بيىلعى جىلدىڭ ماۋسىم ايىندا شىعىس قازاقستان وبلىسى اياگوز قالاسىنداعى قۇقىق قورعاۋ قىزمەتكەرلەرى استانالىق كاسىپكەر ۇلان بەرىكحانوۆتى ايۋاندىقپەن ءولتىردى. بۇل تۋرالى «استانا» تەلەارناسى حابارلادى.
37 جاسار كاسىپكەر ۇ. بەرىكحانوۆ شارۋاشىلىعىن كەڭەيتۋ ماقساتىندا شىعىس قازاقستان وبلىسىنان اسىل تۇقىمدى ءىرى قارا مالىن ساتىپ الماقشى بولادى. اياگوز اۋداندىق ىشكى ىستەر ءبولىمى باسشىسىنىڭ ورىنباسارى قىزمەتىن اتقارعان التىنبەك جۇمابەكوۆ وعان كومەكتەسۋگە ۋادە بەرىپ, جەرگىلىكتى جەرگە شاقىرعان. شىعىسقا تابانى تيگەن كاسىپكەردى ا. جۇمابەكوۆ پەن قاسىنداعى ەكى ارىپتەسى قالا سىرتىنا الىپ شىعادى دا, جەلكەسىنەن اتادى. سوسىن مۇردەسىن ورتەپ جىبەرگەن.
ارادا ءبىر ايدان اسا ۋاقىت وتكەندە قاندى قىلمىستىڭ بەتى اشىلدى. تەرگەۋ امالدارى مەن سوت وتىرىسى بىرنەشە ايعا سوزىلدى. سوت ۇكىمىمەن 3 قىلمىسكەر دە شەندەرىنەن ايىرىلدى. قىلمىستى ۇيىمداستىرۋشى رەتىندە التىنبەك جۇمابەكوۆ 22 جىلعا باس بوستاندىعىنان ايىرىلسا, قاسىنداعى سىبايلاستارى 18 جىلعا تەمىر تورعا قامالدى
باقىتبەك كەنەش ۇلى.
دەرەككوز: «استانا» تەلەارناسى
