پرەزيدەنت • 19 قاڭتار، 2021

قازاقستان پرەزيدەنتى مەملەكەتتىك قىزمەت ىستەرى اگەنتتىگىنىڭ توراعاسىن قابىلدادى

32 رەت كورسەتىلدى

كەزدەسۋدە مەملەكەت باسشىسىنا اگەنتتىكتىڭ 2020 جىلى اتقارعان جۇمىستارىنىڭ نەگىزگى قورىتىندىلارى تۋرالى ەگجەي-تەگجەيلى ەسەپ بەرىلدى، دەپ حابارلايدى Egemen.kz اقورداعا سىلتەمە جاساپ.

انار جايىلعانوۆا ۆەدومستۆونىڭ مەملەكەتتىك قىزمەتكە ورنالاسۋ راسىمدەرىن جەتىلدىرۋگە، ساياسي قىزمەتتى كاسىبيلەندىرۋگە، قىزمەتكەرلەردى ىنتالاندىرۋعا جانە دامىتۋعا، پرەزيدەنتتىك جاستار كادرلىق رەزەرۆى بويىنشا جۇرگىزىلەتىن جۇمىستارعا، سونداي-اق، مەملەكەتتىك قىزمەتتىڭ ۇيىمداستىرۋ مادەنيەتىن وزگەرتۋگە قاتىستى اتقارعان جۇمىستارىنىڭ ناتيجەلەرى جونىندە ايتتى.

سونىمەن قاتار قاسىم-جومارت توقاەۆقا مەملەكەتتىك قىزمەتتى تسيفرلاندىرۋ، ونىڭ ىشىندە، «ە-قىزمەت» جۇيەسىنىڭ ينتەگراتسيا اياسىن كەڭەيتۋ جانە «i-Qyzmet» جۇيەسىن ازىرلەۋ بارىسى تۋرالى باياندالدى.

قازاقستان پرەزيدەنتىنە ۆەدومستۆو جۇمىسىن قايتا ۇيىمداستىرۋ جايىندا مالىمەت بەرىلدى. انار جايىلعانوۆانىڭ ايتۋىنشا، بىلتىر اگەنتتىكتىڭ شتاتى 10 پايىزعا قىسقارعان، ال بيىلعى اقپان ايىنىڭ سوڭىنا دەيىن تاعى دا 15 پايىزعا وڭتايلاندىرىلماق.

قاسىم-جومارت توقاەۆ مەملەكەتتىك قىزمەتتى جەتىلدىرە ءتۇسۋ قاجەتتىگى تۋرالى اتاپ ءوتىپ، اگەنتتىك توراعاسىنا ورتالىق جانە جەرگىلىكتى دەڭگەيدەگى مەملەكەتتىك قىزمەتشىلەردى قىسقارتۋ ۇدەرىسىنىڭ اشىقتىعى مەن تيىمدىلىگىن باقىلاۋدى قامتاماسىز ەتۋدى تاپسىردى. سونىمەن قاتار پرەزيدەنت مەملەكەتتىك باسقارۋ تۇجىرىمداماسىن ازىرلەۋ جانە جۇزەگە اسىرۋ اياسىندا ۆەدومستۆونىڭ جۇمىسىن جانداندىرۋعا نۇسقاۋ بەردى. 

سوڭعى جاڭالىقتار

ۇقساس جاڭالىقتار