ايماقتار • 19 قاڭتار، 2021

باتىس قازاقستاننىڭ بەس اۋدانىندا كارانتين كۇشەيتىلدى

43 رەت كورسەتىلدى

باتىس قازاقستان وبلىسىنىڭ بەس اۋدانىندا كارانتين كۇشەيتىلدى. بۇل تۋرالى وبلىس اكىمى عالي ەسقاليەۆتىڭ توراعالىق ەتۋىمەن وتكەن جەدەل شتاب وتىرىسىندا ايتىلدى، دەپ حابارلايدى Egemen.kz

بقو سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى مۇحامعالي ارىسپاەۆتىڭ ءمالىم ەتكەنىندەي، بايتەرەك، اقجايىق، جانىبەك، تاسقالا، شىڭعىرلاۋ اۋداندارى «قىزىل» ايماققا كىردى.

ونىڭ سوزىنە قاراعاندا، ءوڭىر دە «سارى» ايماقتىڭ شەگىندە تۇر. وبلىستا 1-18 قاڭتار ارالىعىندا 764 ادامنىڭ ىندەت جۇقتىرعانى تىركەلدى. ولارمەن بايلانىستا بولعان 1199 ادام تەكسەرىلىپ، مەديتسينالىق باقىلاۋعا الىندى. اۋىرعانداردىڭ 42،8 پايىزى (327-ءسى) – جۇمىس جاسايتىندار، 22،1 پايىزى (169-ى) – زەينەتكەرلەر، 20 پايىزى (153-ءى) – جۇمىسسىزدار جانە 5،7 پايىزى (44-ءى) – 14 جاسقا دەيىنگى بالالار. ناۋقاستاردىڭ 232-ءسى نەمەسە 30،4 پايىزى ادامدار كوپ جينالاتىن جەرلەردە، 215-ءى (28،1 پايىزى) بۇرىن اۋىرعان تۋىستارىمەن وقشاۋلانۋ ءتارتىبىن ساقتاماعاندىقتان، 93-ءى (12 پايىزى) قوعامدىق كولىكتە، 84-ءى (11 پايىزى) توي-ساداقالاردا، 73-ءى (9،6 پايىزى) جۇمىس ورنىندا، 67-ءسى (8،8 پايىزى) بەلگىسىز جاعدايدا ىندەت جۇقتىرعان. قاڭتار ايىندا وبلىس كولەمىندە 33095 پتر زەرتتەۋ جۇرگىزىلدى. كوروناۆيرۋستىڭ ورشۋىنە بايلانىستى ورال قالاسى مەن بىرقاتار اۋدانداردا شەكتەۋ شارالارى كۇشەيتىلدى. مىسالى، بايتەرەك، ءبورلى اۋداندارىندا كارانتين قاتاڭداتىلدى.

جانىبەك اۋدانىنىڭ بورسى اۋىلىنا كىرىپ-شىعۋعا تىيىم سالىندى. اقجايىق اۋدانىنىڭ چاپاەۆ، جاڭابۇلاق، قابىرشاقتى اۋىلدارىندا دا شەكتەۋ شارالارى ەنگىزىلدى. وبلىستىق دەنساۋلىق ساقتاۋ باسقارماسىنىڭ باسشىسى مىندەتىن اتقارۋشى ارمان قاليبەكوۆتىڭ ايتۋىنشا، وڭىردە جەتى جۇقپالى اۋرۋلار اۋرۋحاناسى بولسا، سونىڭ ەكەۋى وبلىستىق كوپبەيىندى اۋرۋحانا مەن وبلىستىق جۇقپالى اۋرۋلار اۋرۋحاناسىندا، قالعان بەسەۋى ءبورلى، اقجايىق، بوكەي ورداسى، جانىبەك جانە بايتەرەك اۋدانىندا ورنالاسقان.

جاڭا مودۋلدىك اۋرۋحانانىڭ اشىلۋىنا بايلانىستى توسەكتەر سانى 579-عا جەتتى. قازىرگى كەزدە ستاتسيونارلاردا 300 ناۋقاس ەمدەلۋدە. 22 ناۋقاس جانساقتاۋ بولىمىندە جاتسا، سونىڭ 9-ى – ورال قالاسىنىڭ، 13-ءى – اۋىل تۇرعىندارى.

«تاۋلىگىنە ورتا ەسەپپەن 20 ەمدەلۋشى اۋرۋحاناعا تۇسەدى. العاشقى تاۋلىكتەردە سولاردىڭ تەڭ جارتىسى دەرلىك جانساقتاۋ بولىمىندە جاتادى. بۇل كوپشىلىگىنىڭ مەديتسينالىق كومەككە بىردەن جۇگىنبەيتىنىن، ۋاقىت وتكىزىپ الاتىنىن كورسەتەدى. سونىڭ سالدارىنان سوزىلمالى سىرقاتتارى اسقىنىپ كەتەدى. جانساقتاۋ بولىمىندە كوبىنە جاسى 65-تەن اسقان، سوزىلمالى اۋرۋى بار، اعزاسى السىرەگەن ناۋقاستار جاتادى»، دەدى ا.قاليبەكوۆ.

جيىندا سونداي-اق ورال قالاسىنىڭ اكىمى ابات شىنىبەكوۆ شاھاردا كارانتيندىك شەكتەۋ شارالارىن بۇزۋشىلىقتىڭ جالعاسىپ وتىرعانىن، وسىعان بايلانىستى ءتيىستى اكىمشىلىك شارالاردىڭ الىنىپ جاتقانىن جەتكىزدى. وبلىس باسشىسى ع.ەسقاليەۆ كوروناۆيرۋستىڭ تارالۋىنا توسقاۋىل قويۋ ماقساتىندا كۇرەس شارالارىن كۇشەيتۋدى تاپسىردى.

ەسكە سالا كەتەيىك، بۇدان بۇرىن ورال قالاسىندا شەكتەۋ شارالارى كۇشەيتىلەتىنىن جازعان بولاتىنبىز.

 

سوڭعى جاڭالىقتار

ۇقساس جاڭالىقتار