وقيعا • 21 قاڭتار، 2021

قاردان قالانعان «اقباس بۇقا»

12 رەت كورسەتىلدى

ورال قالاسىنداعى №1 ءورت ءسوندىرۋ ءبولىمىنىڭ الدىندا قۇيرىعىن تىگىپ، باسىن تومەن سالىپ، ءمۇيىزىن شايقاپ تۇرعان الىپ بۇقا ەرتەگى كەيىپكەرىنەن اۋمايدى. قاردان تۇرعىزىلعانىمەن، ءتۇرلى-ءتۇستى بوياۋمەن ارلەنگەن قار-ءمۇسىن الىستان كوز تارتادى. گاگارين كوشەسىمەن ولاي-بۇلاي ءوتىپ بارا جاتقان كولىكتەردىڭ كەيبىرى توقتاي قالىپ، سۋرەتكە ءتۇسىپ جاتادى. ونداي ساتتە وسى ءمۇسىندى جاساعان الىشەر قۇتتىعاليدىڭ بويىن ماقتانىش كەرنەيدى.

– اسىرەسە بالالار كەلىپ، مە­نىڭ تۋىندىمدى ۇناتىپ، اينال­شىقتاپ، كەتە الماي جۇرگەندە ەرەكشە قۋانامىن. ەڭبەگىم ەش كەت­­پەگەنىن تۇسىنەمىن، – دەيدى ورال قالالىق №1 ماماندان­دىرىلعان ءورت ءسوندىرۋ ءبو­لى­مىنىڭ قۇتقارۋشىسى الىشەر قۇتتىعالي.

ءبىر قىزىعى، قىس كەلگەن سايىن ءدال وسى جەردە قاردان جاسالعان ءتۇرلى ءمۇسىن پايدا بولاتىنىنا جەرگىلىكتى حالىق ۇيرەنىپ ال­دى دەۋ­گە بولادى. ويتكەنى الىشەر بىلتىر وسى الاڭقايعا ءورت سون­دىرەتىن ماشينانىڭ ءدال كوشىر­مەسىن قار­دان تۇرعىزعان بولاتىن. ونىڭ الدىندا جەڭىستىڭ 75 جىل­دىعىنا وراي «ت-34» تانكىسىن قار­دان قالاپ شىققانى دا بار.

1

ءمۇسىن جاساۋدى بالا كەزىنەن جاقسى كورەتىن الىشەردىڭ ءحوببيىن بيىل قالالىق توتەنشە جاعدايلار مەكەمەسىنىڭ باسشىلىعى دا قول­­داپ، «قاردان جاسالعان ۇز­دىك ءمۇسىن» اتتى بايقاۋ ۇي­ىم­­داستىرعان. بۇل بايقاۋعا تو­تەن­شە­لىكتەردىڭ بارلىق بولىم­شەسى مەن ۆەدومستۆولىق باعى­نىس­تى ۇيىمدارى قاتىسىپتى. وسى­لاي­شا، اۋىلدار مەن قالادا قاردان جاسالعان ءتۇرلى ءمۇسىن پايدا بولدى. ۇزدىكتەرى جۇلدەلى ورىندارمەن، ارنايى سىيلىقتارمەن ماراپاتتالعان. ەڭ باستىسى، قار­دان جاسالعان ونەر تۋىندىلارى ۋاقىتشا بولسا دا كورگەن جان­نىڭ كوزىنە قۋانىش ۇيالاتىپ، ەستەتيكالىق ءلاززات سىيلاپ تۇر.

– بۇل تۋىندىنى ۇلتتىق برەند – قازاقتىڭ اسىل تۇقىمدى اق باس سيىرىنا بارىنشا ۇق­ساتقىم كەلدى. ال سيىردىڭ ءمۇ­سىنىن جاسا­عان سەبەبىم – ناۋرىزدا كەلەتىن سيىر جىلى ەلىمىزگە قۇتتى، بەرە­كەلى بولسىن دەگەن تى­لەگىم، – دەيدى الى­شەر. لايىم دا سولاي بولسىن!

 

باتىس قازاقستان وبلىسى

 

سوڭعى جاڭالىقتار

ۇقساس جاڭالىقتار