شابىت شاقىرار ولكە

ونەر • 22 قاڭتار، 2021

شابىت شاقىرار ولكە

18 رەت كورسەتىلدى

الماتىدا ءدال وسىلاي دەپ اتالعان سۋرەت كورمەسى اشىلدى. ەل تاۋەلسىزدىگىنىڭ 30 جىلدىعىنا ارنالعان ونەر جارمەڭكەسىنە بەلگىلى تۋىندىگەر راشيد قۇلباتىروۆتىڭ جانە قىزى جانسايانىڭ ۇزدىك تۋىندىلارى قويىلعان. سۋرەتشى كەنەبىندە تاريحى تەرەڭدە جاتقان ارۋ الماتىنىڭ وتكەنى مەن بۇگىنى، قازاق دالاسىنىڭ تۇمسا تابيعاتى كوز اربايدى.

ارمان وكتيابر

قۇلباتىروۆ ءوز شىعارماشىلىعىندا قالا پەيزاجدارىن جان-دۇنيەسىمەن جىرلايدى. ونىڭ كەنەبىندە الماتىنىڭ جاڭا داڭعىلدارى مەن ەسكى كوشەلەرى كەشە مەن بۇگىندى ءوزارا ساباقتاستىرىپ، تابيعات پەن ادام مىنەزىنىڭ ىرعاقتارىن ۇندەستىرە تۇسەدى. قالا پەيزاجدارى گالەرەياسىندا الماتىدان باسقا اقتاۋ، اتىراۋ، اقتوبە، ماڭعىستاۋ، ىستانبۇل، ريم، رۋان سياقتى قالالار مەن قالا ماڭىنىڭ جانە ءوزى ساياحاتتاپ بارعان جەرلەرىنىڭ كورىنىس-كەلبەتىن سۋرەتتەيتىن پەيزاجدارى دا بار. اقپان ايىنىڭ جەتىسىنە دەيىن جالعاساتىن كەزەكتى كورمەدەن قىلقالام يەسىنىڭ ءوزى ونەرگە ۇكىلەپ قوسقان پەرزەنتى جانسايانىڭ دا ەرەكشە قولتاڭباسىن تاماشالاۋعا بولادى. «Almaty Gallery» ورتالىعىندا شىمىلدىعىن تۇرگەن مادەني شارا الماتىلىقتار مەن قالا قوناقتارى ءۇشىن تەگىن.

– راشيد قۇلباتىروۆ جۇمىستارىن كوبىنەسە پلەنەرگە شىعىپ، تابيعات اياسىندا جازعاندى جانى سۇيەدى، سەبەبى بۇل – ونىڭ شىعارماشىلىعىنا دەم بەرەتىن قۋات كوزى. قالا مەن ونىڭ ماڭىن جازعاندا راشيد جورامالعا جول بەرمەيدى، ياعني دالالى جەر مەن تاۋلى ولكەدەگى اۋىلداردى، ولاردىڭ ءومىر تىرشىلىگىنىڭ ەرەكشەلىگىن قوسا بايانداعان كەزدە، شىعارماشىلىق پروتسەسكە تولىعىمەن بەرىلىپ، ەندىگى جەردە قىلقالامىمەن ەمەس، جانىمەن جازا باستايدى. ادام جۇرەگىنىڭ گەنەتيكالىق جادى بار دەسەدى. كوشپەندىلەر ۇرپاعىنىڭ بويىنداعى قان دالا ادامدارىنىڭ تىنىش ءارى ەمىن-ەركىن ءومىر ىرعاعىن راحاتتانا باياندايتىن كەسكىندەمەسىنىڭ شىعارماشىلىق ويىمەن بىرگە جىلجي اعادى، – دەيدى ونەرتانۋشى وكسانا تانسكايا.

ونەردەگى ارىپتەستەرى ونى «تابيعات لاندشافتارى مەن قالا انسامبلدەرىنىڭ جىرشىسى» دەپ بەكەر اتاماسا كەرەك. قىلقالامىن اسا شە-بەرلىكپەن جەڭىل تارتاتىن ونىڭ كەنەبىنەن قازاقستان مەن ەۋروپانىڭ ۇلكەندى-كىشىلى قالالارىنىڭ پانورامالارىن، قازاق دالاسىنىڭ شەتسىز دە شەكسىز جازيراسىن، ىلە الاتاۋىنداعى جوتالاردىڭ بيىك شىڭدارىن، كاسپي تەڭىزىنىڭ اسەم كورىنىسىن، كوشپەندىلەردىڭ ءداستۇرلى اۋىلدارىنىڭ تۇرمىستىق كومپوزيتسيالارىن كوپتەپ كەزدەستىرۋگە بولادى. سۋرەتشىنىڭ كارتينالارى كانادا، امەريكا، گەرمانيا، فرانتسيا، تۇركيا، گرەكيا جانە چەحيادا جەكە كوللەكتسيالاردا ساقتاۋلى.

«كورمەگە ونەر يەسىنىڭ قازاقستاننىڭ تۇكپىر-تۇكپىرىن، كەڭ بايتاق جەرىمىز بەن سالت-ءداستۇرىمىزدى كورسەتەتىن تۋىندىلارى قويىلدى. تاۋەلسىزدىگىمىزدىڭ مەرەيلى بەلەسىنە وراي وسىناۋ يگى باستاما جۇيەلى جالعاسىپ، باسقا دا ۇزدىك سۋرەتشىلەردىڭ تۋعان جەر تاقىرىبىن اسقاقتاتقان شىعارمالارىن كوپشىلىك نازارىنا ۇسىناتىن بولامىز»، دەيدى قالالىق مادەنيەت باسقارماسى باسشىسىنىڭ ورىنباسارى دانيار اليەۆ.

الماتى