كەشە بۇكىل ەلىمىزدە «ەلباسى جولى» كينوەپوپەياسىنىڭ جالپىۇلتتىق تانىستىرىلىمى بولىپ ءوتتى
«قاي زاماندا دا, قاي قوعامدا دا تاريحي تۇلعالاردىڭ ۋاقىت بەدەرىندەگى ءىزى كوپ رەتتە كوركەم تۋىندىنىڭ كەيىپكەرى كۇيىندە كەستەلەنىپ قالاتىنى انىق. ارعى-بەرگىدەگى داڭقتى اتا-بابالارىمىزدى بارىنەن بۇرىن تاريحي داستانداردىڭ ارقاۋىنا اينالۋى ارقىلى تانيتىن, قادىر-قاسيەتىن سوعان قاراپ تا باعالايتىن بىزدەر, قازاقتار, مۇنى ءتىپتى جاقسى بىلەمىز» – پرەزيدەنت نۇرسۇلتان نازارباەۆتىڭ ومىرىنە ارنالعان «ەلباسى جولى» كينوەپوپەياسىنىڭ «وتتى وزەن» جانە «تەمىر تاۋ» فيلمدەرىنىڭ استاناداعى تۇساۋكەسەر كورسەتىلىمىنەن كەيىن جازىلعان گازەت ماقالاسىندا (2013, 4 جەلتوقسان) وسىلاي دەلىنگەن ەدى. مىنە, ەندى سول لەنتا بۇكىل ەل كولەمىندە تانىستىرىلاتىن كۇن دە كەلىپ جەتتى. كەشە, 12 جەلتوقساندا استانادا, الماتىدا, بارلىق وبلىس ورتالىقتارىندا ءفيلمنىڭ جالپىۇلتتىق تۇساۋكەسەرى وتكىزىلدى. وعان شىعارماشىلىق زيالى قاۋىم مەن مادەني جۇرتشىلىقتىڭ, دەپۋتاتتىق كورپۋستىڭ, قوعامدىق ينستيتۋتتار مەن ساياسي پارتيالاردىڭ, ارداگەرلەر مەن جاستاردىڭ, ءوندىرىس ورىندارى جەتەكشىلەرى مەن جۇمىسشىلارىنىڭ, الەۋمەتتىك سالا ۇيىمدارىنىڭ, سونداي-اق كورەرمەن قاۋىمنىڭ وكىلدەرى قاتىستى. بۇكىل ەل كولەمىندە ۇيىمداستىرىلعان بۇل اكتسيانىڭ ناتيجەسىن گازەت بەتىنە جەدەل جەتكىزۋ ءۇشىن ءبىز وڭىرلەردەگى مەنشىكتى تىلشىلەرگە ءفيلمدى تاماشالاعان جۇرتشىلىقتىڭ پىكىرلەرىن جازىپ الىپ, رەداكتسياعا شۇعىل جولداۋدى تاپسىرعان بولاتىنبىز. ەندى ەلباسىمىز تۋرالى كوركەم تۋىندىدان ەل حالقىنىڭ العان اسەرلەرىنە, زيالى قاۋىم تولعانىستارىنا نازار سالىڭىزدار.
كەشە بۇكىل ەلىمىزدە «ەلباسى جولى» كينوەپوپەياسىنىڭ جالپىۇلتتىق تانىستىرىلىمى بولىپ ءوتتى
«قاي زاماندا دا, قاي قوعامدا دا تاريحي تۇلعالاردىڭ ۋاقىت بەدەرىندەگى ءىزى كوپ رەتتە كوركەم تۋىندىنىڭ كەيىپكەرى كۇيىندە كەستەلەنىپ قالاتىنى انىق. ارعى-بەرگىدەگى داڭقتى اتا-بابالارىمىزدى بارىنەن بۇرىن تاريحي داستانداردىڭ ارقاۋىنا اينالۋى ارقىلى تانيتىن, قادىر-قاسيەتىن سوعان قاراپ تا باعالايتىن بىزدەر, قازاقتار, مۇنى ءتىپتى جاقسى بىلەمىز» – پرەزيدەنت نۇرسۇلتان نازارباەۆتىڭ ومىرىنە ارنالعان «ەلباسى جولى» كينوەپوپەياسىنىڭ «وتتى وزەن» جانە «تەمىر تاۋ» فيلمدەرىنىڭ استاناداعى تۇساۋكەسەر كورسەتىلىمىنەن كەيىن جازىلعان گازەت ماقالاسىندا (2013, 4 جەلتوقسان) وسىلاي دەلىنگەن ەدى. مىنە, ەندى سول لەنتا بۇكىل ەل كولەمىندە تانىستىرىلاتىن كۇن دە كەلىپ جەتتى. كەشە, 12 جەلتوقساندا استانادا, الماتىدا, بارلىق وبلىس ورتالىقتارىندا ءفيلمنىڭ جالپىۇلتتىق تۇساۋكەسەرى وتكىزىلدى. وعان شىعارماشىلىق زيالى قاۋىم مەن مادەني جۇرتشىلىقتىڭ, دەپۋتاتتىق كورپۋستىڭ, قوعامدىق ينستيتۋتتار مەن ساياسي پارتيالاردىڭ, ارداگەرلەر مەن جاستاردىڭ, ءوندىرىس ورىندارى جەتەكشىلەرى مەن جۇمىسشىلارىنىڭ, الەۋمەتتىك سالا ۇيىمدارىنىڭ, سونداي-اق كورەرمەن قاۋىمنىڭ وكىلدەرى قاتىستى. بۇكىل ەل كولەمىندە ۇيىمداستىرىلعان بۇل اكتسيانىڭ ناتيجەسىن گازەت بەتىنە جەدەل جەتكىزۋ ءۇشىن ءبىز وڭىرلەردەگى مەنشىكتى تىلشىلەرگە ءفيلمدى تاماشالاعان جۇرتشىلىقتىڭ پىكىرلەرىن جازىپ الىپ, رەداكتسياعا شۇعىل جولداۋدى تاپسىرعان بولاتىنبىز. ەندى ەلباسىمىز تۋرالى كوركەم تۋىندىدان ەل حالقىنىڭ العان اسەرلەرىنە, زيالى قاۋىم تولعانىستارىنا نازار سالىڭىزدار.
*استانا. 12 جەلتوقسان. بەيبىتشىلىك جانە كەلىسىم سارايى.
قاراعاندى
كوردىك, كوڭىلىمىز تولدى
قابيدوللا سارەكەنوۆ,
مەملەكەتتىك سىيلىقتىڭ لاۋرەاتى, تەحنيكا عىلىمدارىنىڭ دوكتورى.
شىنى كەرەك, ەلباسىنىڭ ەڭبەك, ءومىر جولى تۋرالى كەڭ كولەمدى جاڭا كينوتۋىندىنىڭ ءتۇسىرىلىپ جاتقانىن ەستىگەندە, قالاي شىعار ەكەن دەگەن وي ەرىكسىز كوڭىل ەلەڭدەتكەن ەدى. بۇل ونەر ءتۇرىنىڭ قىر-سىرىنا ونشالىقتى قانىق بولماعاندىقتان با, زامانىمىزدىڭ زاڭعار تۇلعاسىنىڭ جالىنداعان جاستىق شاعىنان قالىپتاسا باستاعان, اباي ۇلاعاتىنداعىداي, «ىستىق قايرات, نۇرلى اقىل, جىلى جۇرەك» بىتكەن بەينەسىن سومداۋعا تالاپ وڭاي كورىنبەگەنى راس. وسىنداي قاتارىنان وزا تانىلعان اداممەن دنەپرودزەرجينسك قالاسىنداعى مەتاللۋرگتەر دايارلايتىن ۋچيليششەدە بىرگە وقۋ, سىيلاستىق جاراستىرۋ باقىتىن تاعدىر ماڭدايىمىزعا جازعان بىزدەرگە ءوزىمىز كۋا شىندىقتى قاز-قالپىندا كورۋ مۇمكىندىگى ءبىر جاعىنان قۋانتقان دا بولاتىن.
«ەلباسى جولى» كينوەپوپەياسىنىڭ استانادا وتكەن «وتتى وزەن» جانە «تەمىر تاۋ» اتتى بولىمدەرى تۇساۋكەسەرىنە ۇلكەن تولقىنىسپەن بارۋىم جاسىرارلىق سىر ەمەس. كينو ونەرىنىڭ قۇدىرەتتىلىگى دە سول عوي, بۇدان شيرەك عاسىر بۇرىنعى داۋرەن شاق قايتا اينالىپ كەلگەندەي ادەمى ءبىر اسەردى ايتىپ جەتكىزۋ قيىن. بولاشاق تۇڭعىش پرەزيدەنتىمىزدىڭ ەرتە وتىققان, شيرىققان العىرلىق, ىسكەرلىك, ۇيىمداستىرۋشىلىق, قابىلەت-قاسيەتتەرى ءبىز كورگەن, كوزدە قالعان ناقتى وقيعالار جەلىسىندە ءوربىتىلىپ, كەستەلەنگەن كورىنىستەر, تۇرمىستىڭ ىستىق-سۋىعى, تىرشىلىكتەگى كۇيىنىش-ءسۇيىنىش ءبارى-ءبارى ساۋىتبەك ابدراحمانوۆ «ەگەمەن قازاقستانداعى» «ەر جولى – ەل جولى» ماقالاسىندا جاقسى بايىپتاعانداي ءومىر شىندىعى. فيلمدە تارتىمدى سۋرەتتەلگەندەي, جولداستىققا ادالدىق, ەڭبەكتەستەرىمەن ارالاس-قۇرالاستىقتاعى كىشىپەيىلدىلىك پەن قاراپايىمدىلىق, ال ءىس بابىندا كىم-كىمگە دە بيىك تالاپشىلدىق بارىمىزگە ۇلگى بولعان تاعىلىم.
مىنەكي, كورىپ, كوڭىل تولعاندا بۇل ءفيلمدى ايتۋلى تۋىندى رەتىندە باعالاۋعا تۇرارلىعىن ايتا الامىن. بارلىق بۋىنعا ونەگەلىك عيبراتى وتە مول, ءومىردىڭ وزىنەن الىنىپ, كورەرمەن كوكىرەگىن كوركەيتەر مۇنداي كوركەم دۇنيەلەر تۇسىرۋگە تالپىنىس قۇبا-قۇپ قۇبىلىس دەر ەدىم.
التىن پاراق
قۋانىش وماشەۆ,
ارداگەر مەتاللۋرگ.
تۇڭعىش پرەزيدەنتىمىزدىڭ ۇلكەن جۇرەكتى ازاماتتارعا ءتان تاماشا ادامگەرشىلىك قاسيەتتەرى ماعان تاعدىر تەمىرتاۋدا تابىستىرعان, قاراعاندى پوليتەحنيكالىق ينستيتۋتىندا قاتارلاس وقىعان, مەتاللۋرگيا كومبيناتىندا قولتىقتاسا ەڭبەك ەتكەن, جاس وتباسىلىق قۋانىشتارعا ورتاقتاس بولعان ءورىم شاعىمىزدان ەتەنە تانىس. ءبىر مەن عانا ەمەس, قيىندىعى دا جەتىپ ارتىلعان سىندارلى كەزدە سۋارىلعان سىيلاستىق التىنبەك اسانوۆ, ۆلاديمير كولباسا, ساتىبالدى يبراگيموۆ, ۆلاديمير كاۋتس سىندى زامانداستارىما دا ىستىق ەكەنى كۇمانسىز. ارادا ءبىراز جىلدار وتسە دە ەلباسىنىڭ بىزدەردى ۇمىتپاي, ۇلكەن باسىن ءيىپ, اراداعى قارىم-قاتىناستى ۇزبەۋى بيىك مادەنيەتتىلىكتىڭ ۇلگىسى ەكەنى داۋسىز.
وسىناۋ ءفيلمدى تاماشالاۋ الدىندا ارقايسىمىز جۇرەگىمىزدىڭ تۇكپىرىندەگى وقيعا-جاعداياتتاردىڭ كورەرمەن قاۋىمعا قالاي جەتكىزىلۋى جونىندە ءارتۇرلى ويلارعا تەربەلدىك. العاشقى كورىنىستەردەن-اق باۋراي باستادى. سوڭىندا تىپتەن ۇنادى. ەلباسىنىڭ جاستىق شاعىنداعى بەينەسىمەن قاتار, ءوز بەينەلەرىمىزبەن دە قايتا تابىسقانداي بولدىق. بۇل كينوەپوپەيا ەلىمىز مادەنيەتى شەجىرەسىنىڭ ءبىر التىن پاراعى دەيتىن دەڭگەيدە تۇسىرىلگەن ەكەن.
تەمىرتاۋلىقتار ءوز ورتاسىنان وسكەن, ارعىن ءجۇنىسوۆ اعامىز «ءبىزدىڭ پرەزيدەنت – مەتاللۋرگ!» دەپ ارقالانا ايتاتىنداي, تۇڭعىش پرەزيدەنتتەرىن ماقتانىش تۇتادى. فيلم بۇل ورىندى ماقتانىش ەكەنىن تانىتتى.
تالدىقورعان
ەڭبەكپەن قايناپ وسكەن ەر
ارداق سىدىق,
الماتى وبلىستىق ارداگەرلەر ۇيىمىنىڭ توراعاسى.
كەشە ءبىز جەتىسۋلىقتار ءى. جانسۇگىروۆ اتىنداعى مادەنيەت سارايىندا قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ تۋرالى ءتۇسىرىلىپ, كورەرمەندەر نازارىنا العاش ۇسىنىلعان «ەلباسى جولى» «تەمىر تاۋ», «وتتى وزەن» اتتى فيلمدەردى كوردىك. ناعىز ومىردەن ويىپ الىپ, ەش اسىرەلەۋسىز تۇسىرىلگەن ءفيلمنىڭ تاربيەلىك ءمانىنىڭ وتە جوعارىلىعىنا, ەلباسىنىڭ ۇستامدىلىعىنا ءتانتى بولدىم. مىسالى وتكەن عاسىردىڭ 60-جىلدارىندا كومسومولدىق جولدامامەن تەمىرتاۋعا كىمدەر بارمادى. سول جۇمىسشىلاردىڭ ورتاسىندا ۇلتتىق رۋحتى بيىكتەتىپ, دوسىنا ادالدىعىمەن دارالانىپ, وزىندىك ۇستانىمىمەن ەرەكشەلەنگەن نۇرسۇلتان ءابىش ۇلىنىڭ ءار ارەكەتىنە ءتانتى بولدىم, ءسۇيىندىم. قارا جۇمىستان قاشپاي ءھام قايىسپاي قايسارلىعىمەن ەڭبەكتەستەرىنەن ءبىر ساتى جوعارى تۇرعانى تاعى بار. ۇلتتىق رۋحتى بيىك ۇستاپ, نامىسقويلىعىن دا رەتىنە وراي كورسەتە العاندىقتان وزگەلەردەن مىسى باسىم بولعانىن دا اڭعاردىم. جۇرەك قالاۋىمەن تاڭداعان ماماندىعىنىڭ قىر-سىرىن مەڭگەرۋ بارىسىندا توزىمدىلىگىن تانىتىپ قانا قويماي, قايىسپاس قايسارلىعىن كورسەتە بىلگەنى قانداي عالامات.
پاۆلودار
تۇلعا تاعىلىمى
ەرجان راقىمجانوۆ,
پاۆلودار وبلىستىق ءدىن ىستەرى جونىندەگى باسقارما باسشىسى.
بۇل كينوفيلمدى كورۋگە, اسىرەسە, جاستار كوپ كەلدى. ولارعا وتكەن ءومىردىڭ كورىنىستەرى, ارينە, تاڭسىق. ەلباسى تۋرالى ءفيلمدى تاماشالاي وتىرىپ ولار كوپ جايدى كوڭىلدەرىنە ءتۇيدى. ۇلگى-ونەگە دەگەن وسى. «ەلباسى جولى» – بۇگىنگى جاستارعا ساباق. راسىندا دا, كينوەپوپەيا دەسە بولعانداي. كورەرمەندەر ەلباسىنىڭ جاس كەزىندەگى ءومىرىن, قاجىر-قايراتتى جىگەرىن كورسەتە بىلگەن دارىندى اكتەر نۇرلان ءالىمجاننىڭ دا ونەرىنە ءسۇيسىنىپ تارقاستى.
بۇگىنگى ۇرپاق تۇڭعىش پرەزيدەنتىمىز دە ءبىزدىڭ اكەلەرىمىز بەن اپالارىمىز كورگەن قيىندىقتى كورىپ, ەڭبەكتە شىڭدالىپ, ءوز كۇش-جىگەرىنىڭ ارقاسىندا ۇلكەن ماقساتقا قول جەتكىزگەنىن بىلۋلەرى قاجەت. جاستار, ۇل-قىزدارىمىز يماندى, ەڭبەكقور, ءبىلىمدى, جىگەرلى بولسىن دەسەك, اتىس-شابىس, قورقىنىشتى كينولاردان گورى تاريح بەتتەرىن وسىلاي اشىپ كورسەتۋىمىز كەرەك. دۇنيەگە وزگەرىس كەلدى دەپ جەڭىلتەك ويلارعا ەرىپ, جاستارىمىز يماندىلىق داستۇرلەردەن ايىرىلىپ كەتە جازدادى. سوندىقتان, «ەلباسى جولى» – ناعىز تانىمدىق, ۇلكەنگە دە كىشىگە دە وي سالاتىن كينو دەپ باعالايمىن.
تاراز
ۇرپاققا ۇسىنار ۇلگى
ايگۇل ابيەۆا,
كوپبالالى انا.
ەلىمىزدىڭ تۇڭعىش پرەزيدەنتى نۇرسۇلتان ءابىش ۇلى نازارباەۆتىڭ ءومىرى, ەڭبەك جولى تۋرالى سىر شەرتەتىن «ەلباسى جولى» كينوەپوپەياسىنىڭ «وتتى وزەن» جانە «تەمىر تاۋ» اتتى ەكىنشى, ءۇشىنشى تاراۋلارىنىڭ كورسەتىلىمى ماعان ۇلكەن اسەر ەتتى. بۇل سول زاماننىڭ قيىن دا قىزىق تىرشىلىگىن باستان كەشىپ, بولاتتاي شىنىعىپ, ەل باسقارعان ازاماتقا اينالعان ەلباسىمىزدىڭ وتتاي جانعان جالىندى جولى بولعاندىقتان دا قىمبات. وتكەن عاسىردىڭ باستى وقيعالارىنىڭ ءبىرى – الىپ ونەركاسىپ ورىندارىنىڭ قۇرىلىسى, سول داۋىردەگى قازاق جاستارىنىڭ ەڭبەككە دەگەن قۇلشىنىسى فيلمدە تاماشا ۇيلەسىم تاپقان.
التى بالانىڭ اناسى رەتىندە مەن بۇل ءفيلمنىڭ وسكەلەڭ ۇرپاق تاربيەسىنە ۇلكەن ۇلەس قوساتىن تۋىندى ەكەنىن ايتقىم كەلەدى. ويتكەنى, وسىنداي ەڭبەك جولىنان وتكەن ەلباسىمىزدىڭ بەينەسى ۇرپاققا ۇلگى بولارى ءسوزسىز. وتاندى ءسۇيۋ, ەل ءۇشىن تەر توگۋ, ءوز ىسىنە ادال بولۋ, تاڭداعان جولىنان قايتپاۋ سەكىلدى قاسيەتتەر ءفيلمنىڭ باستى يدەياسى دەپ بىلەم. كوركەم تۋىندىنى كورگەن ءاربىر ەستى ازامات, ونەگەلى وتباسى مەنىڭ پىكىرىمە قوسىلادى دەپ سەنەمىن.
استانا
ءداۋىر كورىگىندە شىڭدالعان
گۇلجيھان كەڭەس,
س.سەيفۋللين اتىنداعى اگروتەحنيكالىق ۋنيۆەرسيتەتتىڭ اعا وقىتۋشىسى.
1 جەلتوقسان – تۇڭعىش پرەزيدەنت كۇنىندە «قازاقستان» كونتسەرت زالىندا «ەلباسى جولى» كينوەپوپەياسىنىڭ تۇساۋكەسەرىنە قاتىسا العان ادامدارعا قىزىعا قاراپ جۇرگەن ەدىم. ولار ءفيلمدى العاش كورگەندەرىن قۋانا ايتىپ, لەنتانىڭ شىنايىلىعىنا, ءومىر سۋرەتتەرىن ءدال بەينەلەگەنىنە ناقتى مىسالدار كەلتىرىپ سويلەگەن بولاتىن. ەندى, مىنە, كەشە سول قۋانىشقا مەن دە بولەندىم. كوپتەن كۇتكەن كينولەنتا كوڭىلىمنەن شىقتى.
كورەرمەندەردىڭ اراسىندا بۇل شىعارماعا كۇپتى كوڭىلمەن قاراعاندار از بولماعان شىعار. ەلباسىمىزدىڭ ءومىرىن ءوزىنىڭ كىتاپتارىنان, كوپتەگەن سۇحباتتارىنان, پرەزيدەنت تۋرالى جازىلعان كىتاپتاردان جاقسى بىلەمىز عوي. سونداعى دەرەكتەر ونەر تىلىمەن قالاي سويلەيدى ەكەن دەپ تە ويلانعانبىز. ويتكەنى, عۇمىربايان دەرەكتەرىنىڭ ءبارى بىردەي شىعارما ارقاۋىنا اينالا المايدى عوي. وسى تۇرعىدان قاراعاندا, ستسەناري اۆتورلارى ەلباسى ءومىرىنىڭ دراماعا, تارتىسقا تولى تۇستارىن ءدال تابا ءبىلگەنىن رازىلىقپەن ايتقىم كەلەدى. فيلمنىڭ العاشقى كادرلارىنان باستاپ ءتۇيىندەلەر تۇسىنا دەيىن كورەرمەن نازارىن ءبىر ساتكە دە بوساڭسىتپاي ۇستاي العانى سۇيسىنتەدى. مۇنىڭ ەڭ باستى سەبەبى, ارينە, ەلباسىمىز نۇرسۇلتان نازارباەۆتىڭ جاس شاعىنان ءومىر كورىگىندە قۇرىشتاي شىڭدالىپ وسكەن ءومىربايانىنىڭ بايلىعى, مازمۇندىلىعى. فيلم تابىسىنىڭ نەگىزگى سىرى دا وسىندا.
اقتوبە
سىرلى الەمنىڭ ءساتتى سۋرەتتەرى
ازات قامارحان,
قازاق-ورىس حالىقارالىق ۋنيۆەرسيتەتىنىڭ ءىV كۋرس ستۋدەنتى.
وبلىس ورتالىعىنداعى «لوكوموتيۆ» كينوتەاترىندا نۇرسۇلتان ءابىش ۇلىنىڭ «ادىلەتتىڭ اق جولى», «بەيبىتشىلىك كىندىگى» جانە «ەۋرازيا جۇرەگىندە» شىعارمالارىنىڭ نەگىزىندە قويىلعان «ەلباسى جولى» كينوەپوپەياسىنىڭ جالعاسى «وتتى وزەن» جانە «تەمىر تاۋ» فيلمدەرى كورسەتىلەدى دەگەندە شىن كوڭىلدەن اسىقتىق. تاماشا تۋىندىنى كورىپ, ەرەكشە سەزىمگە بولەندىك.
ەلباسى ومىرىنەن الىنىپ, تاريحي وقيعالار تىزبەگىندە جاسالعان فيلمدەر شىنايىلىعىمەن, شىنشىلدىعىمەن كورەرمەندەردى باۋراپ الدى دەسەم ارتىق ايتقاندىق بولماس. فيلمدە باياندالاتىن وقيعالار مەن كورىنىستەردە ەشقانداي جاساندىلىق جوق. تاريحي تۇلعانىڭ ءومىرى مەن ەڭبەك جولى ونەرمەن وزەكتەس ءورىلىپ, كوركەم دۇنيە بولىپ شىققان. ءفيلمنىڭ باستى كەيىپكەرى سۇلتاننىڭ باسىنان وتكەن وقيعالار ارقىلى كەڭەس وكىمەتى تۇسىنداعى ءومىر سيپاتى, ۇلتتار دوستىعى, سول كەزدەگى جاستاردىڭ كيىم كيىسى, ءجۇرىس تۇرىسى, ارمان - مۇراتى كوز الدىڭا كەلەدى. سۇلتاننىڭ ادامگەرشىلىگى, دوستىققا ادالدىعى, ەڭبەكقورلىعى, ىزدەنىمپازدىعى قيسىندى وقيعالارمەن ساباقتاستىرىلادى.
ء فيلمدى كورىپ وتىرىپ, ەلباسىنىڭ بويىنداعى قاسيەتتەردىڭ اتا-اناسىنىڭ قانىمەن, تاربيەسىمەن كەلگەنىن ايقىن اڭعاراسىڭ. قانداي ورتادا ءوزىنىڭ كوشباسشىلىق قاسيەتىمەن دارالانىپ تۇراتىن سۇلتاننىڭ ءاربىر ءىس-ارەكەتىنە ىشتەي ءسۇيسىنىپ وتىراسىڭ. كينونى ەمەس, ءومىردى كورگەندەي اسەرگە بولەندىك.
شىمكەنت
رۋح پەن كۇش بەردى
ارمان وسپانوۆ,
سامبودان الەم چەمپيونى.
بىردەن ايتۋ كەرەك, كينو وتە ءساتتى شىعىپتى. نۇرسۇلتان ءابىش ۇلىنىڭ بويىندا سول جىلداردان-اق كوشباسشىلىق قاسيەتتەردىڭ تانىلا باستاعانى, ونىڭ ءوز قاتارلاستارىنىڭ اراسىندا توپ باستار تۇلعاعا اينالعانى فيلمدە شىنايى كورسەتىلگەن. جولداستىققا بەرىكتىگى, قامقورلىعى, قانداي قيىن جاعداي بولسا دا اراشا ءتۇسىپ, شىندىققا بەلسەنە كىرىسىپ, ادىلدىك, ادالدىق ءۇشىن جالىنداپ وتقا تۇسكەنى وتە كەرەمەت شىققان. ەلباسىنىڭ وسى قاسيەتتەرى زال تولى كورەرمەندەرگە ۇلكەن اسەر بەردى.
ارينە, تەمىرتاۋ مەن دنەپرودزەرجينسكى قالالارىندا نۇرسۇلتان نازارباەۆتىڭ ءجۇرىپ وتكەن ەڭبەك جولى تۋرالى بۇعان دەيىن تالاي وقىدىق, ەستىدىك. فيلمدە زاۋىتتىڭ توڭىرەگىندەگى قۇرىلىستىڭ اراسىندا, بالشىق پەن جاڭبىردىڭ اراسىندا جۇرگەن كۇندەرى وتە نانىمدى تۇسىرىلگەن. تۋرا سول زامان, سول ۋاقىت تىنىسىن, كورىنىسىن كوز الدىڭىزعا كەلتىرەدى.
جالپى, بۇل فيلم ءوز كورەرمەندەرىنە ۇلكەن وي تاستاپ, بويلارىنا رۋح پەن كۇش بەرگەنى انىق.
پەتروپاۆل
ومىرمەن وزەكتەس ونەر
مارات باتىروۆ,
پەتروپاۆل اسكەري ينستيتۋتى باسشىسىنىڭ ورىنباسارى.
قازاقستان رەسپۋبليكاسىنىڭ تۇڭعىش پرەزيدەنتى جايلى تۇسىرىلگەن «ەلباسى جولى» كينوەپوپەيانىڭ «بالالىق شاعىمنىڭ اسپانى» اتتى العاشقى ءبولىمىن كورىپ, ومىرمەن وزەكتەس شىنايى شىندىقتى نانىمدى بەرە بىلگەن شەبەرلىككە ءتانتى بولىپ ەدىم. ەندى, مىنە, ەل تاۋەلسىزدىگى مەرەكەسى قارساڭىندا ەلباسىمىزدىڭ ەڭبەكپەن قايناعان بەل-بەلەستەرىن سۋرەتتەۋگە ارنالعان «وتتى وزەن» جانە «تەمىر تاۋ» تاراۋلارىن تاماشالاۋدىڭ ءساتى ءتۇستى. وبلىس ورتالىعىنداعى 450 ورىندى «قازاقستان» كينوتەاترىنا كەلۋشىلەر قاتارى وتە قالىڭ بولدى.
الەمگە ايگىلى تۇلعا جايلى ەپوپەيالىق تۋىندى جاساپ شىعارۋ – قيىننىڭ قيىنى دەسەك, جۇرتشىلىق نازارىنا قۇندى ەڭبەك ۇسىنا بىلگەن جانە وسى سىننان سۇرىنبەي وتكەن شىعارماشىلىق ۇجىمنىڭ ەڭبەگىن قالاي ماداقتاساق تا جاراسادى. ءبارىمىزدىڭ كوز الدىمىزدان سۇلتاننىڭ بوزبالا شاعىنان باستاپ, ازاماتتىق تۇلعالىق دەڭگەيگە دەيىنگى قالىپتاسۋ ءومىر جولى ەش بوياماسىز نانىمدى بەينەلەنگەن. ەكى سەريالى ءفيلمنىڭ ونە بويىنان قازاق حالقىنىڭ دارا دا دانا ۇلىنىڭ ءجۇرىپ وتكەن جولدارى ءار كەزەڭنىڭ ۋاقىت تابىنان ناقتى بەدەر-بەلگى قالدىرعانداي ۇلكەن اسەر الدىق.
مەنىڭشە, «ەلباسى جولى» ەپوپەياسىنىڭ تۇساۋكەسەرىنىڭ ءساتتى كەسىلگەنىنە قاراعاندا, وسكەلەڭ ۇرپاق ءۇشىن دە ءتالىم-تاربيەسى مول ونەر تۋىندىسى بولارى انىق.
قوستاناي
ماقساتقا جەتۋدى ۇيرەتەدى
تاتيانا بۋلگاتسەۆيچ,
قالالىق پەريناتالدى
ورتالىعىنىڭ ديرەكتورى.
فيلمنەن العان اسەرىم ەرەكشە. فيلم ءبىزدىڭ اتا-انالارىمىزدىڭ جاستىق شاعىنىڭ جەڭىل بولماعاندىعىن كورسەتەدى. سوعىستان كەيىنگى كەزەڭنىڭ اۋىرلىعى كينودا سەنىمدى, سودىر ساياساتتىڭ ءىزى جاقسى كورسەتىلگەن. ءبىز بالا بولساق تا اتا-انالارىمىز ەلىمىزدەگى الىپ قۇرىلىستاردى سالۋ جەڭىل بولماعاندىعىن ايتىپ وتىراتىن. ەلباسى مەن ونىڭ زامانداستارى قيىندىقتاردى كورىپ ءجۇرىپ, نۇرسۇلتان ءابىش ۇلىنىڭ ءوزى ايتقانداي, بولاتتاي شىڭدالدى.
فيلم ماعان ەلباسىنىڭ ادام, ازامات, تۇلعا رەتىندە قالىپتاسۋىن بوياماسىز شىنايى كورسەتۋىمەن ۇنادى. مۇندا ات جالىن تارتىپ مىنگەننەن-اق نۇرسۇلتان ءابىش ۇلىنىڭ الدىنا ماقسات قويا بىلگەندىگى بايقالادى. بۇگىنگى الەم مويىنداعان تۇلعانىڭ ساياساتكەر رەتىندەگى كورەگەندىك ەرەكشەلىگىنە دە جاس كەزىندەگى تاڭعالارلىق تاباندىلىعى نەگىز بولعان شىعار دەگەن ويدا وتىردىم.
تەمىرتاۋدا بەتىن بالقىعان بولاتتىڭ جالىنى شارپىپ, شارشاپ جۇرگەن سۇلتاننىڭ ءاردايىم كىتاپ وقىپ وتىراتىنى بايقالادى. بۇل, بىرىنشىدەن, شىنايى شىندىق, ەكىنشىدەن, بۇگىنگى جاستارعا تاماشا ۇلگى. ءفيلمنىڭ كوركەمدىگىنە, رەجيسسەرلىك بايلامدارىنا دا ريزا بولىپ وتىراسىڭ. تاعى ءبىر سۇيسىنتكەنى, اكتەرلەر وتە شەبەر وينايدى ءارى دۇرىس ىرىكتەلىپتى.
ءبىز كينوزالدان شىققاندا ىلعي جاستار ءفيلمنىڭ كەلەسى كورسەتىلىمىنە كەزەكتە تۇر ەكەن. وسىعان شۇكىرشىلىك ەتتىم, ءبىر جاعى تولقىپ تا كەتتىم.
اتىراۋ
ەردىڭ جولى
سامات ساعىندىقوۆ,
«ەمبىمۇنايگاز» اق قىزمەتكەرى.
ادەتتە ءار ادامنىڭ ازامات رەتىندە قالىپتاسۋ, ءومىردىڭ سان الۋان قيىندىعىندا شىڭدالۋ جولى ارقيلى بولىپ كەلەدى. ال تاۋەلسىز قازاقستاننىڭ تۇڭعىش پرەزيدەنتى نۇرسۇلتان نازارباەۆ مەتاللۋرگتەن بۇگىنگى مەملەكەت باسشىسىنا دەيىنگى شىڭدالۋدىڭ شىنايى ۇلگىسىن كورسەتكەن تۇلعا. جالىنداعان جاستىق شاعىندا جان قيناماي-اق تابىس تاباتىن كاسىپتى ەمەس, قىزۋى بەت قاريتىن دومنا پەشىنىڭ جانىندا تۇرىپ, مەتالل بالقىتاتىن مەتاللۋرگ ماماندىعىن تاڭداۋىنان قيىندىقپەن كۇرەسە بىلەتىن تاباندىلىعىن اڭعارامىز. ارينە, ءار ماماندىقتىڭ وزىندىك قيىندىعى بار دەسەك تە, مەتاللۋرگيا سالاسىندا جۇمىس جاساۋ, ءبىز ويلاعانداي, سونشالىقتى وڭاي ەمەس قوي. مۇنداي كاسىپ اتاۋلىنىڭ ىشىندەگى قيىندىعى كوپ ماماندىقتى جان-جاقتى مەڭگەرۋگە ەرىك-جىگەرى مىقتى ازاماتتار عانا توزە الادى.
نۇرسۇلتان نازارباەۆتىڭ ۋكراينادا وقىعان كەزىندە قازاقتىڭ بىلىمگە قۇشتارلىعىن تانىتۋى مەن مەتاللۋرگيانىڭ قازانىندا قايناپ, كەز كەلگەن قيىندىقتى تايسالماي, جەڭە بىلەتىن العىرلىعىن بۇگىنگى تاۋەلسىز ەلىمىزدىڭ ورەندەرىنە ونەگە بولاتىن ەردىڭ جولى دەۋگە تولىق نەگىز بار. «ەلباسى جولى» كينوەپوپەياسىن كورگەندە بىردەن وسى ويعا بەكىدىك. تاۋەلسىز قازاقستاندى الەمگە تانىتقان تۇلعانىڭ ءار كەزەڭدەگى شىڭدالۋ جولدارى كينو تۋىندىدا, اسىرەسە, «وتتى وزەن», «تەمىر تاۋ» بولىمدەرىندە شىنايى سومدالعان. بۇل تۋىندى وسىنىسىمەن دە قۇندى دەپ ويلايمىن.
وسكەمەن
وتانشىلدىققا تاربيەلەيدى
ۆالەري قاسىمباەۆ,
«ومارتاشى» شارۋا قوجالىعىنىڭ توراعاسى.
قازاقستاننىڭ تۇڭعىش پرەزيدەنتى نۇرسۇلتان نازارباەۆ تۋرالى «ەلباسى جولى» كينوەپوپەياسىن تاماشالاپ وتىرعاندا مەنىڭ كوز الدىما بالالىق شاعىم ەلەستەدى. قازاقتىڭ ۇلان-عايىر سايىن دالاسى كوسىلىپ جاتىر. كولىككە مىنگەن جاس جىگىت تەمىرتاۋعا جەتىپ, ەڭبەك جولىن باستاعانشا جۇرەگى الابۇرتىپ, جان-جاعىنا قۇمارتا كوز سالادى. نۇراعاڭنىڭ قازاقستان ماگنيتكاسىنداعى ەڭبەك جولى, مەتاللۋرگتەر اراسىنداعى بەدەلى, قىزمەت باسپالداقتارىمەن تەز ءوسىپ كەمەلدەنۋى, سپورتپەن شۇعىلدانۋى سونداي تارتىمدى شىققان. ءفيلمنىڭ ەكىنشى سەرياسىندا دا نۇراعاڭنىڭ بەينەسى ءساتتى شىققان دەپ ايتۋعا بولادى. اسەل ساعاتوۆا, نۇرجۇمان ىقتىمباەۆ, باسقا اكتەرلەر ەلباسى مەن اكەسىنىڭ, اناسىنىڭ ءرولىن تارتىمدى سومداي بىلگەن.
وسكەمەندەگى «ءۇلبى» مادەنيەت سارايىنا جينالعان ءبىر مىڭنان استام كورەرمەن ءفيلمدى ەرەكشە ىقىلاسپەن تاماشالادى. ايتا كەتۋ كەرەك, كينو جاستارعا ەلدى سۇيۋدە, پاتريوتتىق تاربيە بەرۋدە ەرەكشە ورىن الادى. كەز كەلگەن جاس «شىركىن مەن دە نۇراعاڭ سياقتى ەلىمە ەلەۋلى, حالقىما قالاۋلى ازامات بولىپ وسسەم» دەپ ارماندايتىنى بەلگىلى. قىسقاسى, فيلم وتە ءساتتى شىققان.
كوكشەتاۋ
ورەلى ونەگە
جىلقىباي عالياكپاروۆ,
«جاس» شارۋا قوجالىعىنىڭ جەتەكشىسى.
تالعاپ قارايتىن بولساق, كينو ونەرىنىڭ عيبراتى جۇرەككە جاقىن تۇرادى. مەن بۇل ورايدا تاۋەلسىز ەلىمىزدىڭ تۇڭعىش پرەزيدەنتى نۇرسۇلتان نازارباەۆ جايلى تۇسىرىلگەن دەرەكتى فيلمدەر مەن حرونيكالىق كورسەتىلىمدەردى قالت جىبەرمەۋگە تىرىسامىن. ويتكەنى, شالعاي اۋىلداردىڭ تۇرعىندارى ءۇشىن بۇل ەلباسىمەن سىرتتاي تىلدەسىپ, سىرلاسۋدىڭ, قۇندى ويلارىنان تاعىلىم ءوربىتۋدىڭ وڭتايلى مۇمكىندىگى.
ءاۋ باستاعى «بالالىق شاعىمنىڭ اسپانى» فيلمىنەن ءبىزدىڭ ۇرپاق قىمبات سانايتىن قوجا, تيمۋر سياقتى بالالاردىڭ بەينەسى ەلەستەگەنى بار. ءبىزدىڭ اۋىلدىڭ بالالارى سۇلتانعا ەلىكتەگەنىن دە بايقاعانمىن. كينوگەرلەرىمىز تاعى دا ەرلىك جاسادى. كۇتىپ جۇرگەن دۇنيەمىز جالعاسىن تاۋىپ, «ەلباسى جولى» كينوەپوپەياسىنا اينالدى. وسى شىنشىل شىعارمانىڭ تۇڭعىش پرەزيدەنت كۇنىنە ورايلاستىرىلىپ سومدالعانى, ۇلىق مەرەكەمىز تاۋەلسىزدىك كۇنى قارساڭىندا ەكرانعا شىعارىلعانى حالقىمىزدى ماقتانىش سەزىمىنە بولەيتىنى انىق. «وتتى وزەن» مەن «تەمىر تاۋ» اۋدان ورتالىعىنداعى ەڭ اسەم مادەنيەت ۇيىندە جارتى ايدان استام كورسەتىلەتىن بولادى. اۋىلداعى كىسىلەردى الىپ كەلىپ, العاشقى كەزەكتە تاماشالادىق. اسەر ۇشان-تەڭىز.
ءبىزدى مەرەيلەندىرەتىن تاعى ءبىر جاي, سۇلتان رولىندە جەرلەسىمىز نۇرلان ءالىمجاننىڭ وينايتىندىعى. ءبىرجان باباسىنىڭ تەكتىلىگىنە تارتقان ۇلانىمىزعا راحمەت ايتىپ, ماقتان تۇتامىز.
الماتى
بويىمدى ماقتانىش بيلەدى
مەرۋەرت وتەكەشوۆا,
اكتريسا.
قازاق تاريحىندا حالقىن اقىلمەن, پاراساتتىلىقپەن باسقارعان تاريحي تۇلعالار بولعان. سولاردىڭ سارا جولىمەن, سىندارلى ساياساتىمەن ەگەمەندى ەلىمىزدى باسقارىپ كەلە جاتقان ن.ءا.نازارباەۆتىڭ ورنى ەرەكشە. تۇڭعىش پرەزيدەنتىمىزدىڭ ەڭبەك جولى – قازاقستاندىقتار ءۇشىن ۇلگى مەن تاعىلىمنىڭ مەكتەبى.
باس كەيىپكەر سۇلتاننىڭ تەمىرتاۋ قالاسىنداعى مەتاللۋرگيالىق زاۋىتقا جۇمىسقا بارۋى, سول جەردەن ۋكرايناعا وقۋعا اتتانۋى, دنەپرودزەرجينسكىدەگى وقۋىن اياقتاپ, تەمىرتاۋ قالاسىنداعى زاۋىتقا قايتىپ ورالىپ, ەڭبەك جولىن باستاۋى ءفيلمنىڭ سيۋجەتىنە ارقاۋ بولعان.
اسىلى, ىقىلىم زاماننان بەرى قوعامدىق ومىردە قالىپتاسقان بەلگىلى ءبىر قۇبىلىس – كەسەك, ءبىرتۋار تۇلعالاردىڭ جاراتىلىسى ەرەكشە بولىپ, كوپشىلىك ورتادا بالا كەزدەن تانىلاتىندىعى. ءسويتىپ, جاسىنان كوزگە ىلىگىپ, قاي ىستە دە ماقساتكەرلىك مىنەز-بولمىسىمەن دارالانىپ, شوقتىعى بيىك تۇراتىندىعى. ءفيلمنىڭ باس كەيىپكەرى سۇلتان وسىنداي جان. قۇربى-قۇرداستارىنا قاراعاندا الدەقايدا ەرەسەك. ونى ەرەكشەلەگەن باستى نارسە – پىكىر ايتۋداعى جانە ارەكەت ەتۋدەگى دەربەستىك پەن جەتەكشىلىككە تۇراقتى ۇمتىلىسى.
سۇلتان نەگە جەتسە دە – مونشاقتاعان تەرىن قولىمەن سىپىرىپ, وت شاشقان دومنا پەشىنىڭ قىزۋىنا قاقتالىپ ءجۇرىپ جەتتى. ءوزىنىڭ جۇرەك وتىنا سەندى. بەينەتتەن بويىن تارتپادى. ءومىردىڭ ىستىق-سۋىعىنا الماس قىلىشتاي سۋارىلىپ ءوستى. وسىلايشا, جاس سۇلتاننىڭ الدىنان جاڭا مۇمكىندىكتەر اشىلدى. ونىڭ ءاردايىم ءبىرىنشى بولۋعا دەگەن ۇمتىلىسى, وزگەلەردى قىزىقتىرۋعا جانە سوڭىنا ەرتە بىلۋگە قابىلەتتىلىگى بايقالىپ, باعالاندى. تەمىرتاۋدا وزىنە ۇسىنىلعان پارتيالىق, كومسومولدىق جۇمىسقا شاقىرىلدى. فيلمدە ەلباسىمىزدىڭ جاستىق شاعى وسىنداي ناقتى وقيعالاردىڭ نەگىزىندە ورىلگەن. ەپيكالىق قۇلاشتا تۇسىرىلگەن كارتينانى تەبىرەنبەي وتىرىپ كورۋ استە مۇمكىن ەمەس.
ءفيلمنىڭ يدەيالىق-كوركەمدىك دەڭگەيى وتە جوعارى, زامان اعىمىنىڭ, ءوز ۋاقىتىنىڭ كورىنىسىن, ادامداردىڭ ءومىرى مەن تىنىس-تىرشىلىگىن بارىنشا جان-جاقتى, دالمە-ءدال كورسەتە بىلگەن تاماشا تۋىندى.
مۇندا بارلىق وبرازداردى شىنايى بەينەلەي بىلگەن اكتەرلەر شەبەرلىگىنىڭ دە الاتىن ورنى ۇلكەن. بۇل رەتتە, اسىرەسە, باس كەيىپكەردى سومداعان نۇرلان ءالىمجاننىڭ ەڭبەگى ەرەن. فيلمدە ونىڭ تالانتى بارلىق قىرىنان جارقىراي كورىنگەن. ءوزىنىڭ كەيىپكەرى بەينەسىن, وبرازىن دالدىكپەن نانىمدى جەتكىزە بىلگەن سۇلتاننىڭ جارى سارانىڭ بەينەسىن سومداعان جاس اكتريسا ءمادينا ەسمانوۆا ءۇشىن بۇل ۇلكەن كينوداعى دەبيۋتتىك ءرول ەكەن. سوعان قاراماستان ول قاناتقاقتى بەينەسىن ءوز دارەجەسىندە كورسەتە بىلگەن. فيلمنەن ەرەكشە اسەرلەندىم, بويىمدى ماقتانىش سەزىمى بيلەدى. ءبىزدىڭ ۇلان-بايتاق ەلىمىزدى بالا جاسىنان جەتى ونەردى جانىنا سەرىك ەتىپ ءوسىپ, سەگىز قىرلى, ءبىر سىرلى ازامات بولىپ جەتىلگەن ۇلى تۇلعا باسقارادى. ۇلتىمىزدىڭ ابىرويىنا, كيەسىنە اينالعان وسىنداي نار تۇلعالى پرەزيدەنتىمىز ءۇشىن ماقتانامىن.
قىزىلوردا
تولايىم تۋىندى
ايجان ومىرسەرىكوۆا,
№101 ورتا مەكتەبىنىڭ مۇعالىمى.
ەلباسىمىز نۇرسۇلتان نازارباەۆتىڭ ءومىر جولى تۋرالى كوپتەگەن ماقالالار, دەرەكتى دۇنيەلەرمەن تانىسپىز. ەڭ الدىمەن ول ءبىزدىڭ وزىمىزگە كەرەك. سەبەبى, تاۋەلسىز قازاقستاننىڭ تاريحىن جاساعان تولاعاي تۇلعانىڭ تولايىم تىرلىكتەرىن بىلۋگە ءتيىسپىز. ونان سوڭ بالا تاربيەسىمەن تىكەلەي اينالىسقاندىقتان ەلباسىنىڭ بەينەسىن وسكەلەڭ ۇرپاققا تانىتىپ, ەلباسىنىڭ ونەگەسىندە ەلىنە ادال قىزمەت ەتۋگە ناسيحاتتايمىز.
پرەزيدەنت نۇرسۇلتان نازارباەۆ تۋرالى «ەلباسى جولى» اتتى كينوەپوپەيانىڭ تۇسىرىلگەندىگى تۋرالى باسپاسوزدەن وقىدىق. كەشە قىزىلوردا قالاسىندا العاشقى كورسەتىلىمى بولدى. ارنايى بارىپ, تاماشالادىق. باسپاسوزدەن, كىتاپتان ەلباسى تۋرالى وقىعان بولەك تە, ال ونى كينو ارقىلى تاماشالاۋ ءتىپتى باسقاشا اسەر ەتەدى ەكەن. كينوەپوپەيانىڭ «وتتى وزەن», «تەمىر تاۋ» اتتى تاراۋلارىندا ەلباسىنىڭ ءومىرى شىنايى كورسەتىلەدى. باسىنان وتكەن ءارتۇرلى جاعدايلار سۋرەتتەلىپ, كورەرمەنگە رياسىز جەتكىزىلەدى. شىعارمانى تاماشالاپ شىققان كورەرمەندەردىڭ كوكىرەگىندە ماقتانىش سەزىمى تۇرعانى انىق. سەبەبى, تاۋەلسىزدىكتىڭ كەمەسىن ەشقانداي قيىنشىلىققا ۇرىندىرماي, حالقىمىزدى بەرەكەلى ومىرگە جەتكىزگەن تاۋ تۇلعانىڭ ءومىرىن, قيىنشىلىعى مەن قۋانىشىن, ماقساتى مەن مۇراتىن ەكراننان تاماشالاۋ ءار قازاقستاندىققا ەرەكشە اسەر ەتەتىنىن ءوز باسىمىزدان وتكەرىپ قايتتىق. ەڭ باستىسى, بۇل ەلىمىزدىڭ بولاشاعى سانالاتىن جاستارعا جاسالعان ەرەكشە سىي. ولار ەلباسىنىڭ ءومىر جولىنا قاراپ تاربيە الادى, سول ارقىلى بيىك مۇراتتارعا ۇمتىلادى.
اقتاۋ
بۇگىنگى بيىكتىڭ باستاۋى
راۋشان نۇر,
اقتاۋ قالاسىنداعى
№24 ورتا مەكتەپ ديرەكتورى.
«ەلباسى جولى» ءفيلمى كوڭىلىمىزدەن شىقتى. اۋىلدان ارمان قۋىپ الىسقا اتتانعان جاس جىگىت ءومىردىڭ قيىندىقتارىنا مويىماي, ەڭبەك مايدانىندا شىڭدالا, ءجىگەرلەنە تۇسەدى. جاس جىگىتتەردىڭ ومىرىندە كۇش-قايراتتىڭ اتقاراتىن ءرولى مەن الاتىن ورنى, ماڭىزى اسا زور. بوسبەلبەۋ بولماساڭ عانا جولىڭ اشىق, مەرەيىڭ ۇستەم.
تۋعان جەردەن جىراقتا جۇرگەن, شاحتادا جۇمىس ىستەگەن سۇلتاننىڭ بويىنان وسى ەر جىگىتكە جاراساتىن جاقسى قىلىقتاردىڭ بارلىعى تابىلۋى – ونى بۇگىنگى بيىك تۇعىرعا باستاعان سەكىلدى. جاستىق شاقتاعى سۇيىسپەنشىلىك سەزىمىن باستان كەشۋ, قىزمەتتەگى قيىندىقتار, كوپتى كورگەن اعا بۋىن اقىلىنا قۇلاق اسۋ, قىزمەت باسپالداعىنىڭ العاشقى ساتىلارىنا قادام باسۋ جانە ونى جاۋاپكەرشىلىكپەن اتقارۋعا قۇلشىنىس كينودا تارتىمدى, نانىمدى بەينەلەنگەن.
ءاربىر ونەر تۋىندىسى حالىقتىق بولۋى ءۇشىن حالىقتىڭ جۇرەگىنە جاقىن, قۇلاعىنا ءسىڭىمدى بولۋى شارت, «ەلباسى جولى» كوركەمدىك ساپا جاعىنان دا كورنەكتى تۋىندى بولىپ شىققان. وتاندىق كينو ونەرىنىڭ جاڭا تۋىندىسى, قازاقستان رەسپۋبليكاسى تۇڭعىش پرەزيدەنتىنىڭ ءجۇرىپ وتكەن, شىڭدالعان جولىن بەدەرلەگەن جاڭا ءتۇسىرىلىم وزىنەن كەيىنگى ماعىنالى لەنتالاردىڭ ءىزاشارى بولعاي!
ورال
شىعارما شىرايى – شىندىق
اقسەرىك ءايتىموۆ,
تەحنيكا عىلىمدارىنىڭ كانديداتى.
فيلمدەگى رەجيسسەرلىك شەشىمدەردىڭ شىنايىلىعى, تاپ-تازا ءومىردىڭ وزىنەن الىنعان قوسپاسى جوق كوركەمدىك كەستەلەرى سۇيسىندىرمەي قويمايدى. كينوتۋىندىدا بۇگىنگى ەلباسىنىڭ ماماندىق تورەسىنىڭ ءبىرى – مەتاللۋرگ بولىپ جۇرگەندە شەتەلدىك كەيىپكەر قىزدىڭ ونىڭ كەلىستى كەلبەتىمەن قۇيىپ قويعانداي كيىم كيىسى مەن سىمداي تارتىلعان سىمباتىنا قاراپ مەتاللۋرگ ەكەنىنە كۇمان كەلتىرۋى دە تابيعي قالىپتا سۋرەتتەلەدى. تەك ول قىز قۇرىش قۇيۋشىنىڭ قولىنداعى مۇيىزدەي قاتىپ قالعان سارعىش سۇيەلدى كورگەننەن كەيىن عانا رايىنان قايتادى. فيلمدە مۇنداي ءومىر مەن ءوندىرىستىڭ وزىنەن الىنىپ, شىندىقپەن سۋارىلعان دەتالدار مەن شتريحتار از ەمەس ەكەن.
بوياماسىز, قوسپاسىز ايتىلعان ونەر تۋىندىسى عانا جۇرەكتەرگە جەتە الادى. تابيعيلىق قاشاندا ادام جانىنا جاقىن كەلەدى. سوندىقتان دا كەز كەلگەن قاراپايىم ادام مۇنداي شىعارمانى جاقىن قابىلدايدى.
سول ءۇمىتىمىزدىڭ اقتالعانى ءۇشىن دە وتاندىق كينوتارلاندارعا شەكسىز ريزاشىلىعىمىزدى جەتكىزگىمىز كەلەدى. مەنىڭ ويىمشا, بۇل كينوەپوپەيا بارشا قازاقستاندىقتاردىڭ بويىندا ەل مەن جەردى شەكسىز سۇيە ءبىلۋ سەزىمىن قالىپتاستىرۋعا, قازاقستاندىق ءپاتريوتيزمدى تەرەڭدەتۋگە, وتانعا ادال قىزمەت جاساۋعا ۇلكەن ىقپالىن تيگىزە الادى.
