مەگاپوليس اكىمى Instagram-داعى پاراقشاسىندا تەلەمەديتسينا ورتالىعىندا, وتباسىلىق-دارىگەرلىك امبۋلاتوريادا جانە ءمجا اياسىندا اشىلعان وڭالتۋ ورتالىعىندا بولعانىن حابارلادى.
«كۆي-گە قارسى ءىس-قيمىلداعى ماڭىزدى جۇمىستىڭ ءبىرى – تەلەمەديتسينا ورتالىعىن قۇرۋ بولدى. جاڭادان قۇرىلعان بىرەگەي ورتالىقتا بولدىم. بۇل جەر پاندەميا كەزىندە قاۋىپتى ىندەتكە شالدىققان ناۋقاستارعا قاشىقتان كومەك كورسەتەدى», - دەپ جازدى ب. ساعىنتاەۆ.
ونىڭ ايتۋىنشا, ارنايى دايىندىقتان وتكەن 52 دارىگەر تاۋلىك بويى اۋديو نەمەسە بەينە بايلانىس ارقىلى امبۋلاتوريالىق ەمدە جاتقان ناۋقاستىڭ جاعدايىن باقىلاپ, ولارعا كەڭەس بەرەدى. بۇگىندە 816 ادام ۇيدە ەمدەلۋدە. وتكەن جىلدىڭ 1 قاراشاسىنان باستاپ ءۇي كارانتينىندەگى 3,7 مىڭ قالا تۇرعىنىنا قاشىقتان مونيتورينگ جۇرگىزىلدى.
سونداي-اق, الماتى اكىمى ب. ساعىنتاەۆ قالالىقتارعا العاشقى مەديتسينالىق-الەۋمەتتىك كومەك كورسەتۋ ءۇشىن ءتيىستى بارلىق جاعدايلاردىڭ جاسالاتىنىن ايتتى. بۇل مىندەت جاقىن ماڭدا ەمحانالار جوق ىقشاماۋدانداردا وتباسىلىق-دارىگەرلىك امبۋلاتوريالاردى اشۋ ارقىلى شەشىلۋدە.
ماسەلەن, تۇركسىب اۋدانىندا زاماناۋي قۇرىلعىلارمەن جابدىقتالعان «التاي» ودا 11 مىڭ ادامعا قىزمەت كورسەتەدى. سوڭعى ەكى جىلدا مۇنداي 16 وتباسىلىق-دارىگەرلىك امبۋلاتوريالار اشىلدى. بيىل تاعى تورتەۋىن اشۋ جوسپارلانۋدا.
قالا اكىمى ب. ساعىنتاەۆ جەكە كاپيتالدىڭ قاتىسۋىمەن قۇرىلاتىن وڭالتۋ ورتالىقتارى جۇيەسىنىڭ ۇلعايعانىن حابارلادى. ءمجا اياسىندا وتكەن جىلى «ارۋانا» كوپسالالى ورتالىعى اشىلدى. ورتالىق 50 توسەك-ورىنعا ەسەپتەلگەن, سونىڭ ىشىندە ينسۋلت, كارديولوگيا مەن تراۆماتولوگيالىق ناۋقاستاردى ەمدەۋگە ارنالعان 41 ورىن بار.
