعانىڭ نەمەسە جەكە كاسىپكەرلىك نىسانىنىڭ ەتسق كومەگىمەن قوردىڭ اقپاراتتىق جۇيەسىنە تىركەلىپ, پايدالانۋ كەلىسىمىنە قول قويادى
· ارنايى ۇياشىققا جۇمىسكەرلەردىڭ جسن ەنگىزەدى ء(تىزىمدى Excel فورماتىنداعى ءبىر فايل ارقىلى نەمەسە ءار قىزمەتكەردى جەكە-جەكە ەنگىزۋگە بولادى)
تالاپ تولىق ورىندالعان جاعدايدا قىزمەتكەرلەردىڭ ءمامس جۇيەسىندەگى مارتەبەسى جارتى ساعاتتا راستالادى.
سالىق جانە الەۋمەتتىك تولەمدەر ءۇشىن "نولدىك" مولشەرلەمەنى پايدالاناتىن شوب-تىڭ 29 ساناتىنىڭ تولىق تىزىمىمەن ۇكىمەتتىڭ "سالىق سالۋ ماسەلەلەرى بويىنشا ەكونوميكانى تۇراقتاندىرۋ جونىندەگى ودان ارعى شارالار تۋرالى" №224 قاۋلىسىندا تانىسۋعا بولادى.
