تاۋەلسىزدىك كۇنىنە وراي ەلورداداعى ۇلتتىق اكادەميالىق كىتاپحانادا قازاقتىڭ تۇڭعىش مەرزىمدى باسىلىمدارىنىڭ ءبىرى, 1911-1913 جىلدارى جارىق كورگەن «قازاقستان» گازەتىندە جاريالانعان تۇشىمدى ماقالالاردى قامتىعان «قازاقستان» كىتابىنىڭ تانىستىرىلىمى بولىپ ءوتتى.
تاۋەلسىزدىك كۇنىنە وراي ەلورداداعى ۇلتتىق اكادەميالىق كىتاپحانادا قازاقتىڭ تۇڭعىش مەرزىمدى باسىلىمدارىنىڭ ءبىرى, 1911-1913 جىلدارى جارىق كورگەن «قازاقستان» گازەتىندە جاريالانعان تۇشىمدى ماقالالاردى قامتىعان «قازاقستان» كىتابىنىڭ تانىستىرىلىمى بولىپ ءوتتى.
«قازاقستان» گازەتى – 1911 جىلعى 10 ناۋرىزدان 1913 جىلعى قاراشاعا دەيىن ەلىمىزدىڭ باتىس وڭىرىندە جارىق كورگەن العاشقى قازاق باسىلىمدارىنىڭ ءبىرى. گازەت سول كەزەڭدەگى ۇلت تاعدىرىنا قاتىستى ماسەلەلەردى كوتەرە ءبىلىپ, حالىققا ونەر-ءبىلىم جولىن ۇسىنعان, وتىرىقشىلىققا شاقىرعان, ناقتى كاسىبي كەڭەس بەرگەن وزىق ويلى باسىلىم بولدى. گازەت ماقالالارىندا كوتەرىلگەن ماسەلەلەردىڭ ارادا ءبىر عاسىر وتكەندە دە وتە وزەكتى ەكەندىگى انىق كورىنەدى.
از ۋاقىت ىشىندە سول كەزدەگى زامان تىنىسىنا وراي وقىرماندارىنا كوپ جايتتاردى ايتا بىلگەن باسىلىم 1913 جىلى پاتشا وكىمەتىنىڭ قىسىمىمەن جابىلىپ قالادى. باسىلىم كەڭەس وكىمەتى جىلدارى ەكىنشى مارتە رەپرەسسياعا ۇشىراسا دا, تىگىندىسى سانكت-پەتەربۋرگ پەن ماسكەۋ قالالارىندا عانا ساقتالعان ەكەن. گازەتتى شىعارۋشى عۇمار قاراش 1921 جىلى قاستاندىقپەن ولتىرىلسە, رەداكتورى ەلەۋسىن بۇيرين قۋدالانىپ, 1932 جىلى تاجىكستاندا اشتىقتان قازا تاپتى. ال ءوز زامانىندا پروگرەسسشىل يدەيالاردىڭ جارشىسى بولعان «قازاقستان» گازەتى تۋرالى ايتۋعا, جازۋعا رۇقسات بولماي, 1947 جىلى ارنايى قاۋلى شىعىپ, اقىن-اعارتۋشى عۇمار قاراشتىڭ شىعارمالارىن وقۋعا, ناسيحاتتاۋعا تىيىم سالىنادى.
گازەت تاريحتا «قازاقستان» اتاۋىن تۇڭعىش قولدانىپ, اينالىسقا ەنگىزۋىمەن دە ەرەكشە ەستە قالادى. بۇعان دەيىن بارلىق رەسمي قۇجاتتا قازاق اتاۋى «كيرگيز», «كيرگيز-كايساكي» دەپ بۇرمالانىپ كەلسە, گازەت شىعارۋشىلارى «قازاق» اتىن ۇلتتىڭ عانا ەمەس, مەملەكەتتىڭ اتاۋى ەتىپ كورسەتە ءبىلدى.
«قازاقستان» گازەتىنىڭ رەسمي رەداكتورى ەلەۋسىن بۇيرين بولسا, ال باسىلىمدى ۇيىمداستىرۋعا, شىعارۋعا شاڭگەرەي بوكەەۆ, عۇمار قاراش, باقىتجان قاراتاەۆ, عابدولعازيز مۇساعاليەۆ, ءسالىمگەرەي نۇرالىحانوۆ, مۇستافا كوكەباەۆ, باتىرحايىر نيازوۆ, باقتىگەرەي قۇلمانوۆ, ماعجان جۇماباەۆ, احمەت مامەتوۆ, عۇبايدوللا بەرديەۆ, ت.ب. ۇلەس قوسقان.
2012 جىلى تۇڭعىش رەت «قازاقستان» گازەتىنىڭ ورىس مۇراعاتتارىنداعى بارلىق سانى قازاقستانعا اكەلىنەدى دە, اراب ءارپىندەگى ماقالالار كيريلليتساعا تۇگەل كوشىرىلىپ, تۇپنۇسقامەن ءبىرگە كىتاپ بولىپ جارىق كوردى. بۇل جيناقتا «قازاقستان» گازەتى ءجانە ونى شىعارۋشىلار تۋرالى دەرەكتەر توپتاستىرىلعان.
باتىس قازاقستان ءوڭىرىنىڭ ازاماتتارى شىعارعان «قازاقستان» كىتابىنىڭ تۇساۋكەسەر-تانىستىرىلىمىندا پارلامەنت ءماجىلىسىنىڭ دەپۋتاتتارى شاۆحات وتەمىسوۆ پەن ساميعوللا ورازوۆ, جازۋشى, عالىم, جۋرناليستەر تابىل قۇلياس, الىبەك اسقار, احمەت الياز, جامبىل ارتىقباەۆ, قايرات ساق, ەرلان سايلاۋباي, پەريزات سەيىتقازى, جانتاس سافۋللين, مەيرامحان جاپەكتەر بۇل يگىلىكتى شاراعا ريزاشىلىقتارىن ءبىلدىرىپ, ءوز وي-پىكىرلەرىن ورتاعا سالدى.
بەرىك سادىر,
«ەگەمەن قازاقستان».
