قازاقستاندا COVID-19-عا قارسى ۆاكتسيناتسيا اقپان ايىندا باستالماق. ەڭ الدىمەن ۆاكتسينا مەديتسينا قىزمەتكەرلەرى مەن مۇعالىمدەرگە سالىنادى.
«18 جاستان اسقان بارلىق ادامدار كوروناۆيرۋس ينفەكتسياسىنا قارسى ۆاكتسيناتسيالاۋعا جاتادى. ەكپە ۆاكتسينانىڭ ءتۇسۋىن ەسكەرە وتىرىپ, كەزەڭ-كەزەڭىمەن جۇرگىزىلەدى. ەڭ الدىمەن, ينفەكتسيانىڭ تارالۋ قاۋپى جوعارى حالىقتىڭ ەڭ وسال توبى – جەدەل جاردەم, رەانيماتسيا بولىمشەلەرى مەن اۋرۋحانالاردىڭ قابىلداۋ بولمەلەرىندەگى مەديتسينا قىزمەتكەرلەرىنە ۆاكتسينا ەگىلە باستايدى. ەكىنشى كەزەڭدە جالپى ءبىلىم بەرەتىن مەكتەپتەردىڭ, ارنايى-ورتا وقۋ ورىندارىنىڭ, ۋنيۆەرسيتەتتەردىڭ پەداگوگتارى, ال ءۇشىنشى كەزەڭدە مەكتەپ-ينتەرناتتاردىڭ, مەكتەپكە دەيىنگى بالالار مەكەمەلەرىنىڭ پەداگوگتارى, ستۋدەنتتەر, سوزىلمالى اۋرۋلارى بار ادامدار وتەدى», دەپ حابارلادى شقو دەنساۋلىق ساقتاۋ باسقارماسى.
COVID-19-عا قارسى ۆاكتسيناتسيا ەرىكتى نەگىزدە عانا جۇرگىزىلەدى. قازاقستان رەسپۋبليكاسىنىڭ «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىنىڭ 77-بابىنا سايكەس ازاماتتار پروفيلاكتيكالىق ۆاكتسيناتسيادان باس تارتۋعا قۇقىلى.
ايتا كەتەيىك, قازاقستاندا تىركەلگەن بارلىق ۆاكتسينالار مەديتسينالىق ۇيىمدارعا تۇسپەي تۇرىپ, ولاردىڭ قاۋىپسىزدىگى مەن ساپاسىنا تەكسەرۋ جۇرگىزىلەدى. بۇل نارىققا تەك ءتيىمدى جانە قاۋىپسىز ۆاكتسينالاردىڭ جىبەرىلۋىن قامتاماسىز ەتۋگە مۇمكىندىك بەرەدى. باسقارما مالىمەتىنە سۇيەنسەك, بيىل شىعىس قازاقستان تۇرعىندارىنىڭ 20%-ىنا COVID-19-عا قارسى ۆاكتسينا ەگۋ جوسپارلانىپ وتىر.
