دەپۋتاتتار بىرىنەن كەيىن ءبىرى مىنبەرگە شىعىپ, «قازاقستان حالقىنا ادال قىزمەت ەتۋگە, قازاقستان رەسپۋبليكاسىنىڭ تۇتاستىعى مەن تاۋەلسىزدىگىن نىعايتۋعا, ونىڭ كونستيتۋتسياسى مەن زاڭدارىنا قاتاڭ باعىنۋعا, دەپۋتاتتىڭ وزىمە جۇكتەلگەن مارتەبەلى مىندەتتەرىن ادال اتقارۋعا انت ەتەمىن», دەدى.
وكىنىشكە قاراي, مىنبەرگە شىققان كەيبىر دەپۋتاتتار انتتىڭ ءماتىنىن ۇمىتىپ قالىپ, قاعازعا قايتا-قايتا شۇقشيدى. ال ەندى ءبىرى ءتىلى شىقپاعان بالا سەكىلدى, مەملەكەتتىك تىلدە بىلدىرلاپ, بىردەڭەنى ايتقان بولدى.
ءسوزىمىز دايەكتى بولسىن. مىنبەرگە كوتەرىلگەن بىرنەشە دەپۋتاتىمىز «تۇتاستىعى» دەگەن ءسوزدى ايتا الماي, ابدەن تۇتىقتى. «تۋتىستىعى», «دۋداستىعى» دەدى مە, ايتەۋىر, ابدەن تىلدەرى بۇراتىلدى. ەكى اۋىز ءسوزدى ەجىكتەپ, انت ءماتىنىنىڭ دال-د ۇلىن شىعارعانداي بولعان حالىق قالاۋلىلارىنىڭ «قىزىعى» مۇنىمەن دە بىتكەن جوق.
انت بەرۋگە شىققان تاعى ءبىر دەپۋتات «اتقارۋعا» دەگەن ءسوزدى «ات قورا» دەپ ءبىر مۇدىرسە, كەلەسىسى «ات ارۋ» دەپ شاتاستى. نە ايتقانىن وزگەلەر تۇگىلى, وزدەرى دە تۇسىنبەگەن بولار؟!
بۇل از بولعانداي, «تاۋەلسىزدىگىن» دەگەن ءسوزدى ايتۋعا كەي دەپۋتاتتىڭ اۋزىنىڭ يكەمى كەلمەي, ابدەن قينالدى. ەستىپ وتىرىپ, كۇيىنەسىڭ. ەندى شە, ازاتتىق اڭساعان بابالارىمىزدىڭ اسىل ارمانى بولعان «تاۋەلسىزدىك» دەگەن قاسيەتتى ءسوزدى ەلدىڭ جوعارى زاڭ شىعارۋشى ورگانىنداعى لاۋازىمدى قىزمەتتى اتقارۋعا ءتيىس ادامدار ايتا الماي جاتسا...
ارينە, اياق استىنان انت بەر دەپ قالسا, كەز كەلگەن ادامدا قوبالجۋ بولاتىنى ءسوزسىز. بىراق ءتورت اۋىز ءسوزدى جاتتاپ ايتۋ ءۇشىن قازاق ءتىلى مەن ادەبيەتىنىڭ قازانىنا قايناۋدىڭ قاجەتى شامالى. ونىڭ ۇستىنە, دەپۋتاتتاردى ەشكىم كوشەدەن سۇيرەپ اكەلىپ, بىردەن مىنبەرگە شىعارا سالعان جوق. ولاردىڭ ساياسي پارتيالار مەن قازاقستان حالقى اسسامبلەياسى اتىنان سايلانعاندىقتان, حالىق الدىندا انت قابىلداۋعا تيىستىلىگى بىرنەشە كۇن بۇرىن بەلگىلەنىپ قويدى ەمەس پە؟ ەندەشە, وسى مەرزىم ىشىندە ءتورت اۋىز ءسوزدى تولىقتاي جاتتاپ الۋعا بولماي ما؟!
وسىلايشا ويلاماعان جەردەن وماقا اسقان دەپۋتاتتارىمىز سول كۇنى-اق بەرگەن انتىنا كەرەعار قىلىق تانىتقاندىقتارىن سەزىندى مە ەكەن؟ سەبەبى قازاق ءتىلى – قازاقستاننىڭ مەملەكەتتىك ءتىلى. پرەزيدەنت ايتىپ وتكەندەي, مەملەكەتتىك ءتىل – ەلىمىزدىڭ باستى نىشاندارىنىڭ ءبىرى.
مەملەكەت باسشىسى قاسىم-جومارت توقاەۆ «Egemen Qazaqstan» گازەتىندە جاريالانعان «تاۋەلسىزدىك بارىنەن قىمبات» ماقالاسىندا مەملەكەتتىك ءتىل ماسەلەسىن دە قوزعاپ:
«بۇگىندە مەملەكەتتىك ءتىلدى بىلەتىن قازاقتىڭ دا, وزگە ەتنوس وكىلدەرىنىڭ دە ۇلەسى ەداۋىر ارتتى. قازاق ءتىلىن, شىن مانىندە, بۇكىل حالقىمىزدى بىرىكتىرۋشى فاكتورعا اينالدىرۋدىڭ بارلىق قۇقىقتىق تاسىلدەرى جانە كەپىلدىكتەرى قالىپتاستى. ماسەلە – نيەتتە. نيەتتىڭ دۇرىس بولۋى قازاق ءتىلىن مەڭگەرگىسى كەلەتىن ادامدارعا دا, وسى ماقساتقا جەتۋگە جاعداي جاسايتىن ۇكىمەتكە دە بايلانىستى...
...مەملەكەتتىك ءتىلدى ءبىلۋ – قازاقستاننىڭ ءاربىر ازاماتىنىڭ پارىزى. مىندەتى دەپ تە ايتۋعا بولادى. وسى ورايدا مەن بارشا قازاقستاندىقتارعا, ونىڭ ىشىندە قازاق ءتىلىن ءالى جەتە مەڭگەرمەگەن وتانداستارىما ۇندەۋ تاستاعىم كەلەدى. جاستار اعىلشىن ءتىلىن نەمەسە باسقا دا تىلدەردى از عانا ۋاقىتتا مەڭگەرە الاتىنىن كورىپ وتىرمىز. تۇتاس بۋىن الماسقان وسى جىلداردا قازاق ءتىلىن ۇيرەنگىسى كەلگەن ادام ونى الدەقاشان ءبىلىپ شىعار ەدى. حالقىمىزدا «ەشتەن كەش جاقسى» دەگەن ءسوز بار. ەڭ باستىسى, ىنتا بولۋى كەرەك», دەگەن ەدى.
جاڭادان سايلانعان ءماجىلىس دەپۋتاتتارىنىڭ ءبىرازى پرەزيدەنتتىڭ وسى ماقالاسىن وقىماعان سەكىلدى. ايتپەسە, مەملەكەت باسشىسىنىڭ ءتىل تۋرالى ايتقانىن جادىندا ۇستاۋعا ءتيىس قوي. وعان قوسا, قاسىم-جومارت توقاەۆ – مەملەكەتتىك ءتىلدى تەز ارادا جەتىك ۇيرەنۋگە بولاتىنىن ءوز مىسالى ءھام ونەگەسى ارقىلى دالەلدەگەن ساياساتكەر.
وسىندايدا, زاڭ شىعارۋشىلىق قىزمەتكە كىرىسپەي جاتىپ, قاتتى سۇرىنگەن حالىق قالاۋلىلارىنا قاراپ وتىرىپ, «ەكى اۋىز ءسوزدىڭ باسىن قۇراپ ايتا الماعان كەيبىر دەپۋتاتتار الداعى بەس جىلدا قالاي جۇمىس اتقارماق؟ الدە, «بارشاعا بىردەي تۇسىنىكتى تىلدە» سويلەۋگە كوشە مە؟» دەگەن ويعا قالاسىڭ. الداعى ۋاقىتتا ماجىلىستەگى مەملەكەتتىك ءتىلدىڭ جاعادايى قالاي بولار ەكەن؟..
