الماتىدا بەلسەندى ۇزاق ءومىر سۇرۋگە سەپتەسەتىن 9 ورتالىققا 21 مىڭنان استام ادام تىركەلگەن, 300,7 مىڭ ارداگەر ونىڭ قىزمەتتەرىمەن قامتىلعان.
بىلتىر توتەنشە جاعداي جاريالانۋىنا بايلانىستى بەلسەندى ۇزاق ءومىر ءسۇرۋ ورتالىقتارىنا قاشىقتان قىزمەت كورسەتۋگە تۋرا كەلدى. گەرياتور, پسيحولوگ, مەدبيكە كەڭەستەرى ونلاين نەمەسە تەلەفون ارقىلى جۇرگىزىلدى. سكانديناۆيالىق ءجۇرىس, وقىتۋ كۋرستارى, شاحمات, بي سياقتى اعزانى شىڭدايتىن ساباقتار ونلاين وتكىزىلدى. بارلىعى 4 706 زەينەتكەر ونلاين قىزمەت الدى. قارتتار كۇنى مەن ايلىعىنا ارنالعان ءىس-شارالارعا 1,5 مىڭ ادام قاتىستى. سونىمەن قاتار 200 زەينەتكەر ءۇشىن ەكسكۋرسيالار وتكىزىلدى.
بۇدان باسقا الماتى قالاسىنىڭ اكىمى باقىتجان ساعىنتاەۆتىڭ تاپسىرماسىمەن «شىڭعا ورلەۋ» الەۋمەتتىك كلۋبى جوباسىن ىسكە اسىرۋ باستالدى. ماقساتى – كىشى مەكتەپ جاسىنداعى بالالارعا ومىرلىك تاجىريبە, ءبىلىم مەن داعدىلاردى بەرۋ ارقىلى قيىن ومىرلىك جاعدايعا تاپ بولعان اعا بۋىن وكىلدەرىن قوعامدىق ومىرگە تارتۋ. كلۋبتىڭ وكىلدەرى زەينەتكەرلەر, ەڭبەككە قابىلەتتى مۇگەدەك ادامدار, از قامتىلعان كوپ بالالى وتباسىلاردان شىققان 1-4 سىنىپ بالالارى, ەرەكشە قاجەتتىلىكتەرى بار بالالار بولدى. ونلاين رەجىمىندە از قامتىلعان وتباسىلاردان شىققان 510 بالا كلۋبتارمەن قامتىلدى. وفلاين رەجىمىندە 390 بالا وقيدى. زەينەتكەرلەر مەن مۇگەدەكتىگى بار ادامداردان 72 پەداگوگ جۇمىسقا ورنالاستىرىلدى.
الماتىدا ىسكە اسىرىلىپ جاتقان الەۋمەتتىك جوبالاردىڭ ءبىرى – «تاۋەلسىز ءومىر مەكتەبى». وندا ءوز مۇمكىندىكتەرىن بىلمەۋ نەمەسە وتباسى تاراپىنان جاسالاتىن گيپەرقامقورلىق سالدارىنان قوعامنان وقشاۋ قالعان مۇگەدەك جانداردى قولداۋ شارالارى كورسەتىلەدى. اتاپ ايتقاندا, مۇگەدەكتىككە بايلانىستى قورقىنىش پەن بەلگىسىزدىكتى جەڭۋ, ءوزىن ءوزى باعالاۋدى ارتتىرۋ جانە ماقسات قويۋ داعدىلارىن قالىپتاستىرۋ جانە ءوز ءومىرىن جوسپارلاۋ جۇمىستارى جۇرگىزىلىپ وتىر. 48 مۇگەدەك ادام جاتتىقتىرۋشىلاردىڭ قاتىسۋىمەن «اق باستاۋ» ساۋىقتىرۋ پانسيوناتىنا ورنالاستىرىلىپ, 7 كۇندىك كۋرستا وقىدى. سونداي-اق 172 ادامدى قامتيتىن «Ten Qoǵam» مۇمكىندىگى شەكتەۋلى ادامداردى جۇمىسقا ورنالاستىرۋ ورتالىعى» جوباسى ىسكە اسىرىلۋدا. بۇل باستاما دا مۇمكىندىگى شەكتەۋلى جانداردىڭ بىلىكتىلىك الىپ, جۇمىسقا ورنالاسۋىنا كومەك كورسەتۋدى كوزدەيدى.
الماتى
