ەلەنا ۆياچەسلاۆوۆنانىڭ تاعدىرى ادام قىزىعارلىقتاي ەمەس. ماسكەۋدە تۋىپ-وسكەن ول اناسىنان ەكى جاسىندا ايىرىلدى. بارىنە كىنالى اكەسى. اراققا سىلقيا تويىپ العان ول ابايسىزدا وزدەرى تۇرىپ جاتقان ءۇيدى ورتەيدى. شارپىعان جالىننىڭ قۇشاعىندا قالعان اناسى مەرت بولادى. ودان كەيىن-اق اكەسى وڭالمادى. ۆياچەسلاۆ باسقا ءبىر كەلىنشەكتىڭ ەتەگىنەن ۇستاپ, بەلگىسىز جاققا كەتتى. ال كىشكەنتاي ءبۇلدىرشىننىڭ تاربيەسىمەن اجەسى اينالىستى. سول اننا يۆانوۆنانىڭ مەيىرىمى مەن شاپاعاتىنىڭ ارقاسىندا ەلەنا ەل قاتارلى ءبىلىم الىپ, سپورتتىڭ سيقىرلى الەمىنە بويلادى.
سپورتتىق گيمناستيكانى سەرىك ەتكەن قارشاداي قىز ۋاقىت وزا ءوز قاتارىنىڭ الدى بولدى. العاشىندا انتونينا ولەجكو مەن الەكساندر ەگليتانىڭ قول استىندا جاتتىقسا, كەيىننەن ميحايل كليمەنكونىڭ ۇيىرمەسىنە اۋىستى. كۇن ساناپ شەبەرلىگى شىڭدالا تۇسكەن مۋحينا كوپ ۇزاماي مايتالمان مامانداردىڭ قىراعى نازارىنا ىلىكتى. تىپتەن ونىڭ 1976 جىلى مونرەالدا الاۋى تۇتانعان وليمپيا ويىندارىنا قاتىسۋى دا مۇمكىن ەدى. بىراق «تاجىريبەسى از» دەگەن جەلەۋمەن ەلەنا ۇيەڭكى جاپىراقتار ەلىندەگى جارىستان شەت قالدى. باپكەرلەردىڭ تاڭداۋى وزگە گيمناسشىلارعا ءتۇستى.
جوعارىداعى جاعداي 16 جاسار قىزدىڭ جىگەرىن جاسىتقان جوق. ول كۇردەلى ەلەمەنتتەردى بىرىنەن كەيىن ءبىرىن ءمىنسىز ورىنداپ, ءوزىنىڭ مىقتىلىعىن تۇبەگەيلى مويىنداتا باستادى. قىسقا عانا مەرزىم ارالىعىندا حالىقارالىق ارەنادا اۋىز تولتىرىپ ايتارلىقتاي تابىستارعا قول جەتكىزدى. 1978 جىلى فرانتسيانىڭ ستراسبۋرگ قالاسىندا ۇيىمداستىرىلعان الەم چەمپيوناتىندا ءۇش التىن مەدالدى موينىندا جارقىراتىپ, بارشا جۇرتتىڭ نازارىن وزىنە اۋداردى. تارقاتىپ ايتساق, ەلەنا كوپسايىس پەن ەركىن جاتتىعۋدا الدىنا جان سالمادى. كوماندالىق باسەكەدە دە باس جۇلدەنى ولجالادى. ەكى جاتتىعۋدا كۇمىسپەن كۇپتەلدى. ناتيجەسىندە, الەمنىڭ ءابسوليۋتتى چەمپيونى اتاندى. اتالعان جارىستا مۋحينا مونرەال وليمپياداسىندا بەس رەت جەڭىس تۇعىرىنا كوتەرىلگەن اتى اڭىزعا اينالعان رۋمىنيالىق گيمناسشى ناديا كومانەچيدىڭ ءوزىن ارتقا تاستادى.
جالپى 1977-1978 جىلدارى مۋحينانىڭ جۇلدىزى جارقىراي جاندى. جوعارىداعى تابىسىنان بولەك, ول كسرو مەن قارت قۇرلىقتىڭ تەڭدەسسىزى دەپ تانىلدى. الەم كۋبوگىندا التىن تۇعىرعا كوتەرىلدى. ونىڭ جەڭىستى جولى وسىلاي جالعاسىپ جاتتى. الدا – ماسكەۋ وليمپياداسى مەنمۇندالاپ تۇردى. سول جارىسقا ەلەنا جاتپاي-تۇرماي دايىندالدى. كەڭەس وداعىنىڭ باس شاھارىندا وتەتىن عالامدىق دودادا مۋحينانىڭ شوقتىعى بيىك بولاتىنىنا ەشكىمنىڭ دە كۇمانى جوق ەدى.
ەلەنا وتە ەڭبەكقور ەدى. ول ەركىنسۋ, بوساڭسۋ دەگەندى بىلمەيتىن. زالدا جانىن سالىپ جاتتىعادى. باپكەرى دە تىم تالاپشىل ءارى قاتال ەدى. ول ءتۇرلى ەكسپەريمەنتتەر جاساۋدى ۇناتاتىن. شاكىرتتەرىنىڭ اششى تەرىن ابدەن سىعىپ العانشا دامىل تاپپايتىن. مىنە, مۋحينا سونداي مەكتەپتەن ءوتتى. ميحايل كليمەنكو ونى ءاۋ باستان اسا كۇردەلى تاسىلدەردى ورىنداۋعا بەيىمدەدى. ال ورىندالاتىن ءادىس نەعۇرلىم كۇردەلى بولسا, جاراقات الۋ قاۋپى سوعۇرلىم جوعارى بولاتىنى تۇسىنىكتى عوي. بىراق باپكەرى ونداي «مايدا-شۇيدە» نارسەلەرگە اسا ءمان بەرمەيتىن. مىسالى, 1975 جىلى كسرو حالىقتارى سپارتاكياداسىندا مۋحينانىڭ مويىن ومىرتقالارىنا زاقىم كەلدى. ونداي جاعدايدا جاتتىعۋ بىلاي تۇرسىن, ءجۇرىپ-تۇرۋدى ءوزى قيىن. وعان قاراپ جاتقان كليمەنكو جوق. ول كۇن سايىن ەلەنانى اۋرۋحانادان الىپ كەتىپ, جاتتىعۋ جاساتاتىن.
ۋاقىت وزا ەلەنانىڭ ءوزى دە اناۋ-مىناۋ جاراقاتتاردى ەلەمەيتىن بولدى. قابىرعاسى قايىسىپ, ساۋساقتارى سىنىپ, ميى شايقالسا دا مىڭق ەتپەيتىن. كليمەنكونىڭ قاھارىنان قورىققانى سونشالىق, مۋحينا ەشكىمگە بايقاتپاي ناشاتىر ءسپيرتىن يىسكەپ الاتىن دا تۇك بولماعانداي جاتتىعۋىن ءارى قاراي جالعاستىرا بەرەتىن.
1980 جىلدىڭ 3 شىلدەسى. ماسكەۋ وليمپياداسىنىڭ باستالۋىنا ەكى اپتادان اسا ۋاقىت قالدى. كسرو قۇراماسى ءوزىنىڭ سوڭعى وقۋ-جاتتىعۋ جيىنىن مينسكىدە وتكىزىپ جاتتى. بىردە شۇعىل شارۋالاردىڭ شىعۋىنا بايلانىستى ميحايل كليمەنكو دەرەۋ ماسكەۋگە ۇشادى. ءدال سول كۇنى مۋحينا جالعىز ءوزى تومارعا شىعىپ, اسا ءبىر كۇردەلى سالتونى ورىنداۋعا بەكىندى. ورنىنان سەكىرگەن ەلەنا اۋەدە 540 گرادۋسكە اينالامىن دەپ, اعاتتىق جىبەردى. سونىڭ سالدارىنان جەرگە باسىمەن وڭباي قۇلادى. زالدا ۇنسىزدىك. اتاقتى سپورتشى ەس-ءتۇسسىز ەدەندە جاتىر. جاتتىقتىرۋشىلار 03 نومىرىنە قوڭىراۋ شالدى. شۇعىل جەتكەن جەدەل جاردەم ماشيناسى ونى دەرەۋ اۋرۋحاناعا الىپ كەتتى. كوپ ۇزاماي گيمناسشى قىزدىڭ مويىن ومىرتقالارى قاتتى زاقىمدانعان دەگەن سۋىت حابار جەتتى.
20 جاستاعى سپورتشىنى اجال تىرناعىنان امان الىپ قالۋ ءۇشىن دارىگەرلەر بارىن سالدى. ايتەۋىر, ەلەنا كوزىن اشىپ, ەسىن جيدى. بىراق سپورت تا, باسقاسى دا جايىنا قالدى. ايگىلى سپورتشى اياعىنان تىك تۇرا الماي, ءومىر بويى مۇگەدەكتەر ارباسىنا تاڭىلدى. 28 جىل بويى ول توسەك تارتىپ جاتىپ, 2006 جىلدىڭ 22 جەلتوقسانىندا قايتىس بولدى. مىنە, كەشە عانا ميلليونداعان كورەرمەننىڭ كوزايىمىنا اينالعان اتاقتى گيمناسشىنىڭ قايعىلى تاعدىرى وسىنداي.
ال باپكەرى شە؟ شاكىرتى توسەككە تاڭىلىپ جاتقاندا ول ءحالىن سۇراپ بىردە-ءبىر رەت نە ۇيىنە, نە اۋرۋحاناعا كەلمەگەن دەسەدى. بىراق ەلەنا مۋحينا كوز جۇمعان سوڭ ميحايل كليمەنكو دا كوپ ءومىر سۇرمەدى. ول شاكىرتىنەن كەيىن ءبىر جىلدان سوڭ, ياعني تۋعان كۇنىندە دۇنيەدەن وزدى. 2007 جىلدىڭ 14 قاراشاسىندا ول 65 جاسقا كەلگەن ەدى.
الماتى
