رۋحانيات • 20 قاڭتار، 2021

قوستاناي ارحيۆىنە تاتارستاننان قۇندى قۇجاتتار اكەلىندى

59 رەت كورسەتىلدى

قوستاناي وبلىسىنىڭ ارحيۆىنە تاتارستاننان قۇندى قۇجاتتار اكەلىندى. سونىمەن قاتار ارحيۆ قورىن كوبەيتۋ ماقساتىندا ارنايى جوبالار قولعا الىندى. بۇل تۋرالى وڭىرلىك كوممۋنيكاتسيالار قىزمەتىنىڭ الاڭىندا ااقپاراتتاندىرۋ، مەملەكەتتىك قىزمەتتەر كورسەتۋ جانە ارحيۆتەر باسقارماسىنىڭ باسشىسى ازامات كاشيەۆ باياندادى، دەپ حابارلايدى Egemen.kz

ازامات كاشيەۆ «ارحيۆ-2025» جوباسىن ىسكە اسىرۋ جونىندەگى كەشەندى جوسپارلارىمەن ءبولىستى. ونىڭ ايتۋىنشا، بىلتىر ارحيۆ سالاسىن قارجىلاندىرۋعا ايتارلىقتاي ءمان بەرىلىپ، 610،7 ملن تەڭگە قاراستىرىلدى. «ونىڭ ىشىندە جەرگىلىكتى بيۋدجەتتەن قوسىمشا 107 ملن تەڭگەدەن استام قاراجات ءبولىندى.

40 كومپيۋتەر، ا3 فورماتىنداعى پلانشەتتى سكانەرلەردىڭ 17 داناسى، 40 كۇلگىن-شامدى سكانەر ساتىپ الىندى. مەملەكەتتىك ارحيۆتەر قورى 392 قۇجات، 652 فوتو، 9 اۋديو، 50 ۆيدەومەن تولىقتىرىلدى. سونداي-اق تاتارستان رەسپۋبليكاسىنىڭ ارحيۆتەرىندەگى قازاقستانعا، جالپى قوستاناي ءوڭىرىنىڭ تاريحىنا قاتىستى قۇجاتتار اكەلىندى»، - دەيدى باسقارما باسشىسى.

بۇگىندە قوستاناي وبلىسىنىڭ مەملەكەتتىك ارحيۆىندە حV-ءحىح عاسىرلار ارالىعىنداعى ءوڭىردىڭ ساياسي، الەۋمەتتىك جانە ەكونوميكالىق تاريحى تۋرالى دەرەكتەر وتە از. سوندىقتان ارحيۆ قىزمەتكەرلەرى رەسەي فەدەراتسياسىنىڭ چەليابى، ورىنبور، ترويتسك قالالارى مەن تاتارستان رەسپۋبليكاسىنداعى ارىپتەستەرىمەن ىنتىماقتاستىق ورناتىپ، ءوزارا ىسكەرلىك قارىم-قاتىناستى دامىتۋدا. سوڭعى 2 جىلدا وبلىستىق ارحيۆكە قوستاناي تاريحىنا قاتىستى ءبىرتالاي قۇجات اكەلىندى.

ونىڭ ىشىندە 1919 جىلعى قوستاناي ميليتسيا بولىمشەسىنىڭ، 1919 جىلعى قوستاناي قالالىق پارتيا كوميتەتىنىڭ حاتتامالارى، قوستاناي وبلىسى اۋداندارىنىڭ شەكارالارىن انىقتاۋعا قاتىستى قۇجاتتار، اۋداندىق جانە قالالىق ۇيىمداردىڭ قىزمەتى، شىركەۋ جازبالارى سياقتى قۇندى قۇجاتتار بار. اقپاراتتاندىرۋ، مەملەكەتتىك قىزمەتتەر كورسەتۋ جانە ارحيۆتەر باسقارماسىنىڭ ءبولىم باسشىسى سالتانات نۇرتاسقىزىنىڭ سوزىنە قاراعاندا، تاتارستاننان 1700 بەتتىك قۇجاتتار اكەلىندى.

ونىڭ ىشىندە قازان ۋنيۆەرسيتەتىنىڭ كىتاپحاناسىنداعى سيرەك قولجازبالار مەن كىتاپتار قورىنان ءىى ەكاتەرينا پاتشايىمنىڭ 1789 جىلى قىرعىز-قايساق ورداسىنىڭ بوداندىققا ادالدىعى ءۇشىن بەرگەن العىسى بار. بۇدان بولەك، ءىى ەكاتەرينا پاتشايىمنىڭ 1771 جىلى 17 قاڭتاردا نۇرالى حانعا قالماقتاردىڭ نارازىلىق باس كوتەرۋىنە جول بەرمەۋ تۋرالى جازعان حات-حابارلاماسى، 1829 جىلدىڭ 29 مامىرىندا ورىنبور گەنەرال-گۋبەرناتورىنىڭ جانتورە جاڭگىروۆ سۇلتانعا العىس حاتى تابىلدى.

قازان مۇراعاتتارىنان قازاق حالقىنان شىققان العاشقى دارىگەر مۇحامەدجان قاراباەۆ پەن ۇلى اعارتۋشى ىبىراي التىنسارينگە قاتىستى تىڭ قۇجاتتار انىقتالدى. ارحيۆشىلەر التىنسارين مەن يلمينسكيدىڭ ءوزارا جازىسقان حاتتارىنىڭ تولىق كوشىرمەسىن الىپ، وبلىستىق ارحيۆ قورىن تولىقتىردى. قازىر بۇل قۇجاتتار تسيفرلىق جۇيەگە كوشىرىلىپ جاتىر، ولار كوپشىلىككە قولجەتىمدى بولماق.

ارحيۆتەر باسقارماسى «تسيفرلىق قازاقستان» مەملەكەتتىك باعدارلاماسىن ىسكە اسىرۋ شەڭبەرىندە 21 مەملەكەتتىك ارحيۆ پەن وبلىستىڭ 294 مەكەمەسىندە «قۇجاتتاردىڭ بىرىڭعاي ەلەكتروندىق ءارحيۆى» جۇيەسىن ەنگىزدى.



سوڭعى جاڭالىقتار

«بارىس» ۇتىلىپ قالدى

سپورت • 06 ناۋرىز، 2021

ەلدوس سمەتوۆ كۇمىس الدى

سپورت • 06 ناۋرىز، 2021

«قايرات» – قولا جۇلدەگەر

ايماقتار • 06 ناۋرىز، 2021

ءار سالا ۇزدىكتەرىنە قۇرمەت تانىتتى

ايماقتار • 05 ناۋرىز، 2021

باعدات مۋسين شىمكەنتكە باردى

ايماقتار • 05 ناۋرىز، 2021

ۇقساس جاڭالىقتار